10:53
9.5.2014
Лукашэнка бяз стужкі
У Менск прайшло шэсьце вэтэранаў, кіраўніцтва Беларусі, прадстаўнікоў прадпрыемстваў і праўладных грамадзкіх арганізацый.
Наперадзе калёны ішоў Аляксандар Лукашэнка з малодшым пазашлюбным сынам Мікалаем. Старэйшых сыноў побач зь ім не было. На лацкане пінжака ў Лукашэнкі не было ніякай стужкі, ні георгіеўскай, ні чырвона-зялёнай. А ў Мікалая Лукашэнкі была начэпленая стужка колераў афіцыйнага беларускага сьцяга.
10:56
9.5.2014
Лукашэнка: «Над Украінай згусьціліся хмары грамадзянскай вайны»
Выступаючы сёньня ля помніка Перамогі ў Менску на сьвяткаваньні Дня Перамогі, Аляксандар Лукашэнка заявіў пра мэтаскіраваную дзейнасьць пэўных сілаў па дэстабілізацыі абстаноўкі ў сьвеце:
«Балюча гаварыць, што адной з такіх „гарачых кропак“ стала Ўкраіна. Тут згусьціліся хмары грамадзянскай вайны. І брат падняў руку на брата. Гэта неабходна спыніць».
Кіраўнік Беларусі таксама казаў, што блёк НАТО «нарошчвае сваю актыўнасьць ля нашай мяжы». Аднак «нашы Ўзброеныя сілы гатовыя ў любы момант адстаяць незалежнасьць Беларусі».
11:46
9.5.2014
На парадзе ў Маскве — 11 тысячаў вайскоўцаў
У 25 расейскіх гарадах адбудуцца вайсковыя парады.
Самым маштабным быў парад у Маскве. У параўнаньні зь мінулым годам колькасьць баявой тэхнікі, якую дэманстравалі на Чырвонай плошчы, значна павялічаная.
У маскоўскім парадзе ўдзельнічалі каля 11 тысяч вайскоўцаў, 151 адзінак рознай баявой тэхнікі, а таксама 69 самалётаў і верталётаў — па колькасьці гадоў зь дня перамогі ў Вялікай Айчыннай вайне.
У сваім выступе прэзыдэнт Расеі Ўладзімер Пуцін заявіў, што 9 траўня быў, ёсьць і будзе галоўным сьвятам, днём нацыянальнага трыюмфу.
11:51
9.5.2014
Вяшчаньне ўкраінскіх каналаў адноўлена
Вакол тэлевежы Нацыянальнай тэлерадыёкампаніі ў Кіеве арганізавана кругласутачнае патруляваньне.
Сакратар Рады нацыянальнай бясьпекі і абароны Вікторыя Сюмар назвала падпал кабэляў тэлевежы дывэрсіяй:
«Лёгіка расейскіх спэцслужбаў да гэтага часу грунтуецца на вучэньні Леніна пра першачарговыя „пошту, тэлефон, тэлеграф“, — адзначыла яна ў Facebook. — Падпалілі кабэлі ў калодзежы, доступ да якога ёсьць з вуліцы, кінуўшы ўсярэдзіну запальную сумесь», — паведаміла Сюмар.
12:23
9.5.2014
У Славянску сэпаратысты ў балаклавах праводзяць парад ваеннай тэхнікі
Як паведамляюць карыстальнікі сацыяльных сетак, па цэнтры Славянску рухаецца танк, на якім сядзяць узброеныя сэпаратысты ў балаклавах. Да баявой машыны прымацаваны сьцяг “Народнага апалчэньня Данбасу“.
12:24
9.5.2014
«У Менску пуставата, ментавата і параднавата»
Допіс чытача сайта Свабоды.
«Праехаўся па Менску: (новы) праспэкт Машэрава — Чырвоная — праспэкт Незалежнасьці. Насупраць стэлы ўчора гэтай парой быў нейкі нібы кірмашык — натоўп, шапікі, загародкі. Сёньня — пуста, гола.
На мосьце стаяў міліцыянт, але рух не перакрываў.
У некаторых — дзяцей і дарослых — балёнікі, нярэдка цэлымі вязанкамі, чырвоныя і зялёныя. Георгіеўскіх колераў не відаць. Зрэдку трапляюцца вэтэраны з ордэнамі.
На скрыжаваньні з Чырвонай стала ясна, чаму пуставата: у напрамку да стэлы праехаў картэж — даўжэзны чорны лімузын з прэзыдэнцкім штандарыкам, пару хвілін перад ім адна за адной дзьве міліцэйскія машыны, вакол лімузына адна-дзьве ўжо цывільныя. Пара дзясяткаў людзей з кожнага боку чакалі пераходу, міліцыянт ім казаў ня лезьці на ражон.
На плошчы Коласа і далей па праспэкце Незалежнасьці людней і весялей. Трапляюцца касьцюмаваныя купкі людзей — то ў аднастайных маечках, то з „БРСМ“ на сьпіне, то ў савецкім хакі.
Музыкі ў цэнтры было не чуваць. Ля Парка Чалюскінцаў духавы аркестар грае маршы».
12:25
9.5.2014
Дзень перамогі: у Адэсе, Мікалаеве і Львове спакойна, у Марыюпалі і Данецку страляюць
У Марыюпалі падчас мерапрыемстваў з нагоды перамогі ў Вялікай Айчыннай вайне ў цэнтры гораду чуваць стрэлы. Пра гэта паведамляюць відавочцы.
