Лінкі ўнівэрсальнага доступу

Вінярскага арыштавалі на 12 сутак


Максім Вінярскі

Максім Вінярскі

Каардынатару «Эўрапейскай Беларусі» Максіму Вінярскаму Фрунзенскі суд Менску прысудзіў 12 сутак арышту за непадпарадкаваньне міліцыі.

Актывіст абвясьціў сухую галадоўку пасьля прысуду.

Карэспандэнту Свабоды Максім Вінярскі так пракамэнтаваў вырак:

«Мяне яўна хочуць ізаляваць перад Чарнобыльскім шляхам, а магчыма, і ў сувязі зь іншымі падзеямі. Я абвяшчаю сухую галадоўку і адмаўляюся падпарадкоўвацца незаконным загадам міліцыі».

Максім Вінярскі запатрабаваў, каб да яго выклікалі хуткую дапамогу.

«У суд прыехала хуткая дапамога, мяне агледзелі лекары, прызналі хворым і сказалі, што павязуць мяне ў лякарню. Але судзьдзя Людміла Лапо забараніла гэта рабіць, што, на маю думку, ёсьць крымінальным злачынствам», — паведаміў Максім Вінярскі карэспандэнту Свабоды з Фрунзенскага суду.

Максіма Вінярскага затрымалі некалькі чалавек у цывільным аб 11 гадзіне на вуліцы пасьля наведваньня крамы «Карона».

Максім Вінярскі нядаўна вызваліўся пасьля 15-суткавага арышту. Ён распавёў праваабаронцам, што перад вызваленьнем супрацоўнік міліцыі прапанаваў яму часова зьехаць зь Менску. Маўляў, ёсьць два варыянты: альбо зьехаць з краіны, альбо выехаць у вёску на пэўны час (маецца на ўвазе час правядзеньня чэмпіянату сьвету па хакеі).

Бо «пытаньне з вамі ўсімі» будзе абавязкова вырашана, папярэдзіў супрацоўнік міліцыі.

У адказ на гэтае папярэджаньне Вінярскі заявіў праваабаронцам, што ён не ўжывае наркотыкаў, ня лаецца матам, ня схільны да хуліганскіх учынкаў, і таму магчымы арышт просіць расцэньваць як прэвэнтыўную ізаляцыю з-за сваіх грамадзка-палітычных перакананьняў.
XS
SM
MD
LG