Лінкі ўнівэрсальнага доступу

Выбух падчас здымкаў фільму «Авэль» на плошчы Незалежнасьці быў зусім не бутафорскі, ад яго магло пацярпець шмат людзей, сьцьвярджае Андрэй Курэйчык.

Драматург Андрэй Курэйчык у сацыяльных сетках апісаў падрабязнасьці падзеяў 1 лютага, калі ў салёне Mercedes Sprinter, які належыць здымачнай групе фільму «Авэль», здарыўся пажар.

Курэйчык спасылаецца на неназваных супрацоўнікаў здымачнай групы:

«Ждановіч (прадусар фільму — РС) вырашыў зэканоміць 80 даляраў на зьмене за транспарт. Ён у адзін Mercedes Sprinter загадаў складаць рэквізыт і «звалку». Там жа ляжалі балёны газу для цяплогарматаў. Наагул, для гэтага звычайна выкарыстоўваюць розныя машыны паводле правілаў тэхнікі бясьпекі. Было тры балёны. Адзін забралі і прымацавалі да цяплогарматы. Другі, мабыць, быў пусты. А вось трэці ледзь і ня стаў прычынай трагедыі. Рэквізыт, які на яго складзіраваўся, адкрыў вэнтыль. Акрамя Лазара, у бусе было яшчэ двое рабочых. Лазар адчуў пах газу і спыніў машыну. Што стала прычынай дэтанацыі — невядома, Лазар казаў, што ён не курыў, — піша Курэйчык.

«Дарэчы, гэтага няшчаснага ў выніку прымусілі падпісаць паперкі „аб неразгалошваньні“, каб ніхто нічога не даведаўся. Ох... Так і здымаем нацыянальнае кіно», — піша Курэйчык, дадаючы, што Лазара выпісалі «ўчора».

У інтэрвію Свабодзе Курэйчык пацьвердзіў, што сапраўды размаўляў з гэтымі людзьмі:

«Мне расказвалі пра Лазара, да яго ўчора пад’ехалі, і фактычна ён падпісаў гэтыя паперы».

Сяргей Ждановіч

Сяргей Ждановіч

Прадусар карціны Сяргей Ждановіч, у сваю чаргу, удакладніў у размове з карэспандэнтам Свабоды, што кіроўцу выпісалі «ў мінулы чацьвер»:

«Аляксандар Лазар сядзіць побач, мы камунікуем, працуем. У чым пытаньне?».

Пачуўшы просьбу пракамэнтаваць вэрсію Андрэя Курэйчыка, Ждановіч эмацыйна прамаўляе:

«Ведаеце, мы ўжо стаміліся ад гэтых вашых правакацыяў! Дайце нармальна папрацаваць! У нас усе жывыя-здаровыя, ідзе нармальны здымачны працэс. Што тычыцца неразгалошваньня: уся група падпісвае, як на любым камэрцыйным праекце. Гэта камэрцыйная таямніца праекту: хочам — узрываем, хочам — не, хочам — здымаем, хочам — не. Але вы ўсё адно ўсё перакруціце і зробіце ўсё па-свойму, Радыё Свабода. Пачытайце БелТА! Наша афіцыйная крыніца — БелТА! Там напісаная ўся афіцыйная інфармацыя, усё як ёсьць».
Але вы ўсё адно ўсё перакруціце і зробіце ўсё па-свойму, Радыё Свабода. Пачытайце БелТА!

Сам Аляксандар Лазар запэўніў Радыё Свабода, што «ніякай дадатковай падпіскі не даваў»:

«Здарыўся выбух. Я крыху пацярпеў. Гэта была мая памылка, выпадковасьць».

На просьбу распавесьці прычыны выбуху, а таксама падзяліцца вынікамі экспэртызы Лазар кажа:

«Экспэртызу рабілі кампэтэнтныя органы. У іх і пытайцеся. Я ня ведаю. Бо ў гэты час я быў у шпіталі. У мяне не засталося ніякіх сьлядоў. Пераломаў няма, і галава на месцы».

Размову Лазар сканчае просьбай: «Пажадана мяне не турбаваць».


Таямнічы выбух на плошчы Незалежнасьці


1 лютага каля 19-й гадзіны на пляцоўцы перад Домам ураду на плошчы Незалежнасьці ў Менску, каля ўезду ў паркінг гандлёвага дому «Сталіца», загарэўся і выбухнуў мікрааўтобус.

На месца пажару прыбылі ратавальнікі і хуткая дапамога. Аўтамабіль залілі пенай.

Ждановіч заявіў тады, што на гэты дзень было заплянавана здымаць бутафорскі выбух, ад якога загарэўся аўтамабіль. Зладзілі гэта ў той момант, калі побач не было мінакоў і цікаўных. Ніхто не пацярпеў.

Праўда, пазьней зьявілася інфармацыя, што выбух — гэта ня частка здымачнага працэсу, а здарэньне.


2 мільёны даляраў за «Авэля»


Фільм «Авэль» ствараецца на замову Міністэрства культуры прыватнай кінакампаніяй «Нонстоп Мэдыя». Аўтар сцэнару — расейскі драматург Раман Макушаў. Сюжэт расказвае пра варажнечу і замірэньне двух братоў — а-ля Каін і Авэль — на фоне палітычных падзеяў у Беларусі. Пры гэтым паваротным пунктам стане шматтысячная акцыя пратэсту ў Менску 19 сьнежня 2010 году.

Здымкі фінансуе Міністэрства культуры Беларусі. Кошт праекту — 2 мільёны даляраў.

Ваша меркаваньне

Паказаць камэнтары

XS
SM
MD
LG