Лінкі ўнівэрсальнага доступу

logo-print

Украінская апазыцыя выказалася за працяг перамоваў з уладай


Апазіцыйныя актывісты ў будынку Мінюсту

Апазіцыйныя актывісты ў будынку Мінюсту

Пратэстоўцы вызвалілі адзін з будынкаў Мінюсту Ўкраіны, захоплены мінулай ноччу.

Апазыцыя гатовая працягнуць перамовы для прадухіленьня далейшай эскаляцыі і кровапраліцьця, ўрэгуляваньня крызісу, захаваньня адзінства краіны, заявіў Штаб нацыянальнага супраціву.

У заяве адзначана, што такое рашэньне ўхваленае, «нягледзячы на курс уладаў на зрыў перамоваў і ўвядзеньне надзвычайнага становішча».

У Штабе падкрэсьлілі, што за апошнія суткі Майдан ў цэлым выконвае замірэньне і зацішша, але «цярпеньне разгневаных глухатой ўлады людзей можа перапыніцца ў любы момант», паведамляе «Інтэрфакс».

Разам з тым у заяве адзначаецца, што ўлада спрабуе сарваць перамовы шляхам абвінавачваньня апазыцыі ў захопе будынкаў Міністэрства юстыцыі.

«На дадзены момант у памяшканьні Міністэрства пратэстоўцы адсутнічаюць», — падкрэсьлілі ў Штабе.

У заяве адзначаецца, што на працягу апошніх сутак «праваахоўнікі сумесна з арганізаванымі бандфармаваньнямі-„цітушкамі“ з ужываньнем грубай сілы і зброі разагналі мірныя пратэсты грамадзян у Запарожжы, Днепрапятроўску, Чаркасах, Сумах»:

«Колькасьць пацярпелых складае сотні асоб. Так званыя праваахоўныя органы сумеснымі намаганьнямі з бандытамі працягваюць выкрадаць людзей .... Працягваюцца незаконныя масавыя арышты, аблавы, захопы закладнікаў. Не спыняецца перасьлед журналістаў і перашкода іх прафэсійнай дзейнасьці» , — падкрэсьлілі ў Штабе нацыянальнага супраціву.

Раней міністар юстыцыі Ўкраіны Алена Лукаш запатрабавала вызваліць будынак Міністэрства юстыцыі, захопленага актывістамі «Агульная справа», папярэдзіўшы пра магчымасьць увядзеньня надзвычайнага становішча.

Ваша меркаваньне

Паказаць камэнтары

XS
SM
MD
LG