Расейскія вайскоўцы кантралююць аэрапорт у Сэвастопалі

У Крыме збройнае ўварваньне Расеі — МУС Украіны

Спэцназ расейскага ГРУ захапіў дзяржаўнае прадпрыемства «Крымаэрорух»

Узброеныя вайскоўцы заблякавалі працу дзяржаўнага прадпрыемства «Крымаэрорух», якое забясьпечвае авіяцыйную навігацыю над тэрыторыяй паўвострава.

З вайсковых крыніц карэспандэнту Радыё Свабода стала вядома, што аэрапорт блякуюць не вайскоўцы Чарнаморскага флёту, але байцы спэцпадразьдзяленьняў Галоўнага разьведвальнага ўпраўленьня Ўзброеных сіл Расейскай Федэрацыі, якія прыбылі ў Крым з тэрыторыі Расеі. Іх самалёт прызямліўся на вайсковым аэрадроме Чарнаморскага флёта ў пасёлку Гвардзейскае.

Сёньня міністар унутраных спраў Украіны Арсэн Авакаў паведаміў аб захопе расейскімі вайскоўцамі аэрапортаў Сімферопаля і Сэвастопаля (Бэльбек). Ён назваў гэта актам агрэсіі і ваеннага ўварваньня.

Вярхоўная Рада зьвярнулася да краін-гарантаў

Вярхоўная Рада зьвярнулася да краін, якія паводле Будапэшцкага мэмарандуму 1994 году зьяўляецца гарантамі тэрытарыяльнай цэласнасьці Ўкраіны. Гэты зварот падтрымалі 246 дэпутатаў.

Парлямэнт Украіны нагадвае, што «ў абмен на ядзернае раззбраеньне Ўкраіна атрымала гарантыі сваёй бясьпекі».

«Расейская Фэдэрацыя, Злучанае Каралеўства Вялікабрытаніі і Паўночнай Ірляндыі, Злучаныя Штаты Амэрыкі ў Будапэшцкім мэмарандуме пацьвердзілі Ўкраіне свае абавязаньні ў адпаведнасьці з прынцыпамі Заключнага акту Нарады па бясьпецы і супрацоўніцтве ў Эўропе паважаць незалежнасьць і сувэрэнітэт і існуючыя межы Ўкраіны», — адзначае Вярхоўная Рада.

«У гэтай сувязі Вярхоўная Рада Ўкраіны выказвае занепакоенасьць апошнімі падзеямі ў Аўтаномнай Рэспубліцы Крым, у тым ліку інфармацыяй пра магчымае зьнешняе ўмяшаньне, што стала б прамым парушэньнем абавязаньняў паводле мэмарандуму», — гаворыцца ў звароце парлямэнту.

Украінскі парлямэнт просіць Раду бясьпекі ААН разгледзець сытуацыю ў Крыме. За адпаведную пастанову прагаласавалі 230 народных дэпутатаў.

«Вярхоўная Рада патрабуе ад Расейскай Фэдэрацыі спыніць крокі , якія маюць прыкметы замахаў на дзяржаўны сувэрэнітэт і тэрытарыяльную цэласьць Украіны, у тым ліку адмовіцца ад падтрымкі сэпаратызму ва Ўкраіне ў любой форме. Са свайго боку , Вярхоўная Рада Ўкраіны адзначае , што ўсе грамадзянскія правы грамадзян Украіны расейскай нацыянальнасьці, гарантаваныя Канстытуцыяй Украіны і міжнароднымі абавязаньнямі Ўкраіны , у тым ліку моўныя, ёсьць і будуць у далейшым цалкам і няўхільна захаваныя ва Ўкраіне», — гаворыцца ў звароце .

У Севастопалі прызямліліся 8 вайсковых верталётаў з Расеі


У Севастопалі раніцай 28 лютага прызямліліся 8 вайсковых верталётаў з Анапы, паведамляе ZN.ua са спасылкай на неназваную крыніцу.

Крыніца не выключыла, што на адным зь верталётаў у горад мог прыбыць беглы прэзыдэнт Віктар Януковіч.

Лідэр мэджлісу крымскататарскага народу Рэфат Чубараў пацьвердзіў інфармацыю аб прыбыцьці ў Крым васьмі расейскіх верталётаў. Паводле словаў Чубарава, інфармацыя аб знаходжаньні на борце аднаго зь верталётаў Януковіча пакуль не пацьверджана і ў дадзены момант правяраецца.

У Крыме ракетны катэр ЧФ РФ заблякаваў выхад украінскай памежным караблям

Пра гэта інфармуе ўкраінскае інфармацыйнае агенцтва УНІАН.

