Лінкі ўнівэрсальнага доступу

Амэрыканская кампанія «Гербалайф» паведаміла, што Фэдэральная гандлёвая камісія ЗША пачала расьсьледаваньне яе дзейнасьці. Гэтая навіна адразу прывяла да падзеньня акцыяй кампаніі на біржы больш чым на 15%.

Інвэстар-мільярдэр Уільям Акман ужо на працягу некалькіх месяцаў заклікаў рэгулятараў расьсьледаваць мадэль разьмеркаваньня «Гербалайфам» прыбытку. Акман назваў кампанію «фінансавай пірамідай», у якой «Гербалайф» робіць вялікую частку сваіх грошай за кошт прыцягненьня новых дыстрыб’ютараў, а не за кошт продажу прадукцыі рэальным кліентам.

Кампанія «Гербалайф», якая адмаўляе абвінавачаньні ў працы паводле схемы піраміды, заявіла, што «будзе цалкам супрацоўнічаць з Фэдэральнай гандлёвай камісіяй ЗША».

«Гербалайф вітае гэты запыт, улічваючы велізарную колькасьць дэзінфармацыі на рынку,» — гаворыцца ў заяве кампаніі. «Мы ўпэўненыя, што „Гербалайф“ дзейнічае ў адпаведнасьці з усімі законамі і правіламі.»

Уладальнік хэдж-фонду памерам 12 мільярдаў даляраў Акман у 2012 годзе ўклаў у акцыі «Гербалайфу» 1 мільярд 160 мільёнаў даляраў. Цяпер ён спрабуе дамагчыся закрыцьця кампаніі, паколькі яна скажае інфармацыю аб продажах і прадае свой прадукт па завышаных цэнах, піша сёньня «Financial Post».
XS
SM
MD
LG