Лінкі ўнівэрсальнага доступу

Аглядвацца на тое, прызнае Расея гэтыя выбары ці не, няма сэнсу, — Чумак


Віктар Чумак

Віктар Чумак

Віктар Чумак — дэпутат Вярхоўнай Рады Ўкраіны, прадстаўнік фракцыі «УДАР», старшыня парлямэнцкай камісіі па барацьбе з арганізаванай злачыннасьцю і карупцыяй. Сябра выбарчага штабу кандыдата на прэзыдэнта Пятра Парашэнкі.



Карэспандэнтка: «На вашу думку, які цяпер расклад — за два дні да выбараў? У каго ёсьць шанцы?»

«У раскладах я абапіраюся на вынікі сацыялягічных дасьледаваньняў. Ведаю тыя сацыялягічныя інстытуты, якім можна давяраць, і па ўсіх крыніцах, якія вартыя даверу, зараз наперадзе Пётар Парашэнка. Прычым адрыў досыць вялікі: ад 34% супраць 10% да 47% супраць 10%».

Карэспандэнтка: «А рэальным супернікам хто можа стаць Парашэнку, на ваш погляд?»

«Тут вельмі цікавая складаецца сытуацыя ў барацьбе за другое месца. Тры чалавекі маюць прыблізна роўныя шанцы. Калі шанец у Цімашэнкі крышачку вышэйшы, то разам зь ёй ёсьць яшчэ шанцы ў Сяргея Цігіпкі і Анатоля Грыцэнкі. Абсалютны лідэр — Парашэнка, а вось другім палітыкам можа стаць не абавязкова Цімашэнка. Цігіпка падбірае галасы ўсходняга электарату, які застаўся без свайго прадстаўніка ў прэзыдэнцкай гонцы. Грыцэнка падбірае галасы людзей, якія, так бы мовіць, аўтарытарна настроеныя, прамілітарысцка (ён былы міністар абароны)».

Карэспандэнтка: «Пётар Парашэнка заклікае да таго, каб выбары адбыліся ў адзін тур. Чаму такая ўстаноўка?»

«Проста першы тур — гэта не перамога Пятра Парашэнкі, гэта перамога краіны. Першы тур — гэта поўная легітымізацыя ўсёй улады ва Ўкраіне ў самы бліжэйшы час. Таму што цяпер мы жывём ва ўмовах вайны. Калі ня будзе перамогі ў першым туры, то, зыходзячы з той сытуацыі, якая цяпер склалася на ўсходзе, яна будзе раскачвацца яшчэ цягам месяца. І гэты час дасьць магчымасьць праціўнікам Украіны дэстабілізаваць абстаноўку яшчэ больш».

Карэспандэнтка: «А чым адметная праграма Парашэнкі?»

«Праграма Пятра Парашэнкі называецца „Жыць па-новаму“. Жыць па-новаму — гэта жыць абсалютна зь іншай філязофіяй, жыць зь філязофіяй эўрапейскай дзяржавы. Пачынаць трэба зь сябе, але не забывацца на тое, што трэба адказваць за ўсю краіну. Жыць па-новаму — гэта азначае жыць без карупцыі. То бок калі Ўкраіна хоча стаць эўрапейскай краінай, яна павінна жыць па-новаму. Вось і ўсё».

Карэспандэнтка: «Супернікі Парашэнкі на выбарах, у прыватнасьці, прадстаўнікі штабу Юліі Цімашэнкі, апасаюцца, што калі Парашэнка прыйдзе да ўлады, ён павернецца тварам да Масквы, бо ў яго ў Расеі ёсьць бізнэс...»

«Я ня буду казаць, якія бізнэсы былі ў Юліі Ўладзімераўны з расейскім бокам, гэта некарэктна. Але Ўкраіна — эўрапейская краіна, якая павінна будаваць адносіны з усімі сваімі суседзямі. Расея на сёньняшні дзень не зьяўляецца нашым добрым сябрам і братам. Дакладней, не Расея не зьяўляецца, а менавіта расейскае кіраўніцтва сёньняшняе. Але яно ня вечнае. А нармальны палітык глядзіць ня толькі на сёньняшні дзень, ён глядзіць у будучыню».

Карэспандэнтка: «То бок у далейшым вы не выключаеце супрацоўніцтва з Расеяй?»

«А навошта яго выключаць? Расея — вялікая краіна з багатымі рэсурсамі. Зьменіцца кіраўніцтва — і ўсё будзе па-іншаму. Зразумейце, нічога вечнага ў гэтым сьвеце няма. У палітыцы — тым больш».

Карэспандэнтка: «А прыхільнасьць да Эўразьвязу, да НАТО — яна застанецца?»

«Пётар Парашэнка — самы праэўрапейскі палітык ва Ўкраіне. Ён быў міністрам замежных спраў і праводзіў праэўрапейскую палітыку. Пра ягоную праэўрапейскую пазыцыю ведае ўся Эўропа».

Карэспандэнтка: «Вы асьцерагаецеся, што выбары ня будуць прызнаныя Расеяй, краінамі Эўразьвязу?»

«Баяцца нам няма чаго, бо выбары будуць прызнаныя ўсім сьветам, усімі дэмакратычнымі краінамі. Праблема ў тым, што Расея цяпер ня хоча прызнаваць. Мы бачым, якую палітыку адносна Ўкраіны цяпер праводзіць Расея. Гэтая палітыка накіраваная на раскол краіны. Гэта палітыка, у выніку якой Расея акупавала частку тэрыторыяў Украіны. Аглядвацца на тое, прызнае Расея гэтыя выбары ці не, няма ніякага сэнсу. Калі прызнае ўвесь астатні сьвет, то Расея неяк потым пагодзіцца».
XS
SM
MD
LG