08:28
10.3.2014
Спыненьне трансьляцыі ўкраінскіх каналаў тлумачаць тэхнічнымі збоямі
«Мы ведаем пра праблему, якая ўзьнікла, яна, паводле папярэдняй інфармацыі, выкліканая тэхнічнымі непаладкамі. Ніхто ніякіх каналаў ня адключаў. Каб высьветліць прычыну, патрабуецца пэўны час. Мы высьветлім, з чым зьвязаныя збоі, і трансьляцыя будзе адноўлена», — заявіла віцэ-прэм’ер ураду Крымскай аўтаноміі Вольга Кавіцідзі.
Яна кажа, што ў Сэвастопалі «ўсе каналы ўкраінскага тэлебачаньня працуюць спраўна».
Раней украінскія СМІ паведамлялі , што ў Крыму было спынена вяшчаньне шэрагу ўкраінскіх тэлеканалаў, перадае ВВС.
08:40
10.3.2014
Пракуратура Ўкраіны пачала расьсьледаваць факты захопу вайсковых частак
Пра гэта ЎНІАН паведамілі ў прэсавай службе Генэральнай пракуратуры Ўкраіны.
Пракуратура расьсьледуе факт пранікненьня на тэрыторыю вайсковай часткі 2161. Справа заведзеная паводле крымінальнага артыкулу «дывэрсія».
«Каля 40 невядомых узброеных патрапілі ў адміністрацыйны будынак, дзе заблякавалі службовых асобаў (...) невядомыя пашкодзілі спадарожнікавую сувязь, чым зрабілі немагчымым выкананьне службовымі асобамі сваіх абавязкаў па ахове дзяржаўнай мяжы Украіны», — гаворыцца ў паведамленьні пракуратуры Ўкраіны.
Пракуратура таксама расьсьледуе факт захопу аддзелу «Шчолкіна» памежнай службы Сімфэропальскага памежнага атраду. У дадзеным выпадку справа заведзеная паводле крымінальнага артыкулу «захоп дзяржаўных або грамадзкіх будынкаў або пабудоваў».
10:44
10.3.2014
Рэфэрэндум у Крыму можа каштаваць да 2 мільёнаў даляраў ЗША
Рэфэрэндум пра статус Крыму можа абыйсьціся ў 1,5-2 мільёны даляраў, заявіў Інтэрфаксу першы віцэ-прэм’ер ураду аўтаноміі Рустам Тэміргаліеў.
«Нягледзячы блякаваньне рахункаў крымскага падразьдзяленьня Дзяржаўнага казначэйства, мы пасьпелі перавесьці сродкі для правядзеньня рэфэрэндуму на іншыя рахункі. Пакуль рана казаць пра канкрэтны кошт, аднак прыкладна мы разьлічваем на 10–20 мільёнаў грыўняў, гэта 1,5-2 мільёна даляраў ЗША», — сказаў Тэміргаліеў.
Рэфэрэндум пра статус Крыму прызначаны на 16 сакавіка. Украінскія ўлады, ЗША, Эўразьвяз і іншыя краіны і міжнародныя арганізацыі не прызнаюць яго легальным. Ён адбываецца ва ўмовах расейскай акупацыі Крыма.
14:38
10.3.2014
У Харкаве прыхільнікі Расеі закідалі Клічко яйкамі і пэтардамі
Хуліганы не патрапілі — ахоўнікі палітыка прыкрылі яго парасонамі.
У Харкаве прарасейскія актывісты закідалі яйкамі і пэтардамі лідэра фракцыі «УДАР» Віталя Клічко, які прымаў удзел у мітынгу Эўрамайдана.
Як перадае УНІАН, пры гэтым ні яйкі, ні пэтарды ў самога Клічко не патрапілі.
14:40
10.3.2014
Радыкалы захапілі вайсковы шпіталь у Сімфэропалі
Каля 20 агрэсіўна настроеных грамадзян так званай «народнай самаабароны Крыму» уварваліся на тэрыторыю вайсковага шпіталя ў Сімфэропалі.
Пра гэта паведамляе прэсавая служба Мінабароны Ўкраіны.
Начальніка Сімфэропальскага вайсковага шпіталя невядомыя вывялі за тэрыторыю мэдыцынскай установы і не дапускаюць на працоўнае месца. Камандаваньне і ўвесь мэдыцынскі пэрсанал заблякаваныя ў памяшканьні клюба.
Цяпер у шпіталі на лячэньні знаходзіцца больш за 20 цяжкахворых, адзін зь якіх — у рэанімацыі. Лекары ня могуць даць пацыентам неабходную мэдыцынскую дапамогу.
14:53
10.3.2014
У Луганску затрымалі лідэра прарасейскіх сэпаратыстаў Клінчаева
Допыт правёў народны дэпутат Украіны Алег Ляшко.
14:54
10.3.2014
«Да сустрэчы пасьля вайны!» — латыская актрыса расейскаму тэатру
Латыская актрыса Гуна Зарыня адмовілася выконваць галоўную ролю ў спэктаклі «Мэдэя» ў маскоўскім «Гогаль-цэнтры» на знак пратэсту «супраць уводу расейскіх войскаў на тэрыторыю Ўкраіны і ўмяшаньня ва ўнутраныя справы сувэрэннай краіны», — паведамляе Lenta.ru.
«Музы маўчаць. Да сустрэчы пасьля вайны!» — напісала Зарыня ў лісьце да кіраўніцтва тэатру.
14:55
10.3.2014
ЗША не прызнаюць ніякіх вынікаў крымскага рэфэрэндуму
Пра гэта заявіў амбасадар ЗША ва Ўкраіне Джэфры Пает:
"ЗША не гатовыя прызнаваць якія б там ні было вынікі так званага рэфэрэндуму, які зьбіраюцца правесьці праз шэсьць дзён", -- сказаў амбасадар Пает на прэсавай канфэрэнцыі ў Кіеве.
ЗША, паводле ягоных слоў, працягваюць лічыць Крымскі паўвостраў часткай Украіны .
Рэфэрэндум у Крыме з мэтай далучэньня да Расеі прызначаны на 16 сакавіка.
Цэнтральныя ўлады Ўкраіны і міжнародная супольнасьць заявілі аб незаконнасьці рэфэрэндуму. Акрамя таго, украінскія суды спынілі рашэньне аб правядзеньні рэфэрэндуму ў Крыме.
17:06
10.3.2014
Яцанюк выступіць на Радзе бясьпекі ААН
Прэм’ер-міністар Украіны Арсені Яцанюк 13 сакавіка мае намер выступіць на пасяджэньні Рады бясьпекі ААН, дзе будзе разглядацца пытаньне ўрэгуляваньня сытуацыі ва Ўкраіне.Як заявіў Яцанюк сёньня ў Кіеве, ёсьць усе магчымасьці для мірнага ўрэгуляваньня сытуацыі ва Ўкраіне. Пры гэтым ён дадаў, што гэта не двухбаковы канфлікт Украіны і Расеі.
«Палітыка Расеі накіраваная на падрыў асноваў глябальнай бясьпекі і перагляд вынікаў Другой усясьветнай вайны», — адзначыў ён. Прэм’ер дадаў, што Ўкраіна будзе ўсімі спосабамі аберагаць сваю тэрытарыяльную цэласнасьць і незалежнасьць.