Ракетны катэр ЧФ РФ сёньня раніцай падышоў на зьнешні рэйд Балаклаўскай бухты пад Севастопалем, чым фактычна заблякаваў выхад з бухты ў мора караблям і катэрам брыгады дзяржаўнай памежнай службы Ўкраіны.

Аб гэтым карэспандэнту УНІАН паведаміла інфармаваная крыніца ў Севастопалі, набліжаная да ўкраінскіх марскіх памежнікаў.

Акрамя таго, на вуліцах Севастопаля зьявіўся яшчэ адзін бронетранспартэр марской пяхоты ЧФ РФ – на плошчы Ўшакова, ля будынка Матроскага клюбу ЧФ РФ.

У Інтэрнэце заклікаюць украінскіх актывістаў ехаць у Крым

У бок аэрапорта Бельбек пад Сэвастопалем праляцелі некалькі гэлікоптэраў. Каму яны належаць, пакуль невядома

Уладзімір Пуцін даручыў ураду працаваць над пытаньнем аб гуманітарнай дапамозе жыхарам Крыму.

Узброеныя людзі ў аэрапортах Крыма

МЗС Беларусі: Самае важнае — захаваць тэрытарыяльную цэласнасьць Украіны

Міністар замежных спраў Беларусі Ўладзімер Макей заявіў, што на тэрыторыі краіны няма прыхільнікаў Віктара Януковіча, якія пакінулі Ўкраіну.

«Наколькі мне вядома, прыхільнікаў Януковіча на нашай тэрыторыі няма», — цытуе прэс-служба МЗС Беларусі Ўладзімера Макея па выніках сустрэчы зь міністрам замежных спраў Латвіі Эдгарсам Рынкевічсам у Рызе.Наконт магчымасьці даць паплечнікам Януковіча палітычны прытулак у Беларусі ён сказаў: «Да нас ніхто па палітычны прытулак не зьвяртаўся».

Генэральная пракуратура Ўкраіны паставіць пытаньне аб экстрадыцыі Віктара Януковіча, калі будзе афіцыйнае пацьверджаньне інфармацыі пра яго знаходжаньне на тэрыторыі Расеі. Пра гэта гаворыцца ў паведамленьні Генпракуратуры на яе сайце.

Месца правядзеньня прэс-канфэрэнцыі экс-прэзыдэнта Ўкраіны Віктара Януковіча ў Растове-на-Доне – выставачны цэнтар “ВертолЭкспо” – ачэплена паліцыяй. Як перадае УНІАН, узмоцнены меры бясьпекі, плошча перад будынкам абгароджана мэталічнай агароджай. У журналістаў пільна аглядаюць асабістыя рэчы.

Памежнікі Ўкраіны: Расейскія вайскоўцы спрабавалі заблякаваць Севастопальскі атрад

Ля Севастопальскага атраду марской аховы знаходзяцца вайскоўцы Расеі, паведамілі УНІАН у Дзяржаўнай памежнай службе Ўкраіны.

Раніцай 28 лютага адбылася спроба блякаваньня Севастопальскага атраду марской аховы Дзяржаўнай памежнай службы Ўкраіны.

Каля 30 узброеных чалавек на чатырох аўтамабілях прыбылі да месца дысьлякацыі Севастопальскага атраду марской аховы, разьмясьціліся перад КПП і атачылі ўсе падыходы.

Пазьней да КПП прыбыў кіраўнік групы расейскіх вайскоўцаў капітан 1 рангу Аляксандар Талмачоў. Ён загадаў, каб ніхто не пакідаў частку. Талмачоў сказаў, што расейскія вайскоўцы выконваюць патрабаваньні пастановы Савету бясьпекі Крыму — не дапусьціць захопу зброі экстрэмістамі.

Пасьля перамоваў з камандзірам атраду, расейскія вайскоўцы адышлі на 25 мэтраў ад КПП і вядуць назіраньне.

Ждём-с. pic.twitter.com/lzNnn98niz

— Владимир Варфоломеев (@Varfolomeev) February 28, 2014

У нядзелю на кіеўскім Майдане адбудзецца веча «Ўкраіна і Крым — адзіныя!»

На Майдане Незалежнасьці ў Кіеве ў нядзелю, 2 сакавіка, адбудзецца чарговае народнае веча, прысьвечанае праблеме захаваньня тэрытарыяльнага адзінства Ўкраіны.

Міністар унутраных спраў Украіны Арсен Авакаў заявіў, што апошнія падзеі ў Крыме — гэта збройнае ўварваньне і акупацыя.

Вярхоўная Рада Ўкраіны заклікала склікаць пасяджэньне Рады бясьпекі ААН з-за сытуацыі ў Крыме.