«З боку цэнтру гораду чуваць стрэлы. Выразна і ясна», — адзначыў у сваім твітэры адзін зь відавочцаў, перадае «Ўкраінская праўда».
Ёсьць пацярпелыя. З вайсковай часьці выехаў аўтобус зь людзьмі, мяркуючы па ўсім — узброенымі.
У Данецку раніцай каля Калінінскага рынку была перастрэлка, абстралялі аўто.
У Львове, Адэсе і Мікалаеве імпрэзы з нагоды Дня Перамогі праходзяць спакойна.
12:43
9.5.2014
У Луганску на парадзе прэзэнтавалі сьцяг «Луганскай народнай рэспублікі»
У цэнтры Луганску, дзе праходзіў мітынг з нагоды Дня Перамогі, людзям раздалі сьцягі так званай «Луганскай народнай рэспублікі». Пра гэта паведамляе ўкраінская служба Радыё Свабода. Луганчане ўбачылі гэты сьцяг упершыню.
Таксама некаторыя людзі трымаюць расейскі трыкалёр і сьцягі колеру георгіеўскай стужкі.
Мерапрыемства малалюднае. Улады Луганску вырашылі адмовіцца ад прыцягненьня дзяцей да ўдзелу, адменены і традыцыйны сьвяточны фаервэрк.
12:54
9.5.2014
У цэнтры Марыюпаля ідзе перастрэлка, чатырох з агнястрэльнымі раненьнямі шпіталізавалі. Як паведамляе мясцовы сайт 0629, страляніна пачалася каля 10:30.
13:17
9.5.2014
13:18
9.5.2014
У Луганскай вобласьці расстралялі дваіх чалавек
Cёньня ўначы на 850 км аўтадарогі Растоў — Харкаў выявілі 2 аўтамабілі Toyota FJ Cruiser з мноствам кулявых адтулін. У адной машыне быў труп мужчыны, у другой — труп жанчыны і параненая 10-гадовая дзяўчынка, якую шпіталізавалі ў цяжкім стане.
Паводле сьведчаньняў відавочцаў, машыны не спыніліся на патрабаваньне баевікоў, якія стварылі на дарозе блёкпост. Тады тыя абстралялі машыны з аўтаматычнай зброі. Пра гэта паведамляе інфармацыйнае агенцтва УНІАН.
13:44
9.5.2014
У Данецку баевікі напалі на дзяжурную часьць папраўчай калёніі
Сэпаратысты прыехалі ў калёнію на чатырох аўтамабілях, зайшлі ў каравульнае памяшканьне, дзе знаходзіцца дзяжурная часьць.
Нападнікі завалодалі пісталетам Макарава і трыма аўтаматамі Калашнікава без патронаў.
Ніхто з супрацоўнікаў калёніі не пацярпеў. На месцы здарэньня працуе сьледча-апэратыўная група, перадае УНІАН.
13:45
9.5.2014
У цэнтры Кіева затрымалі яшчэ адзін аўтамабіль з агнястрэльнай зброяй
Каля Кіева-Пячэрскай лаўры праваахоўнікі затрымалі яшчэ адзін аўтамабіль, у якім перавозілі агнястрэльную зброю.
Тэхпашпарт на «Аўдзі» выдадзены ў Луганскай вобласьці.
Пазьней да аўтамабіля падышоў малады чалавек прыблізна 25 гадоў і паспрабаваў узяць у салёне цыгарэты. Пасьля гэтага кінуўся ўцякаць.
Яго затрымалі прадстаўнікі Самаабароны Майдана. Міліцыя ня ўмешвалася.
Раней на кіеўскай Плошчы Славы праваахоўнікі затрымалі аўтамабіль, у якім перавозілі пісталет, нож, а таксама камплект аўтамабільных нумароў.
14:15
9.5.2014
Сілавікі адбілі атаку на будынак МУС у Марыюпалі. Зьнішчана каля 8 тэрарыстаў. У горадзе працягваюцца баі паміж прарасейскімі тэрарыстамі і ўкраінскімі вайскоўцамі.
Пра гэта паведамляе выданьне INSIDER.
Раней з боку аэрапорта ў Марыюпаль увайшла бранятэхніка са сьцягамі Ўкраіны.
Пра гэта паведамляе выданьне INSIDER.
Раней з боку аэрапорта ў Марыюпаль увайшла бранятэхніка са сьцягамі Ўкраіны.
14:22
9.5.2014
Рэдактар «Острова»: Сэпаратысты застрэлілі праваслаўнага бацюшку
У Канстанцінаўцы (Данецкая вобласьць) на блёкпосьце сэпаратысты застрэлілі праваслаўнага бацюшку.
Пра гэта ў сваім твітэры напісаў галоўны рэдактар выданьня «Остров» Сяргей Гармаш.
«Жыў побач, выйшаў іх абразуміць. Не дамовіліся...», — напісаў ён.
У Канстанцінаўцы ўкраінскія вайскоўцы праводзяць антытэрарыстычную апэрацыю.
Тэрарысты захапілі ў горадзе гарсавет, спрабавалі захапіць тэлевежу і пэрыядычна абстрэльваюць машыны.