Лінкі ўнівэрсальнага доступу

Лагвінец: «Эўрапейскія санкцыі могуць ператварыць Януковіча ў новага Лукашэнку»


Алесь Лагвінец

Алесь Лагвінец

Чаму голас эўрапейскіх палітыкаў ня мае вялікага ўплыву на падзеі ва Ўкраіне? Ці можна сказаць, што Эўразьвяз недастаткова актыўна рэагуе на драматычную ўкраінскую сытуацыю? Якія станоўчыя і нэгатыўныя бакі магчымага ўвядзеньня санкцый супраць афіцыйнага Кіева? На гэтыя пытаньні адказвае палітоляг Алесь Лагвінец.

— Сярод аналітыкаў і палітыкаў нарастае незадаволенасьць той ня вельмі актыўнай роляй, якую адыгрывае Эўразьвяз падчас украінскіх падзеяў. Як сьцьвярджаюць многія, голасу эўрапейскіх палітыкаў не чуваць, іхняга ўплыву не адчуваецца. Чаму так адбываецца, і ці справядлівыя крытычныя выказваньні ў бок палітыкаў Эўразьвязу?

— Па-першае, я б не сказаў, што Эўразьвязу зусім не відаць. Нагадаю, што ўсё пачалося якраз пасьля адмовы ўладаў Украіны падпісаць пагадненьне аб асацыяцыі з Эўразьвязам.

Можна зразумець пэўныя перасьцярогі палітыкаў Эўразьвязу адносна актыўнасьці сваёй рыторыкі. Нельга выключаць расейскі аспэкт. Масква толькі чакае памылак з боку Эўразьвязу, каб падкрэсьліць прывабнасьць сваёй пазыцыі і яшчэ больш уцягнуць да сябе ўлады Ўкраіны.

Мне падаецца, што з боку Эўразьвязу ўсё ж гучалі канкрэтныя галасы адносна таго, што мусілі б рабіць улады Ўкраіны.

— Нядаўна прэзыдэнт Польшчы Браніслаў Камароўскі заявіў, што магчымасьць увядзеньня супраць афіцыйнага Кіева пэўных санкцыяў вісіць на валаску. Разам з тым ён нагадаў пра розныя бакі (станоўчы і нэгатыўны) ад увядзеньня санкцыяў. Пра якія санкцыі можа ісьці размова і наколькі пагроза іхняга ўвядзеньня можа ўплываць на паводзіны ўкраінскай улады?

— Праблема акурат у тым, што набор дзеяньняў Эўразьвязу вядомы, і ён ня моцна палохае ўлады Ўкраіны, якія фактычна захапілі ў палон уласны народ. Буйнамаштабныя санкцыі наўрад ці могуць быць прымененыя адразу, нарастаньне санкцыяў ня робіцца за адзін дзень. Пытаньне ў тым, ці візавыя абмежаваньні і замарожваньне рахункаў могуць істотна паўплываць на дзеяньні кіраўнікоў Украіны.

Ад некаторых заходніх аналітыкаў, якія шчыльна займаюцца Ўкраінай, я чуў перасьцярогу, што санкцыі могуць пераўтварыць Януковіча ў новага Лукашэнку. То бок настолькі адштурхнуць кіраўніцтва Ўкраіны, што немагчыма будзе далей зь ім размаўляць. А гутарка якраз ідзе пра тое, каб пашыраць магчымасьці ўплыву на ўкраінскае грамадзтва, а не звужаць іх.

Так ці іначай, у выпадку санкцыяў вельмі складана адасобіць народ ад канкрэтных асобаў з улады. Эўразьвяз ня можа не казаць пра магчымыя санкцыі, але набор дзеяньняў у яго даволі абмежаваны. Тым ня менш у найбліжэйшы час пэўныя крокі будуць прынятыя. Тут ЗША ідуць наперадзе, яны ўжо заявілі, што ўсе вінаватыя ў рэпрэсіях будуць падлягаць іхнім санкцыям. Тут велізарная палітычная дылема для кіраўнікоў Захаду, як зрабіць так, каб Украіна па-ранейшаму захавала сваю эўрапейскую пэрспэктыву, не была ізаляваная, але каб маральная ацэнка дзеяньняў уладаў была зробленая.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

Паказаць камэнтары

XS
SM
MD
LG