Лінкі ўнівэрсальнага доступу

Мітрапаліт Павал: «Набыў сабе буквар беларускай мовы»


Мітрапаліт Менскі і Слуцкі, Патрыяршы экзарх усяе Беларусі Павал правёў першую прэсавую канфэрэнцыю ад часу, калі яго прызначылі кіраваць праваслаўнай царквою ў Беларусі.

Мітрапаліт Менскі і Слуцкі, Патрыяршы экзарх усяе Беларусі Павал правёў першую прэсавую канфэрэнцыю ад часу, калі яго прызначылі кіраваць праваслаўнай царквою ў Беларусі. Падзеі ва Ўкраіне мітрапаліт Павал назваў сутыкненьнем падманутых інтарэсаў, кіраўніка Беларусі — веруючым чалавекам, а таксама паведаміў пра сваё жаданьне вучыць беларускую мову.

Перад пачаткам прэсавай канфэрэнцыі мітрапаліт Павал прывітаў журналістаў як «аднадумцаў-праваслаўных» і прапанаваў разам памаліцца на ўшанаваньне сьвята Уваскрашэньня Хрыстовага. У кароткім расповедзе пра азнаямляльныя візыты ў праваслаўныя прыходы Беларусі герарх ухваліў сапраўдную прыхільнасьць прыхаджанаў да веры. Мітрапаліт адзначыў заўважную прысутнасьць у цэрквах вернікаў-мужчын, што не характэрна для цэркваў у Расеі. Але адно зь першых пытаньняў ад журналістаў было пра Ўкраіну, а менавіта — пра ўдзел у кровапраліцьці людзей адной веры:

«Тое, што сёньня адбываецца ва Ўкраіне, — гэта яшчэ адно сьведчаньне распаду ў асяродку праваслаўных людзей. Праваслаўная царква і сьвятары кананічнай праваслаўнай царквы не бяруць удзелу ў гэтых палітычных і вайсковых групоўках. Але раскольнікі гэтым займаюцца. Як вы разумееце — сутыкнулі людзей па інтарэсах: адным паабяцалі добрыя пэрспэктывы, калі павернуцца на Захад, іншым паабяцалі добрыя пэрспэктывы, калі павернуцца на Ўсход. Ведаеце, нездарма ж у Польшчы кажуць: паны б’юцца, а з халопаў шапкі ляцяць. Вось гэта ж самае цяпер адбываецца і ва Ўкраіне».

Мітрапаліт Павал заявіў, што праваслаўная царква будзе супрацоўнічаць з прадстаўнікамі ўсіх рэлігіяў, «якія працуюць на яднаньне», але цяперашнія адносіны з каталіцкім касьцёлам назваў ні гарачымі, ні халоднымі. У той жа час герарх выказаў задаволенасьць супрацоўніцтвам праваслаўнай царквы зь дзяржаўнымі ўладамі Беларусі, але паведаміў і пра адсутнасьць нейкіх новых супольных плянаў ці праектаў. Герарх адзначыў паразуменьне з боку кіраўніка краіны, а на пытаньне пра пазыцыю Лукашэнкі як «праваслаўнага атэіста» адказаў, што меў зь ім гаворку на гэтую тэму:
«Ён нармальны, веруючы, праваслаўны чалавек, і погляды ягоныя зразумелыя. Аднойчы ён выказаўся і гэтым хацеў падкрэсьліць, што ён мала практыкуе, што ня ходзіць у царкву кожны дзень ці кожны тыдзень, як вы. Вось і ўсё».

Кіраўнік праваслаўнай царквы ў Беларусі паўтарыў свае ранейшыя заявы наконт прыхільнага стаўленьня да беларускай мовы. А менавіта — што ня будзе перашкаджаць беларускамоўнаму навучаньню ў нядзельных школах і правядзеньню набажэнстваў. Аднак пра адмысловыя захады дзеля пашырэньня беларускай мовы ў праваслаўнай царкве герарх не паведаміў. Мітрапаліт Павал падкрэсьліў, што і сам хоча вучыць беларускую мову, хоць ня мае часу, каб чытаць творы беларускіх літаратараў. Але прынамсі адну беларускую кнігу ўжо набыў:

«Я крыху нават разумею, што людзі кажуць, хоць і ня ўсё. Я нават буквар сабе набыў — самавучак — і нават некалькі разоў яго ўжо разгортваў. Я ніколькі не адмаўляюся, шчыра хачу вучыць мову, і ўжо мы так настроіліся, што мне будуць дапамагаць, паказваць і навучаць. Але, ведаеце, я нават не спадзяваўся, што тут такая загружанасьць — чым далей у лес, тым болей дроў. Вядома, калі б я прыехаў сюды вывучаць беларускую літаратуру, то я аддаваў бы гэтаму больш часу. Сёньня мая галоўная скіраванасьць — асьветніцкая і рэлігійная дзейнасьць». Belarus - Metropolitan of Minsk and Slutsk Pavel at the meeting with journalists, (cropped), Minsk, 13May2014

Belarus - Metropolitan of Minsk and Slutsk Pavel at the meeting with journalists, (cropped), Minsk, 13May2014


Патрыяршы экзарх нэгатыўна выказаўся наконт абраньня пераможцам конкурсу Эўрабачаньня Канчыты Вурст ды заклікаў не дапусьціць выступленьня ў Беларусі польскага рок-гурту Behemoth, які, паводле мітрапаліта, прапагандуе сатанізм.

На завяршэньне сустрэчы мітрапаліт Павал паабяцаў, што прэсавыя канфэрэнцыі для журналістаў будуць традыцыйнымі.
XS
SM
MD
LG