Лінкі ўнівэрсальнага доступу

«У апошнія некалькі дзён мы з вамі назіраем драматычныя падзеі, якія зусім нядаўна нават не маглі сабе ўявіць — Расейская Фэдэрацыя распачала вайсковую агрэсію супраць Украіны. Расея парушыла мір у нашым рэгіёне, які існаваў дзесяцігодзьдзямі.

Рэжым Уладзімера Пуціна паставіў пад пагрозу жыцьці як грамадзянаў незалежнай Украіны, так і грамадзянаў Расеі выключна дзеля ажыцьцяўленьня вар’яцкіх плянаў пашырэньня межаў сваёй улады. Напад на Ўкраіну суправаджаецца той жа рыторыкай, зь якой Гітлер ажыцьцяўляў аншлюс Аўстрыі і захоп Чэхаславаччыны ў 1938 годзе.

Разам з вайсковай агрэсіяй Расея распачала супраць Украіны нечуваную ў сваёй подласьці і цынізьме інфармацыйную вайну. Дзяржаўныя і блізкія да Крамля расейскія СМІ распаўсюджваюць цалкам хлусьлівыя зьвесткі пра падзеі ва Ўкраіне, распальваюць антыўкраінскую гістэрыю», — паведамляецца ў звароце.

Як зазначае Партыя БНФ, для сваёй агрэсіі «Расея выбрала момант, калі ўкраінская нацыя і ўкраінская дзяржава шмат сілаў і рэсурсаў павінны аддаваць на перабудову сваёй дзяржаўнай сыстэмы пасьля цяжкога ўнутранага палітычнага супрацьстаяньня»:

«Момант, калі краіна, аслабленая гадамі нечуванай карупцыі былога найвышэйшага кіраўніцтва дзяржавы, толькі пачынае будаваць новую, празрыстую для грамадзянаў сыстэму ўлады. Момант, калі былы прэзыдэнт уцёк з краіны і абвешчаныя датэрміновыя прэзыдэнцкія выбары. Удар нанесены ў момант, калі грамадзяне Ўкраіны — украінцы, расейцы, беларусы ды іншыя — адстаялі сваё права і годнасьць звацца людзьмі, адстаялі шанец пабудаваць новую, сапраўды дэмакратычную, адкрытую, вольную і заможную Ўкраіну.

Але спадзяваньні Крамля правесьці ва Ўкраіне імклівы бліцкрыг ня спраўджваюцца. Украінскія вайскоўцы ў Крыме не здаюцца расейскім акупацыйным войскам і захоўваюць вернасьць прысязе. Украінскія грамадзяне розных нацыянальнасьцяў дэманструюць салідарнасьць і цьвёрдую волю захаваць свабоду, незалежнасьць і тэрытарыяльную цэласнасьць сваёй краіны. Увесь вольны сьвет салідарны з народам Украіны. Шматтысячныя мітынгі ў падтрымку Ўкраіны адбываюцца ад Эстоніі да Канады.

Мы, беларусы, павінны сёньня падтрымаць нашых братоў украінцаў у гэты цяжкі і драматычны час. Наша салідарнасьць з братнім народам Украіны можа дапамагчы спыніць агрэсію, можа дапамагчы выстаяць».

БНФ заклікае беларусаў выказаць падтрымку ўсім сваім знаёмым ва Ўкраіне, накіраваць у амбасаду Ўкраіны ў Менску ліст з выказваньнем падтрымкі народу Ўкраіны, незалежнасьці і тэрытарыяльнай цэласнасьці ўкраінскай дзяржавы, накіраваць у амбасаду Расеі ў Менску ліст з патрабаваньнем неадкладна спыніць агрэсію і вывесьці ўсе расейскія войскі з тэрыторыі Ўкраіны, цалкам байкатаваць любыя тавары расейскай вытворчасьці і расейскія аўтазапраўкі, тэлеканалы, насіць на вопратцы стужкі колераў украінскага сьцяга, праводзіць размовы зь як мага шырэйшым колам сваякоў, сяброў, знаёмых, калегаў па працы, распаўсюджваць праўдзівую інфармацыю пра падзеі ва Ўкраіне.

Паказаць камэнтары

XS
SM
MD
LG