Лінкі ўнівэрсальнага доступу

Кіраўнік Чачні хоча, каб на яго наклалі санкцыі ЗША і Эўразьвязу


Рамзан Кадыраў

Рамзан Кадыраў

Кіраўнік Чачэнскай рэспублікі ў Расіі Рамзан Кадыраў заявіў, што не знэрвуецца, калі патрапіць у сьпіс для санкцый Эўразьвязу праз Украіну, паведамляе ў суботу расейскае агенцтва ІТАР-ТАСС.

Паводле яго слоў, ён, наадварот, пакрыўдзіцца, калі ў гэтым сьпісе не на першым месцы, і будзе рады трапіць ў яго разам з «годнымі павагі людзьмі, якія стаяць на варце інтарэсаў сваёй краіны».

«Бандэраўцы забіваюць ні ў чым не вінаватых людзей, а Эўропа і ЗША прымаюць у сябе галоўных тэрарыстаў. Поўнае свавольле. А ў нас моцная дзяржава, і ніякімі санкцыямі і пагрозамі яны не даб’юцца таго, што яны зьдзейсьнілі ў іншых краінах. Мы стаім на абароне сваёй Радзімы», — прыводзіць агенцтва словы Кадырава.

Эўрапейскі зьвяз, як і Злучаныя Штаты Амэрыкі, заяўляў, што, калі Расея не даб’ецца ад прарасейскіх уладаў Крыму адмены прызначанага на нядзелю «рэфэрэндуму» аб уступе паўвострава ў яе склад, ужо ў панядзелак будуць уведзеныя пэрсанальныя санкцыі супраць шэрагу расейскіх і крымскіх чыноўнікаў, а ў выпадку далейшага абвастрэньня сытуацыі наступяць і эканамічныя санкцыі супраць Расеі. У заходняй і расейскай прэсе зьяўляліся розныя спэкуляцыі адносна таго, хто менавіта трапіць у сьпіс для гэтых санкцыяў.

Рамзан Кадыраў кіруе Чачэнія з 2007 года, па словах крытыкаў, як аднаасобны дыктатар, непрымірымы да любой праявы нязгоды. Яго ўлада падпадае пад пастаянную крытыку праваабаронцаў з-за парушэньняў правоў чалавека, у тым ліку забойстваў, выкраданьняў або катаваньняў яго праціўнікаў. Рамзан Кадыраў таксама вядомы сваім дэманстратыўна падхалімскім стаўленьнем да цэнтральнай улады Расеі, асабліва да яе прэзыдэнта Ўладзіміра Пуціна.

Паказаць камэнтары

XS
SM
MD
LG