Лінкі ўнівэрсальнага доступу

logo-print

«Пагоню» ў Расеі прыраўнялі да «экстрэмісцка-нацысцкай сымболікі»


Расейская сацыяльная сетка «Вконтакте» ўгледзела ў нацыянальным гербе «Пагоня» прыкметы «экстрэмізму». Пра гэта паведамілі распрацоўніку тэматычнага дадатку да Дня Волі гарадзенцу Кастусю Новікаву.

Адміністрацыя «Вконтакте» заблякавала інтэрнэт-праграму Кастуся Новікава, распрацаваную адмыслова да сьвяткаваньня Дня Волі. За мэту спадар Новікаў ставіў сабраць у сваёй суполцы ня менш як 10 тысяч беларусаў, каб апэратыўна інфармаваць патэнцыйных удзельнікаў пра падзеі, якія будуць праходзіць 25 сакавіка ў розных месцах краіны.

Як паведаміў Кастусь Новікаў, пасьля распрацоўкі праграмы ён накіраваў яе на мадэрацыю, каб яе ўключылі ў агульны каталёг дадаткаў. Аднак атрыманы адказ яго ашаламіў. Спаслаўшыся на ўнутраныя правілы, адміністрацыя падмацавала сваю пазыцыю нормамі расейскага заканадаўства:

«Вам адмоўлена ў разьмяшчэньні дадаткаў ў сувязі з парушэньнем артыкула 20.3 Кодэксу аб адміністрацыйных правапарушэньнях Расейскай Фэдэрацыі «Прапаганда і публічнае дэманстраваньне нацысцкай атрыбутыкі ці сымболікі, альбо публічнае дэманстраваньне атрыбутыкі ці сымболікі экстрэмісцкіх арганізацый».

На думку спадара Новікава, выглядае, што прыкметы «экстрэмізму, замешанага на нацызьме», мадэратары ўгледзелі ў нацыянальным беларускім гербе «Пагоня» і бел-чырвона-белым сьцягу, бо іншыя «забароненыя атрыбуты» на старонцы не фігуравалі.

З-за таго, што старонка ў гонар Дня Волі ня ўключаная ў агульны каталёг, яна недаступная ў агульным пошуку і наведнікі ня маюць магчымасьці запрашаць сяброў да абмеркаваньня зададзенай тэмы. Да ўдзельнікаў Кастусь Новікаў зьвяртаўся з прапановай: «Абярыце разам са сваімі сябрамі: дзе вы будзеце сьвяткаваць Дзень Волі-2014? Сьвяткуем Разам!» І называліся адрасы: Кастрычніцкая плошча, плошча Незалежнасьці, плошча Якуба Коласа, плошча Бангалор, Нацыянальная бібліятэка. Распрацоўнік не выключае, што якраз гэты пералік і спрычыніўся да блякаваньня ягонай праграмы.

Доктар гістарычных навук Алесь Смалянчук, звольнены з Гарадзенскага дзяржаўнага ўнівэрсытэту з ідэалягічных прычынаў, лічыць, што ўніфікацыя нормаў у межах так званай саюзнай дзяржавы тычыцца перадусім ідэалягічнага складніку — беларусы, як і тыя ж украінцы, могуць быць патрыётамі толькі Расеі, усё астатняе трактуецца як экстрэмізм і фашызм:

Алесь Смалянчук

Алесь Смалянчук

«Думаю, што адпаведную інфармацыю ў Расеі атрымліваюць ад беларускай адміністрацыі, ад беларускіх спэцслужбаў. Яна, зразумела, не адпавядае гістарычнай рэчаіснасьці, але гэта падстава, каб дзейнічаць у абсалютна аднолькавым ключы. Зрэшты, было б дзіўна, каб было наадварот... Хоць, як я разумею, „Вконтакте“ — гэта не дзяржаўная кампанія, прыватны праект, таму, вядома, такая рэакцыя кіраўнікоў, уладальнікаў, мякка кажучы, зьдзіўляе.

Дарэчы, я недзе прачытаў, што 60% расейцаў падтрымліваюць вайсковую апэрацыю, а фактычна пуцінскую агрэсію супраць Украіны, так што тут усё лягічна. Усё тая ж прага да імпэрскасьці, асабліва сярод былых савецкіх грамадзянаў. Здаецца, ці не міністар замежных спраў Расеі зьвярнуўся да расейцаў, заявіўшы: калі вы патрыёты, то вы нас падтрымаеце. То бок расеец можа быць патрыётам, а ўкраінскі патрыёт у разуменьні Расеі аўтаматычна становіцца „бандэраўцам“. Нешта падобнае з гледзішча рускага чалавека адбываецца і ў адносінах да Беларусі: маўляў, беларус можа быць толькі расейскім патрыётам, а калі ён за сваю краіну — гэта ўжо фашызм».

На пачатку тыдня на патрабаваньне расейскага ведамства «Роскомнадзор» «Вконтакте» было заблякавана блізу паўтара дзясятка суполак, прысьвечаных акцыям пратэсту на кіеўскім Майдане і падзеям у Крыме. У прыватнасьці, на тэрыторыі Расеі не адчыняюцца старонкі «Ўкраінская рэвалюцыя/Эўрамайдан», колькасьць падпісчыкаў ягой перасягнула паўмільёна, «Правы сэктар» (400 тысяч удзельнікаў), «Рэвалюцыя/Эўрамайдан/Правы сэктар» (350 тысяч сяброў).

У сацыяльнай сетцы ВКонтакте неаднойчы блякаваліся і беларускія суполкі, западозраныя ў неляяльнасьці да ўладаў. Ня раз прыпынялася праца групы «Рэвалюцыя праз сацыяльныя сеткі», якая ініцыявала рэзанансныя «маўклівыя акцыі», ініцыятывы аўтааматараў у рамках кампаній «Стоп-бэнзін» і «Стоп-падатак», адрасныя групоўкі кшталту «Надакучыў нам гэты Лукашэнка!», «Толькі ШОС!», «Ляпіс Трубяцкі — бясплатны канцэрт у Менску» і г.д. Напярэдадні палітычных акцыяў і шэсьцяў апазыцыі ўзьнікаюць праблемы з доступам на тэматычныя старонкі. Часта стварэньне той ці іншай суполкі спэцслужбы выкарыстоўваюць як падставу для затрыманьня яе стваральнікаў за розныя «антыдзяржаўныя заклікі».

Паказаць камэнтары

XS
SM
MD
LG