Лінкі ўнівэрсальнага доступу

Апэляцыю Іны Соркінай не прынялі


Іна Соркіна

Іна Соркіна

Навуковая рада Гарадзенскага ўнівэрсытэту не падтрымала апэляцыі кандыдата гістарычных навук Іны Соркінай. Бліжэйшымі днямі спадарыню Соркіну звольняць.

Унівэрсытэцкая камісія па прававых і сацыяльных пытаньнях разгледзела напярэдадні яе заяву на імя рэктара Андрэя Караля. Іну Соркіну не пераабралі на пасаду дацэнта, што азначае звальненьне.

Яна прасіла правесьці конкурс паўторна. У сваёй заяве яна таксама напісала, што былі парушаны заканадаўча замацаваныя крытэры адбору кандыдатаў, а таксама некаторыя працэдурныя моманты. У прыватнасьці, паседжаньне катэдры прайшло без абмеркаваньня кандыдатур.

Камісія вырашыла, што няма падставаў праводзіць паўторна конкурс на пасаду дацэнта і выносіць гэтае пытаньне на паўторнае галасаваньне ўнівэрсытэцкай рады. Рада пагадзілася з высновамі камісіі большасьцю галасоў, устрымаўся толькі адзін чалавек.

Іна Соркіна мяркуе, не зважаючы на звальненьне, працягнуць сваю навуковую і пэдагагічную дзейнасьць, але працу давядзецца шукаць.

Раней з унівэрсытэту звольнілі двух выкладчыкаў-гісторыкаў. Адзін зь іх, прафэсар Вячаслаў Швед, так і не знайшоў новай працы.
XS
SM
MD
LG