Лінкі ўнівэрсальнага доступу

Лукашэнка зьмяніў тон у выказваньнях пра Ўкраіну


Аляксандар Лукашэнка

Аляксандар Лукашэнка

Падзеі ва Ўкраіне пацьвярджаюць правільнасьць прынятага некалькі гадоў таму рашэньня аб стварэньні Арганізацыі дамовы аб калектыўнай бясьпецы, заявіў сёньня кіраўнік Беларусі Аляксандар Лукашэнка падчас сустрэчы ў Маскве з кіраўнікамі Расеі, Армэніі, Кіргізстану і Таджыкістану.

«Тое, што мы сёньня сабраліся ў Маскве напярэдадні Вялікай Перамогі – гэта сымбалічна. І ня дай Бог, нешта здарыцца, мы павінны будзем устаць сьпінай да сьпіны, як кажуць вайскоўцы, і абараніць наш сувэрэнітэт і незалежнасьць» – сказаў Лукашэнка.

Ён таксама заклікаў прэзыдэнта РФ Уладзімера Пуціна не баяцца санкцый з боку Захаду. «Яны пайшлі на санкцыі, на эскаляцыю напружанасьці, але пакуль, што важна і небясьпечна, праз эканоміку і фінансы» – сказаў кіраўнік Беларусі.

Паводле яго, Расеі і яе бліжэйшым суседзям «трэба проста мабілізавацца». «Мы гэтыя санкцыі перажываем ужо не адзін дзясятак гадоў, і ведаем, што такое санкцыі, да чаго яны могуць прывесьці. Мы ў любой сытуацыі выстаім» – упэўнены Лукашэнка.

«Вы, Уладзімер Уладзімеравіч, павінны ведаць, што мы будзем побач плячо да пляча. Я гэта кажу не таму, што мы выступаем перад СМІ. У нас няма іншага выйсьця, як быць разам. Паасобку будзе тое, што ва Ўкраіне» – сказаў кіраўнік Беларусі.

Ён параўнаў трагічныя падзеі 2 траўня ў Адэсе, калі ў доме прафсаюзаў згарэлі некалькі дзясяткаў чалавек, зь беларускай вёскай Хатынь, спаленай у гады Другой сусьветнай вайны.

«Падзеі, якія адбыліся ва Ўкраіне, не дазваляюць нам сядзець у баку. Падзеі ў Адэсе прыводзяць нас да нядобрых паралеляў. Мы памятаем Хатынь, калі некалькі сотняў вёсак на тэрыторыі Беларусі былі спаленыя фашыстамі» – сказаў Лукашэнка.

«Мы ня можам спакойна на гэта глядзець, таму што там нашы людзі, яны заклікаюць аб дапамозе і патрабуюць рэагаваньня на такія рэчы», – дадаў ён.

Пры гэтым, падкрэсьліў Лукашэнка, «насьцярожвае неадэкватнае абсалютна рэагаваньне з боку нашых, калі іх так можна назваць, заходніх партнэраў. Проста дзіўна: у адной сытуацыі гэта нельга, у іншай сытуацыі – можна і заахвочваецца».

Сёньняшнія выказваньні Аляксандра Лукашэнкі наконт падзеяў ва Ўкраіне паказваюць, што ён памяняў сваю пазыцыю і ўсё бліжэй схіляецца да Масквы, — адзначае ў камэнтары Свабодзе менскі палітоляг Андрэй Фёдараў:

«Я, шчыра кажучы, быў упэўнены, — раней ці пазьней ён вымушаны будзе адмовіцца ад той пазыцыі. Яна наўрад ці задавальняла Расею. І ціск на кіраўніка Беларусі з Масквы рабіўся. Магчыма, Адэса — гэта толькі прыкрыцьцё, гэта такая спроба зрабіць добры выгляд пры дрэннай гульні».

Паказаць камэнтары

XS
SM
MD
LG