Лінкі ўнівэрсальнага доступу

«Чарнобыльскі шлях 2014» — кірунак на палітызацыю


Менгарвыканкам забараніў заяўніцы «Чарнобыльскага шляху» Тацяне Новікавай праводзіць мітынг «За бязьядзерны сьвет» у гадавіну аварыі на Чарнобыльскай АЭС.

З заявай аб правядзеньні мітынгу Тацяна Новікава зьвярнулася да гарадзкіх уладаў асабіста, як каардынатарка антыядзернай кампаніі ў Беларусі. Тацьцяна Новікава заяўляе пра беспадстаўнасьць адмовы, а таму антыядзерная і антываенная тэматыка прагучыць падчас мітынгу, які пройдзе ў рамках «Чарнобыльскага шляху»:

«Для нас гэта ўнікальная магчымасьць выйсьці на вуліцы і гаварыць пра актуальныя экалягічныя праблемы, якія ўлада не вырашае і ня здольная вырашаць, а таксама не жадае весьці дыялёг з грамадзтвам. Перадусім гэта наступствы аварыі на ЧАЭС, будаўніцтва АЭС у Беларусі, а таксама пагроза ваеннага збройнага канфлікту з прымяненьнем ядзернай зброі».

Паводле Тацяны Новікавай, пагрозу ваеннай ядзернай небясьпекі для Беларусі нясе прысутнасьць на тэрыторыі краіны расейскіх вайсковых самалётаў. Таксама фактам ёсьць тое, што Беларусь паволі ператвараецца ў расейскую вайсковую базу і служыць расейскім пляцдармам, высунутым у Эўропу.

Суарганізатар «Чарнобыльскага шляху», прадстаўнік кампаніі «Беларускі рух» Вацлаў Арэшка падкрэсьліў, што адметнасьць сёлетняй акцыі — яе ня толькі экалягічная, але перадусім палітычная скіраванасьць:

«Мінулымі гадамі правядзеньнем „Чарнобыльскага шляху“ перадусім займаліся палітычныя структуры і партыі, і пры гэтым яны дэкляравалі, што акцыя не палітычная. Цяпер асноўныя рухавікі — экалягічныя арганізацыі, і пры гэтым палітычныя лёзунгі становяцца больш выразнымі. Гэта зразумела, бо і экалёгія, і жыцьцё беларускага народу ў самым шырокім сэнсе гэтага слова — закладнікі нашай палітычнай сыстэмы, якая стварае небясьпеку ваенную і экалягічную. І гэтае разуменьне, што бязь зьмены палітычнай сытуацыі зьмена экалягічнай сытуацыі папросту немагчымая, вельмі важнае».

Арганізатары Чарнобыльскага шляху таксама падкрэсьліваюць напружанасьць, якой улады суправаджаюць падрыхтоўку да акцыі. Так, напярэдадні быў затрыманы і атрымаў суткі арышту адзін з заяўнікаў акцыі Ільля Дабратвор. Арганізатары не выключаюць новых правакацыяў супраць актывістаў, а таксама правакацыйных дзеяньняў падчас самога Чарнобыльскага шляху.

Менгарвыканкам не дазволіў правесьці Чарнобыльскі шлях паводле маршруту і часу, прапанаванага заяўнікамі — ад Акадэміі навук да Курапатаў. Прадстаўнікі гарадзкой адміністрацыі прапанавалі правесьці шэсьце ад кінатэатру «Кастрычнік» да плошчы Бангалор. Час збору ўдзельнікаў перанесены з 12.00 на 16.00. Мітынг мае прайсьці на плошчы Бангалор цягам гадзіны — з 17.30 да 18.30. Завяршэньнем Чарнобыльскага шляху мае стаць ускладаньне кветак у памяць пацярпелых ад аварыі на ЧАЭС каля капліцы «Ўсіх тужлівых радасьць».
XS
SM
MD
LG