Эўрарэвалюцыя перакінулася на ўсход Украіны. У Кіеве чакаюць разгону (УЖЫВУЮ)

Акцыя «Не страляйце ў журналістаў»

У Кіеве арганізаваная калёна з 50 журналістаў накіравалася ад гасьцініцы «Дняпро» да кардону ўнутраных войскаў на вуліцы Грушэўскага. Сярод іх пацярпелыя падчас сутыкненьняў на Грушэўскага. Як перадае УНІАН, журналісты выйшлі на акцыю, каб сказаць вартавым парадку, што іх мэтады ў дачыненьні да прадстаўнікоў СМІ перавышаюць іх службовыя паўнамоцтвы.

Адзін з журналістаў адзначыў, што ў гарачых кропках менш пацярпелых журналістаў, чым падчас адносна мірнай акцыі ва Ўкраіне. Некаторыя з журналістаў у бронекамізэльках.

Міліцыянты праз гукаўзмацняльнік заклікалі не правакаваць супрацоўнікаў міліцыі і не падыходзіць бліжэй за тры мэтры.

27 студзеня Нацыянальны саюз журналістаў Украіны апублікаваў заяву з патрабаваньнем ад кіраўніцтва сілавых ведамстваў неадкладна спыніць гвалт над журналістамі.

Як паведамляе Інстытут масавай інфармацыі, ва Ўкраіне з 19 па 27 студзеня пацярпелі 60 журналістаў.

Чаго чакаць ад надзвычайнага становішча

Апошні шлях Жызьнеўскага — ад Майдана да гомельскай вёскі

28 студзеня труну зь целам загінулага на кіеўскіх барыкадах гамяльчука Міхаіла Жызьнеўскага маюць прывезьці на радзіму. Напярэдадні ў Кіеве разьвітацца зь ім у Міхайлаўскі сабор і на Майдан прыйшлі тысячы ўкраінцаў. Яго праводзілі як героя. Пахаваюць Міхаіла ў вёсцы ля Гомеля.

Львоўскія рэгіяналы распусьціліся і выказаліся за выбары

Фракцыя Партыі рэгіёнаў ў Львоўскай абласной радзе прыняла рашэньне аб самароспуску.

Пра гэта паведаміў агенцтву «Інтэрфаксу» сябар фракцыі Алег Баляш.

Львоўскія «рэгіяналы» заклікалі ўдзельнікаў супрацьстаяньня павярнуць сытуацыю ў канстытуцыйнае рэчышча і вырашаць усе спрэчныя пытаньні шляхам пазачарговых выбараў.

У фракцыю Партыі рэгіёнаў ў Львоўскай абласной радзе ўваходзілі 10 дэпутатаў.

Народны дэпутат з фракцыі Партыі рэгіёнаў Мікалай Рудкоўскі зарэгістраваў у Вярхоўнай Радзе Ўкраіны праект пастановы аб правядзеньні пазачарговых выбараў.

Суд вызваліў журналіста

Шаўчэнкаўскі раённы суд Кіева зьняў крымінальная абвінавачваньне з актывіста Эўрамайдана, журналіста «Дарожнага кантролю» Андрэя Дзындзы.

Дзындзу абвінавачвалі ў тым, што ён нібыта скраў трактар, які выкарыстоўвалі пры штурме адміністрацыі прэзыдэнта 1 сьнежня. Сам журналіст адхіляе ўсе абвінавачваньні і сьцьвярджае, што ніяк не зьвязаны са штурмавікамі і проста фіксаваў падзеі.

Пракуратура Кіева закрыла 35 крымінальных вытворчасьцяў, зьвязаных з масавымі акцыямі ў лістападзе-сьнежні 2013 года, паведамляе РІА «Новости».

Раней у ходзе перамоваў з лідэрамі апазыцыі Віктар Януковіч пагадзіўся вызваліць з-пад варты і амніставаць арыштаваных дэманстрантаў, а таксама дапусьціў магчымасьць зьмены Канстытуцыі, каб ператварыць Украіну ў парлямэнцка-прэзыдэнцкую рэспубліку.

