Лінкі ўнівэрсальнага доступу

Падазраваны ўдзельнік віленскіх падзеяў 1991-га можа атрымаць пажыцьцёвае


Літоўцы спрабуюць спыніць савецкі танк перад Віленскай тэлевежай, 1991 год

Віленскі суд арыштаваў на два месяцы грамадзяніна Расеі Юрыя Мэла, падазраванага ў справе аб падзеях 13 студзеня 1991 году ў Вільні.

Пракуратура Літвы падазрае Мэла ў тым, што ён удзельнічаў у штурме Віленскай тэлевежы савецкімі войскамі ў 1991 годзе.

У той час Мэл служыў у Паўночным гарадку ў Вільні.

Расейца затрымалі ў сераду ўвечары на памежным пункце ў Панямуні на мяжы з Калінінградзкай вобласьцю Расеі.

Мэл абвінавачваецца ў злачынствах супраць чалавечнасьці і ваенных злачынствах. Яму пагражае пажыцьцёвае зьняволеньне.

Пракурор Гінтаўтас Пашкявічус кажа, што Мэл быў у адным з танкаў, калі савецкія вайскоўцы штурмавалі Віленскую тэлевежу, адзначае BNS.

«У адпаведнасьці з фабулай падазрэньня запісана, што было зроблена тры стрэлы. Я пра гэта нічога не ведаю. Яшчэ не давялося зь ім пагаварыць пра гэта, пра сутнасьць падазрэньняў (...) Ён тут служыў у 1991 годзе падчас студзеньскіх падзеяў, ён там удзельнічаў, магчыма, і каля тэлевежы», — у сваю чаргу, заявіў Анатолюс Сьвіла, адвакат Мэла.

У дасудовым расьсьледаваньні студзеньскіх падзеяў 1991 году падазраванымі прызнаныя 79 грамадзянаў Расеі, Украіны і Беларусі, на іх арышт выдадзеныя эўрапейскія ордэры.

Пры спробе штурму савецкімі вайскоўцамі ў ноч на 13 студзеня 1991 году тэлевежы ў Вільні загінулі 14 чалавек.
XS
SM
MD
LG