Лінкі ўнівэрсальнага доступу

Адэсіт: Прыйдуць расейскія войскі — пайду ў катакомбы


Самаабарона адэскага антымайдану. Фота: Зьміцер Галко

Самаабарона адэскага антымайдану. Фота: Зьміцер Галко

У Адэсе, ва Ўкраіне, знаходзіцца беларускі журналіст, карэспандэнт незалежнай газэты «Новы час» Зьміцер Галко.

Зьміцер Галко: Адэса — горад пераважна дробных прадпрымальнікаў, якія найперш зацікаўленыя сваім бізнэсам. Вельмі часта я чуў, як людзі кажуць: «Калі да нас прыйдуць нешта забіраць, возьмемся за вілы». Але людзі не ўсьведамляюць, што іх не папярэдзяць, як прыйдуць, і вілаў, тыя, хто прыйдуць, таксама не баяцца. Але пры гэтым настрой тут жартаўлівы, як звычайна ў Адэсе, і даволі спакойны. Учора я быў на так званым Антымайдане і быў вельмі зьдзіўлены, бо гэта быў бадай самы неадэкватны Майдан з тых, якія я пасьпеў пабачыць. Значна больш неадэкватны, чым у Данецку. Там быў чалавек, які мае прапанову, якая, на яго думку, вырашыць увесь канфлікт — адабраць ва ўкраінцаў права карыстацца расейскімі літарамі і нават гукамі. Апроч таго, у іх маніфэсьце напісана, што ў выпадку разгону мітынгу ці ўжываньня сілы, Расея павінна і ўвядзе войскі для іх абароны. Гэтыя людзі канкрэтна стаяць, нягледзячы на тое, што яны прыкрываюцца фразамі пра рэфэрэндум, дзеля таго, каб прыцягваць сюды расейскія войскі.


Ганна Соўсь: Якая моўная сытуацыя ў горадзе цяпер?

Зьміцер Галко, журналіст, блогер

Зьміцер Галко, журналіст, блогер

Галко: Тут шмат людзей гаворыць па-украінску. Сытуацыя, калі адзін гаворыць па-украінску, а яму адказваюць па-расейску, не выклікае ніякіх канфліктаў у горадзе. Тут паболей украінамоўных чым у Данецку, і канфліктаў на гэтай глебе няма.

Соўсь: Вы толькі вярнуліся з Данецку. З вашых уражаньняў, ці былі там перадумовы для таго, што адбылося ўчора?

Галко: Для мяне тое, што адбылося, было шокам, як і для мясцовых жыхароў. Усе яны гэты горад апісвалі найперш як вельмі спакойны. І сапраўды, я бачыў спакойны горад. І нават такія бяскроўныя спробы справакаваць сытуацыю 9 сакавіка падчас мітынгу выклікалі непаразуменьне і незадаволенасьць нават ва ўдзельнікаў прарасейскага мітынгу. Сьцягі зрываць, у машыну плюнуць — гэты былі бяззубыя спробы. Я бачыў відэа бойкі. Там быў вельмі агрэсіўны, п’яны натоўп. Я ня бачыў такіх людзей, калі быў у Данецку.

Соўсь: У Адэсе агрэсія не адчуваецца?

Галко: Не, гэта эўрапейскі разьняволены горад. У хостэле, дзе я жыву, супрацоўнік, карэнны адэсіт, інтэлектуал, кажа: «Калі прыйдуць расейскія войскі, то пайду ў катакомбы, буду ладзіць дывэрсіі». Хаця і вельмі пашыраныя настроі проста зьяжджаць з Украіны...
  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

Паказаць камэнтары

XS
SM
MD
LG