Лінкі ўнівэрсальнага доступу

Абама закліча Эўропу захаваць цьвёрдую пазыцыю адносна Расеі


Прэзыдэнт ЗША Барак Абама ў панядзелак адпраўляецца ў тыднёвае эўрапейскае турнэ — у Польшчу, Бэльгію і Францыю. Ён спадзяецца пераканаць сьвет, што Злучаныя Штаты па-ранейшаму зьяўляюцца апірышчам абароны дэмакратычных урадаў, піша The Washington Post.

Паездка пачынаецца зь візыту ў Варшаву да 25-й гадавіны першых дэмакратычных выбараў у Польшчы і завершыцца ўдзелам ва ўрачыстасьцях у Нармандыі з нагоды 70-й гадавіны Дня высадкі дэсанту антыгітлераўскай кааліцыі ў кантынэнтальнай Эўропе. Гэта адбываецца празь некалькі дзён пасьля таго, як Абама абвясьціў аб новай канцэпцыі амэрыканскай вонкавай палітыкі ў вайсковай акадэміі ЗША.

Аглядальнікі зьвяртаюць увагу на тое, што Абама будзе выступаць з прамовай аб бясьпецы ў Эўропе і глябальным лідэрстве ЗША ў Варшаве, усяго за некалькі сотняў кілямэтраў ад межаў Украіны і колішняга Савецкага Саюзу. Гэты выступ мог бы выклікаць рэзананс і розгалас накшталт таго, якія выклікалі аналягічныя выступы Рональда Рэйгана і Джона Кэнэдзі ля Брандэнбурскай брамы дзясяцігодзьдзі таму. Але некаторыя эўрапейцы ня ўпэўненыя, ці зможа Абама годна працягнуць традыцыю, запачаткаваную тымі прэзыфдэнтамі.
Прэзыдэнт Барак Абама занепакоены тым, што пасьля пасьпяховых выбараў ва Ўкраіне ціск на Расею можа аслабнуць.


Таксама пра візыт амэрыканскага прэзыдэнта ў Эўропу піша сёньня The Wall Street Journal.

Прэзыдэнт Барак Абама занепакоены тым, што пасьля пасьпяховых выбараў ва Ўкраіне ціск на Расею можа аслабнуць. Ён скарыстаецца на гэтым тыдні візытам у Эўропу, каб заклікаць саюзьнікаў ЗША прытрымлівацца ў дачыненьнях з Масквой жорсткай лініі.

Акрамя таго, Абама ўпершыню з пачатку ўкраінскага крызысу сустрэнецца з прэзыдэнтам Расеі Ўладзімірам Пуціным: афіцыйная сустрэча не заплянавана, але абодва лідэры запрошаныя на мерапрыемствы ў гонар 70-годзьдзя высадкі саюзьніцкіх войскаў у Нармандыі. Перад гэтым кіраўнік Белага дому ў Варшаве сустрэнецца зь пераможцам прэзыдэнцкіх выбараў ва Ўкраіне Пятром Парашэнкам, а пасьля накіруецца на саміт G7 ў Брусэль.

Пасьля Брусэлю ён наведае Парыж.
Прыярытэт 4-дзённай паездкі Абамы — запэўніць саюзьнікаў, што ЗША прымуць меры для забесьпячэньня іх бясьпекі.


Прыярытэт 4-дзённай паездкі Абамы — запэўніць саюзьнікаў, што ЗША прымуць меры для забесьпячэньня іх бясьпекі. Супакаяльныя замежныя турнэ сталі неад’емным элемэнтам другога тэрміну Абамы пры тым, што эўрапейскія, блізкаўсходнія і азіяцкія лідэры падвяргаюць сумневу яго прыхільнасьць да выкананьня сваіх абавязкаў на сусьветнай арэне, — гаворыцца ў артыкуле.

На саміце G7 ў Брусэлі Абама запатрабуе ад сусьветных лідэраў прыйсьці да пагадненьня аб новым парозе, за якім пачынаюцца санкцыі супраць цэлых сэктараў расейскай эканомікі. ЗША і Нямеччына дамаўляліся перайсьці да такіх санкцый, калі Расея сарве выбары ва Ўкраіне. Праз адсутнасьць ўмяшаньня ў выбарчы працэс амэрыканцы асьцерагаюцца, што эўрапейскія лідэры пакінуць украінскі крызіс у мінулым і працягнуць весьці справы з Пуціным. Абама паспрабуе ўсталяваць новыя парамэтры.
Праз адсутнасьць ўмяшаньня ў выбарчы працэс амэрыканцы асьцерагаюцца, што эўрапейскія лідэры пакінуць ўкраінскі крызыс у мінулым і працягнуць весьці справы з Пуціным.

«Дзе ў шэрай зоне паміж уварваньнем і поўным неўмяшаньнем Расеі ляжаць пускавыя мэханізмы? Вось пра што мы ўвесь час думаем», — распавёў выданьню высокапастаўлены супрацоўнік амэрыканскай адміністрацыі. Часткова аргумэнты Абамы будуць заснаваныя на тым, што ва ўмовах сутыкненьняў на ўсходзе Ўкраіны і акупацыі Крыму Расеяй абстаноўка ва Ўкраіне застаецца хісткай.

«Мы лічым, што сытуацыя па-ранейшаму застаецца крызіснай, — заявіў Бэн Родс, намесьнік памочніка Абамы па нацыянальнай бясьпецы. — На ўсходзе і поўдні Ўкраіны ад гвалтоўных дзеяньняў, якія робяцца і ініцыююцца мясцовымі сэпаратысцкімі групоўкамі, рэгулярна гінуць людзі. Так што пра пераадоленьне крызысу ва Ўкраіне гаворкі не ідзе», — прыводзіць словы амэрыканскага чыноўніка The Wall Street Journal.
XS
SM
MD
LG