Лінкі ўнівэрсальнага доступу

logo-print

Лукашэнка – з Пуціным, Назарбаеў – з намесьнікам дзяржсакратара ЗША


Без Назарбаева

Без Назарбаева

Сёньня ў Маскве адбылася сустрэча кіраўнікоў краінаў, якія ўваходзяць у Арганізацыю дамовы аб калектыўнай бясьпецы (АДКБ): Армэніі – Саргсяна, Беларусі – Лукашэнкі, Кіргізстану – Атамбаева, Расеі – Пуціна і Таджыкістану – Рахмона.

Акрамя названых краінаў у АДКБ уваходзіць таксама і Казахстан. Пра прычыны, паводле якіх кіраўнік гэтай краіны Нурсултан Назарбаеў не паехаў у Маскву, афіцыйна не паведамляецца. Сёньня ў Казахстане ён сустрэўся з намесьнікам дзяржаўнага сакратара ЗША Уільямам Бэрнсам. Паведамляецца, што падчас сустрэчы былі разгледжаныя асноўныя напрамкі двухбаковых адносінаў, абмеркаваныя ключавыя пытаньні маючага адбыцца ўступленьня Казахстану ў Сусьветную гандлёвую арганізацыю.

«Бакі таксама абмяняліся думкамі па актуальных аспэктах міжнароднага парадку дня, уключаючы сытуацыю ва Ўкраіне і Аўганістане» – гаворыцца ў паведамленьні на сайце прэзыдэнта Казахстану.

Тым часам, Лукашэнку ў Маскве прадэманстравалі імітацыю ядзернага ўдару. Сёньня прэзыдэнт Расеі правёў трэніроўку па кіраваньні Ўзброенымі сіламі РФ. За трэніроўкай з Нацыянальнага цэнтру кіраваньня абаронай РФ назіралі кіраўнікі краінаў АДКБ: Беларусі — Аляксандр Лукашэнка, Армэніі — Серж Саргсян, Таджыкістану — Эмамалі Рахмон, Кіргізстану — Алзамбек Атамбаеў.

Як паведамляецца, былі адпрацаваныя пытаньні нанясеньня масіраванага ракетнага ядзернага ўдару насустрач і ў адказ сіламі ядзернага стрымліваньня і адбіцьцё ядзернага ўдару праціўніка сыстэмай супрацьракетнай абароны Масквы.

Падчас трэніроўкі таксама адпрацоўваліся пытаньні ўжываньня асобных злучэньняў і вайсковых частак ракетных войскаў і артылерыі, авіяцыі і СПА па зьнішчэньні наземных груповак і адбіцьці масіраванага ракетна-авіяцыйнага ўдару праціўніка.

Да трэніроўцы прыцягваліся стратэгічныя бамбавікі, падводныя ракетаносцы Ціхаакіянскага і Паўночнага флётаў РФ, рухомыя грунтавыя ракетныя комплексы стратэгічнага прызначэньня, сілы і сродкі паветрана-касьмічнай абароны.

Акрамя таго, у трэніроўцы былі задзейнічаныя злучэньні ракетных войскаў і артылерыі Паўднёвага і Цэнтральнага ваенных акругаў.

Пра гэта паведамляе Інтэрфакс.

Паказаць камэнтары

XS
SM
MD
LG