ПАДЗЕІ ДНЯ
У эфіры нашага радыё тры гадзіны жывога эфіру, прысьвечанага 60-годзьдзю беларускай службы Радыё Свабода.
На чэмпіянаце сьвету па хакеі ў Менску пройдуць гульні: у «Чыжоўка-Арэне» — Нарвэгія-Канада (12.45); Данія-Славаччына (16.45); Чэхія-Францыя (20.45); у «Менск-Арэне» — Нямеччына-ЗША (12.45); Латвія-Швэйцарыя (16.45); Расея-Беларусь (20.45).
У Галерэі сучаснага мастацтва «Ў», мэдыяпраект «pARTisan» пры падтрымцы мультымэдыйнага часопісу 34mag. net запрашае на прагляд фільму «Строгі юнак», рэж. Абрам Роом, 1936. Пачатак у 19.00.
ГЭТЫ ДЗЕНЬ У ГІСТОРЫІ
325 — адкрыўся Нікейскі сабор, першы агульны сабор хрысьціянскай царквы.
1654 — пачалася самая разбуральная і самая крывавая за ўсю гісторыю Беларусі трынаццацігадовая вайна з Маскоўскай дзяржавай, якая забярэ жыцьці кожнага другога жыхара тагачаснай Беларусі.
1902 — Куба здабывае незалежнасьць ад ЗША. 20 траўня стала Днём незалежнасьці гэтай астраўной дзяржавы.
1954 — у Мюнхэне пачала вяшчаньне беларуская сэкцыя Радыё Вызваленьне (цяпер беларуская служба Радыё Свабода). Першую беларускамоўную перадачу рыхтавалі Вінцэнт Жук-Грышкевіч, Пятро Сыч, Сымон Кандыбовіч, Янка Ліманоўскі, Лявон Карась.
1983 — першыя публікацыі пра вірус імунадэфіцыту чалавека ў часопісе «Science», зробленыя Робэртам Гало і, незалежна ад яго, Люкам Мантанье.
У гэты дзень нарадзіліся:
1799 — Анарэ дэ Бальзак, францускі пісьменьнік.
1882 — Сігрыд Унсэт, нарвэская пісьменьніца, ляўрэат Нобэлеўскай прэміі 1928 году.
1902 — беларускі паэт Язэп Пушча.
1944 — ангельскі рок-сьпявак Джо Кокер.
У гэты дзень памерлі:
1918 — беларускі пісьменьнік Карусь Каганец.
2012 — Робін Гіб, брытанскі сьпявак і аўтар песень, адзін з заснавальнікаў гурту «Bee Gees».
2013 — Рэй Манзарэк, клявішнік і адзін з заснавальнікаў гурту «The Doors».
ЦЫТАТА НА ПАМЯЦЬ:
«У тапаграфіі кут, мераны ўправа ад магнітнай поўначы, завецца азымутам. Азымут паказвае нам напрамак простага маршу да мэты. Зьмераны на карце кут досыць добра запамятаць — пасьля, гледзячы на стрэлку компасу, можна ў дзень і ў ночы ісьці проста да мэты.
Мы — беларускія эмігранты, маем свой зьмераны і добра запамятаны азымут ад месца нашага прабываньня да нашай мэты — Беларусі. І гэты азымут мы завём азымутам сэрца. Залежна ад нашага месца лічбы азымуту мяняюцца: і так, азымут з Аўстраліі іншы, чым з Англіі, а яшчэ іншы з Канады, але мэта застаецца адна і тая самая — дарагі, родны, паняволены наш край.»
«Азымут сэрца», першая беларускамоўная перадача Радыё Вызваленьне, 20 траўня 1954 году.