Лінкі ўнівэрсальнага доступу

«Заплаціш за электраэнэргію і газ — будзеш сядзець галодны»


Улада заявіла, што ў 2015 годзе беларусы пачнуць цалкам аплочваць спажытыя электраэнэргію і газ. Як вырастуць плацяжы і што пра гэта кажуць людзі?

Як сьцьвярджаюць улады, цяпер за камунальныя паслугі беларусы аплочваюць у сярэднім каля 28 адсоткаў іхнага кошту. Кубамэтар газу, напрыклад, абыходзіцца гараджаніну без малога ў 2 тысячы рублёў, кіляват электраэнэргіі — у 610,6 рубля.

Наколькі канкрэтна вырасьце, напрыклад, для гамельчукоў кошт таго ж газу, эканамісты дзяржаўнага прадпрыемства «Гомельаблгаз» сказаць не бяруцца. Гэтаксама як і ня кажуць, колькі цяпер даплачвае прадпрыемства за насельніцтва:

«У нас ёсьць пастанова Савету Міністраў ад 28.02.2014 — яны вызначаюць кошты на газ для насельніцтва. Які кошт яны зробяць, такі і будзе ў 2015 годзе».

Падобным жа чынам адказваюць і эканамісты-энэргетыкі.

Калі зыходзіць з таго, што насельніцтва аплачвае камуналку толькі ў памеры 28 адсоткаў, то кошты газу і электраэнэргіі павінны падняцца ў наступным годзе прыкладна ў 3 разы.

Гомельская пэнсіянэрка Галіна кажа, што не гатовая да такога пад’ёму коштаў зь цяперашнім узроўнем пэнсіі:

«З гэтай пэнсіі мы ня зможам аплочваць усе гэтыя камунальныя паслугі — газ, электрасьвятло. Мы ня зможам. Ну ня з двух жа мільёнаў плаціць сто працэнтаў?! У мяне пэнсія 2 мільёны 400 тысяч. Павяліч плацяжы — а што на харчаваньне застанецца? На хлеб і на соль? Бо на малако ўжо ня хопіць».

Гараджанін Уладзімер, які жыве ў двухпакаёўцы, атрымлівае пэнсію і на дадатак падпрацоўвае, не палохаецца павышэньня коштаў газу і электраэнэргіі:

«У мяне службовае жытло. За газ, электраэнэргію я плачу па дзяржаўным кошце. Гэтаксама і за тэхабслугоўваньне. Калі, дапусьцім, камуналка будзе каштаваць 600–700 тысяч, то для мяне гэта нармальна. Затое я ня буду хвалявацца, што мне адключаць газ ці электрычнасьць альбо ваду перакрыюць. Я прыйшоў — у мяне цёпленька, у мяне сьвятло, у мяне ўсё. За паслугі трэба плаціць».

Больш разважліва ставіцца да заяваў улады пра чарговае павелічэньне платы за камунальныя паслугі гамяльчук Леанід:
Мы за ўсё будзем плаціць 100 адсоткаў — толькі дайце нам на сто адсоткаў большыя пэнсіі і заробкі

«Арытмэтыка гэтая, натуральна, не падабаецца. Але трэба будзе паглядзець на ўзровень рэальных даходаў. Спадзяюся, што гэта будзе зьвязана з выраўноўваньнем даходаў. Дапусьцім, мне зараз сьвеціць невялікая пэнсія, і я яшчэ ня ведаю, як гэта адаб’ецца на ўзроўні жыцьця. Таму і заробкі, і пэнсіі — трэба ніжні парог паднімаць. Усё залежыць ад узроўню рэальных даходаў, і толькі ад гэтага. Прычым каб ня ў лічбах гэта выражалася, а ў якіх працэнтах. Дапусьцім, калі тая ж квартплата — хоць стоадсоткава, хоць меней — будзе „важыць“ у межах 20 адсоткаў ад рэальных даходаў, то гэта нармальна. Нават калі будзе камуналка і 25 адоткаў. Калі вышэй, то гэта ўжо ненармальна».

Жанчына ў гадах на ўсё захады ўлады павялічваць аплату камунальных плацяжоў рэагуе эмацыйна:

«Ну, калі стоадсоткава плаціць за газ, то дзе мы возьмем з двухмільённай пэнсіі сродкі, каб аплаціць на ўсе сто адсоткаў газ? За якія шышы? Мы за ўсё будзем плаціць 100 адсоткаў — толькі дайце нам на сто адсоткаў большыя пэнсіі і заробкі».

Тым часам Міністэрства жыльлёва-камунальнай гаспадаркі, са свайго боку, прапануе насельніцтву раўнадолевы ўдзел у фінансаваньні капітальнага рамонту жыльлёвага фонду. Як сьцьвярджаюць камунальнікі, цяпер насельніцтва аплочвае такі рамонт нібыта толькі на траціну.
XS
SM
MD
LG