Пабітыя журналісты «Белсату» праводзяць прэсавую канфэрэнцыю

У прэсавым цэнтры Штабу нацыянальнага супраціву ў Кіеве пачалася прэсавая канфэрэнцыя журналістаў «Белсату», якія былі зьбітыя ў Чаркасах.

У прыватнасьці Сяргей Марчык падрабязна распавядае, як іх пабіў «Беркут».

«Нас проста мясілі дручкамі, слава Богу на галаве ў мяне была каска»,— кажа Сяргей.

«Беркут» працаваў паводле сынгалу спэцыяльна на журналістаў, яны хацелі зьнішчыць увесь запісаны унікальны матэрыял",— распавёў Юрый Высоцкі.

Зьявілася відэа разгону Эўрамайдану ў Чаркасах, пад час якога пацярпелі журналісты «Белсату»

Рэгіяналы гатовыя прагаласаваць за адстаўку Азарава

Партфель прэм’ера адразу ж перададуць Яцанюку. Пра гэта заявіў народны дэпутат ад Партыі рэгіёнаў Міхаіл Чэчэтаў. Ён сказаў, што ягоная палітычная сіла гатовая прагаласаваць за адстаўку прэм’ер-міністра Мікалая Азарава на пазачарговым пасяджэньні Вярхоўнай Рады 28 студзеня. Пасьля гэтага, паводле Чэчэтава, як толькі парлямэнт прагаласуе за адстаўку Азарава, партфэль прэм’ер-міністра атрымае лідэр «Бацькаўшчыны» Арсеній Яцанюк, паведамляе тэлеканал «1+1».

Яцанюк канчаткова не адхіліў прапанову Януковіча стаць прэм’ер-міністрам, заявіўшы, што канчатковае рашэньне ўхваліць народ.

На Майдане незалежнасьці 2000 чалавек

На кіеўскім Майдане Незалежнасьці цяпер знаходзяцца каля 2 тысяч чалавек. Як перадае УНІАН , людзі грэюцца каля бочак з агнём. Таксама на Майдане функцыянуюць палявыя кухні.

Каля сцэны знаходзяцца некалькі сотняў чалавек, яны глядзяць гістарычныя фільмы.

На барыкадзе на вуліцы Інстытуцкай каля верхняга выхаду са станцыі мэтро «Храшчацік», якая дасягае вышыні 3,5 м, знаходзяцца некалькі дзясяткаў ахоўнікаў Майдана. Тут вядзецца запіс у сілы Самаабароны.

На Заходняй Украіне забараняюць Кампартыю і Партыю рэгіёнаў

Шэраг абласных рад у Заходняй Украіне ухвалілі рашэньне пра забарону дзейнасьць

Як паведамляе УНІАН на цэнтральнай плошчы горада Каламыя Львоўскай вобласьці удзельнікі веча разграмілі мясцовыя офісы Партыі рэгіёнаў і спалілі яе сымболіку.

Таксама было абвешчана, што Партыя рэгіёнаў і Камуністычная партыя на тэрыторыі вобласьці ліквідаваныя.

У Днепрапятроўску суд арыштаваў 15 актывістаў

За ноч пасьля штурму абласной адміністрацыі ў Днепрапятроўску арыштаваныя 15 чалавек, якія правядуць 2 месяцы пад вартай.

Яны арыштаваныя за ўдзел у бойцы пад будынкам адміністрацыі.

Апублікавана новае відэа зьдзекаў «Беркута» над распранутым на марозе актывістам

На ім відаць, як байцы «Беркута» зьдзекуюцца над актывістам Эўрамайдана Міхаілам Гаўрылюком.

У большасьці рэгіёнаў Украіны патрабуюць адстаўкі Януковіча

22 рэгіёны Ўкраіны з 25 ўжо ахапіла хваля нязгоды. У 11 зь іх захопленыя абласныя дзяржаўныя адміністрацыі. У Запарожжы, Чаркасах, Сумах, Адэсе, Днепрапятроўску міліцыі і цітушкам ўдалося адбіць будынкі ад мітынгоўцаў, паведамляе Еспресо.ТВ

Пасьля разгону Майдана ў Запарожжы, у шпіталях знаходзяцца прынамсі 90 чалавек.