Лінкі ўнівэрсальнага доступу

Ужо сёньня, 6 траўня: Першы фінал Эўрабачаньня, юбілей Паўлюка Труса


Падзеі гэтага дня ў Беларусі, сьвеце, гісторыі.

ПАДЗЕІ ДНЯ

Вашынгтон. Кіраўніца зьнешняй палітыкі Эўразьвязу Кэтрын Эштан працягвае афіцыйны візыт у ЗША.

Кіеў. Міністар замежных справаў Вялікай Брытаніі Ўільям Хэйг прыбывае зь візытам ва Ўкраіну.

Менск. Да Дня перамогі Музэй гісторыі беларускай літаратуры і Музэй гісторыі беларускага кіно рэалізуюць праект «Праўда вайны: літаратура і кіно». 6 траўня – дзень Алеся Адамовіча. Месца – музэй гісторыі кіно. Пачатак а 15.00.

Капэнгаген. Першы паўфінал конкурсу песьні «Эўрабачаньне-2014».
ДЗЕНЬ У ГІСТОРЫІ

1856 – нарадзіўся Зыгмунд Фройд, стваральнік тэорыі псыхааналізу.

1861 – нарадзіўся Рабіндранат Тагор, індыйскі пісьменьнік, ляўрэат Нобэлеўскай прэміі 1913 году.

1903 – памёр Аляксандар Станкевіч, беларускі праваслаўны царкоўны дзяяч, гісторык, публіцыст.

1904 – нарадзіўся Паўлюк Трус, беларускі паэт.

1905 – нарадзіўся Юрка Гаўрук, беларускі перакладчык, крытык, паэт і рэжысэр. У 1935 годзе рэпрэсаваны, на 8 гадоў пазбаўлены волі; больш за 20 гадоў працаваў на розных работах у Карэліі, Усходняй Сыбіры, Комі АССР.

1926 – памёр Казімір Сваяк, беларускі паэт, каталіцкі сьвятар.

1934 – памёр Мікола Вяршынін, беларускі грамадзкі й палітычны дзяяч, консул БНР у Празе.

1949 – памёр Марыс Мэтэрлінк, бэльгійскі пісьменьнік, ляўрэат Нобэлеўскай прэміі 1911 году.

1953 – нарадзіўся Тоні Блэр, лідэр Лейбарысцкай партыі, прэм’ер-міністар Вялікабрытаніі гэтай краіны з 1997 па 2007.

1966 – у Менску ўрачыста адкрыўся новы Палац спорту.

1992 – памерла Марлен Дзітрых, нямецкая і амэрыканская акторка.
ЦЫТАТА НА ПАМЯЦЬ

Яшчэ пяскі магілы сьвежай
Пад сонцам Крыму не цьвілі…
Спытай у чайкі беласьнежнай,
Хто там пахованы й калі?..

Чыя забытая магіла,
Травой парослыя сьляды?..
Спытаю ў чайкі белакрылай,
Адкажа чайка мне тады:

«Дзе скалаў стромкія абрысы
Ад вока крадуць чырвань-сьвет,
Пад сьценьмі стройных кіпарысаў,
Памёр вялікіх дум паэт».

Памёр паэт на сьцежках славы
І рукі ў роспачы зацяў.
Ў грудзях з сухотнаю атравай
Адцьвіў у росквіце жыцьця!..

Памёр паэт!.. Ды песьня вечна!..
Яна зьвіла яму вянок!..
Бо ў чарцы пеніцца адвечна,
Жыцьцёва-хмельнае віно!..

Над морам ноч…
Маўчыць магіла…
Зьвіліся сьцені на расе.
Пад крыкі чайкі белакрылай
Пажоўкла моладасьць ў красе!..

Паўлюк Трус. Памяці Максіма Багдановіча

Паказаць камэнтары

XS
SM
MD
LG