Лінкі ўнівэрсальнага доступу

logo-print

Ацаніць «неспартовыя вынікі» для Менску чэмпіянату сьвету па хакеі, які днямі завяршыўся, Свабода папрасіла афіцыйнага і незалежнага экспэртаў.

Паводле старшыні Фэдэрацыі хакея Беларусі, кіраўніка Дырэкцыі па правядзеньні чэмпіянату сьвету па хакеі 2014 году Яўгена Ворсіна, на правядзеньне чэмпіянату сьвету патрацілі да 10 мільёнаў эўра. Але нядрэнна і зарабілі — толькі на квітках больш за 11 мільёнаў эўра.

У Менску пабудавалі 14 новых гатэляў, «Чыжоўка-арэну», аквапарк «Лябяжы», рэканструявалі Нацыянальны аэрапорт, праклалі новыя дарогі, зрабілі транспартныя разьвязкі.

Зона гасьціннасьці зь летнімі кавярнямі, гандлёвымі шэрагамі каля Палацу спорту так спадабалася ня толькі гасьцям сталіцы, але і менчукам, што яе вырашылі пакінуць.

Застанецца і ангельская мова ў мэтро.

Рабухін: «Гэта магутны рывок ва ўсім: у абслугоўваньні, транспарце, разьвіцьці інфраструктуры»

Мэнэджэр па прасоўваньні Дырэкцыі па правядзеньні чэмпіянату сьвету па хакеі Пётар Рабухін пералічвае, што набыў Менск у сувязі з чэмпіянатам, пачынаючы зь літары «А»:
Замежныя турысты, што наведалі Беларусь, пераканаліся, што ў нас па вуліцах ня ходзяць мядзьведзі, і мы ня ходзім у шапках-вушанках
«У першую чаргу, аэрапорт — рэканструявалі Нацыянальны аэрапорт. Потым — арэны. „Менск-арэна“ — шматфункцыянальны спартовы комплекс. „Чыжоўка-арэна“ — яшчэ круцей: шматфункцыянальны спартова-забаўляльны культурны цэнтар. То бок там коўзанкі, боўлінгі, більярд, рэстараны, бары — чаго там толькі няма! І гэта застанецца для жыхароў мікрараёну Чыжоўка. Аўтамабільныя разьвязкі, дарогі. 14 новых гатэляў. А самае галоўнае — гэта замежныя турысты, што наведалі Беларусь, пераканаліся, што ў нас па вуліцах ня ходзяць мядзьведзі, і мы ня ходзім у шапках-вушанках. Так што зь нецярплівасьцю чакаем гэтых турыстаў на іншыя спаборніцтвы. Дый наагул, спадзяемся на наплыў турыстаў. Тым больш, столькі гатэляў новых набудавалі!

Дарэчы, сёньня мы даведаліся, што ў красавіку 2015 году ў Менску пройдзе чэмпіянат сьвету па футзалу. Практычна любыя спаборніцтвы ўсясьветнага ўзроўню мы можам правесьці, маючы досьвед.

Яшчэ чэмпіянат навучыў сфэру абслугоўваньня ветлівасьці, кантактнасьці, гасьціннасьці. Гэта магутны рывок ва ўсім: у абслугоўваньні, транспарце, разьвіцьці інфраструктуры. А самае галоўнае — гэта зносіны, кантакты паміж людзьмі, добразычлівасьць».

Пётар Рабухін спадзяецца, што пасьля чэмпіянату сьвету павялічыцца колькасьць замежных турыстаў, і новыя гатэлі будуць запаўняцца.

Харэўскі: «Менск стаў выглядаць больш салідна і па-эўрапейску»

Мастацтвазнаўца Сяргей Харэўскі пагаджаецца, што да чэмпіянату было сапраўды зроблена шмат карыснага:

«Шмат зрабілі па добраўпарадкаваньні гораду, па завяршэньні даўгабудаў, шмат пабудавалі, адрамантавалі. Безумоўна, усё гэта застанецца.

Відавочны цывілізацыйны прарыў у тым, што ў мэтро пачалі абвяшчаць па-ангельску. У горадзе, дзе стагодзьдзі не гучала іншая мова, нарэшце яна прарвалася. Людзі, што займаліся абслугоўваньнем гасьцей, пачынаючы ад тых, хто працаваў на касах, і заканчваючы міліцыянтамі, атрымалі досьвед, як працаваць ва ўмовах, калі прыяжджае шмат людзей з розных краінаў.

Горад стаў прыгажэйшы, гарадзкія службы прайшлі важны экзамэн, Менск стаў выглядаць больш салідна і па-эўрапейску.

Што датычыцца ўсёй гэтай сымболікі, нейкіх ідэйных, палітычных дывідэндаў, думаю, яны невялікія. Таму што мы жывем ня ў вакуўме; падзеі, якія адбываюцца сёньня ва Ўкраіне, крызісы вакол нас робяць гэты прарыў зьнешнепалітычны мала актуальным і не такім відавочным.

Натуральна, што застанецца ў памяці — гэта грандыёзныя выставачныя праекты. Найперш, гэта праект у Нацыянальным мастацкім музэі „10 стагодзьдзяў беларускага мастацтва“, выстава ў музэі сучаснага мастацтва „100 гадоў беларускаму авангарду“ і велізарная мастацкая выстава ў Выставачным комплексе. Гэта эпахальныя рэчы, унікальныя праекты, прымеркаваныя да чэмпіянату, і ад гэтых выставаў мы цяпер будзем адмяраць наступны этап гісторыі беларускага мастацтва. Для калямастацкай публікі, мастакоў — гэта фантастычная, грандыёзная зьява.

У цэлым я б ацаніў гэтую дзейнасьць вакол чэмпіянату вельмі станоўчай. Былі дробныя нязручнасьці, але перабольшваць нэгатыўныя наступствы не выпадае. Ну, пацярпелі два тыдні нязручнасьці, але станоўчых эмоцый значна больш».

Паказаць камэнтары

XS
SM
MD
LG