Лінкі ўнівэрсальнага доступу

Без дэнамінацыяў $1 каштаваў бы... Br 100 000 000

  • Тэлеканал Белсат

Так выглядала купюра 1000 рублёў да дэнамінацыі

Так выглядала купюра 1000 рублёў да дэнамінацыі

Новыя беларускія грошы ўжо надрукаваныя. Аляксандар Лукашэнка паведаміў, што яны будуць прыгажэйшыя за эўры. Прыгажосьць — прыгажосьцю, але чаму спатрэбіліся новыя грошы? У гэтым спрабуюць разабрацца вядоўца праграмы «Размова Калінкінай» і госьць у студыі — фінансавы аналітык «Alpari» Вадзім Іосуб.

Паводле кіраўніка краіны, шараговыя беларусы просяць правесьці дэнамінацыю. Нацыянальны банк таксама гэтага не адмаўляе. Каму трэба дэнамінацыя — людзям ці ўладзе? «Моцна гэтага ня трэба ні тым, ні гэтым. Дэнамінацыя — гэта абсалютна тэхнічнае мерапрыемства, якое ў жыцьці людзей у эканамічным пляне абсалютна нічога ня зьменіць. Зьменяцца цэньнікі і купюры. Ні горш, ні лепш ад гэтага ня стане», — гаворыць аналітык.


У Нацыянальным банку неаднаразова заяўлялі, што дэнамінацыю правядуць толькі пасьля таго, як зьнізіцца ўзровень інфляцыі ня менш за паказьнік 10 %. Цяпер жа толькі за першы квартал гэты паказьнік склаў 5 %. «Мы ўжо перажылі дзьве дэнамінацыі. Цяпер ідуць размовы пра трэцюю. Гэта досыць дарагая працэдура, і яна ў пэўным сэнсе падрывае давер да эканомікі ды валюты, дэманструючы ўсім, што былі пэрыяды гіпэрінфляцыі. Рэгулярныя дэнамінацыі не ідуць на карысьць краіны, — зазначае Вадзім Іосуб. — Мы ўжо „адкінулі“ чатыры нулі. Таму калі цяпер даляр каштуе Br 10 тыс, то без дэнамінацыі ён каштаваў бы Br 100 млн. Праўда, мы далёкія ад сусьветных рэкордаў. У 1923 годзе ў Нямеччыне „адразалі“ 12 нулёў. У Вугоршчыне ў 1946-м — „адрэзалі“ 29 нулёў».

На думку экспэрта, дэнамінацыя непазьбежная. «І тады мы апынемся ў вельмі невялікім коле краінаў, што перажылі тры дэнамінацыі: Зымбабвэ, Бразілія і Баўгарыя. Гэта сьведчыць пра тое, што краіна перажывала гіпэрінфляцыю, а гэта ў сваю чаргу азначае, што эканоміка працуе неймаверна неэфэктыўна», — падкрэсьліў госьць праграмы «Размова з Калінкінай» на Белсаце.
XS
SM
MD
LG