Лінкі ўнівэрсальнага доступу

Над амбасадай Вялікай Брытаніі лунаў вясёлкавы сьцяг


Над Амбасадай Вялікай Брытаніі ў Менску побач са сьцягамі Вялікай Брытаніі і Эўрапейскага Зьвязу 7 і 8 сьнежня лунаў шасьцікаляровы вясёлкавы сьцяг, сусьветны сымбаль руху за правы ЛГБТ-супольнасьці.

Амбасада Вялікай Брытаніі месьціцца за некалькі сотняў мэтраў ад рэзыдэнцыі Аляксандра Лукашэнкі, вядомага ня вельмі талерантнымі выказваньнямі ў бок ЛГБТ-супольнасьці, адзначае сайт ГейБеларусь.

Арганізатары Менскага гей-прайду атрымалі вітальны ліст ад амбасадара Вялікабрытаніі Бруса Бакнэла.

«Як сябра Эўрапейскага Зьвязу, Вялікая Брытанія была і застаецца краінай, якая падтрымлівае правы чалавека ва ўсіх формах і праявах, у тым ліку грамадзянскія правы і свабоды. Канцэпцыя свабоды слова і сходаў зьяўляецца адной з ключавых для Вялікай Брытаніі, таксама як і ўнівэрсальны характар правоў чалавека. Мы перакананыя, што абавязкам дзяржавы зьяўляецца захаваньне правоў чалавека незалежна ад асаблівасьцяў яе палітыкі, эканомікі і культуры», — піша ў сваім лісьце амбасадар Бакнэл.

На выходных адміністрацыя рэстарана Casa Agustin Lopez адмяніла прайд-вечарыну, у рамках якой павінен быў адбыцца конкурс «Міс і Містэр Талерантнасьць». Прычынай адмены мерапрыемства стаў нібыта прарыў каналізацыйнай трубы.

У гэты дзень у Менску былі таксама адмененыя вечарыны ў клюбах «Алекс » і «Бостан». На іх былі запрошаныя ня толькі ўдзельнікі гей-прайду. Да «Бостану» пад’ехала міліцыя і проста не пусьціла наведвальнікаў у памяшканьне, а ў клюбе «Алекс» ўзьніклі «тэхнічныя праблемы».

Акрамя таго, у клюб «Каста Дзіва» не пусьцілі ЛГБТ-актывістаў з Брэсту і Жодзіна.

7 сьнежня на спэктакль «Свабоднага тэатру» «Шчасьлівага Раства, міс Мідоў», які праходзіў у рамках праграмы мінскага гей-прайду, прыйшлі супрацоўнік міліцыі і жанчына ў цывільным. Паводле іх словаў, яны прыйшлі на спэктакль, бо ў міліцыю паступіла інфармацыя, што ў памяшканьні зьбіраюцца асобы нетрадыцыйнай арыентацыі.

Гей-прайд 11-12 сьнежня праводзіцца ў дзявяты раз, але гарадзкія ўлады ніколі не давалі дазволу на яго правядзеньне, нагадвае «Эўрарадыё».

Паказаць камэнтары

XS
SM
MD
LG