Лінкі ўнівэрсальнага доступу

Што зрабіла Міністэрства культуры з Курапатамі?


Ахоўную зону Курапатаў адсунулі ад «Бульбаш-холу»

Ахоўную зону Курапатаў адсунулі ад «Бульбаш-холу»

Ахоўную зону Курапатаў з боку рэстаранна-забаўляльнага комплексу «Бульбаш-хол» паменшылі са 100 да 50 мэтраў. Але гэта было зроблена не дзеля рэстарацыі, а з-за таго, што па гэтай тэрыторыі ідзе вадавод, па якім ідзе пітная вада ў паўночныя раёны Менску.

Ахоўную зону Курапатаў з боку рэстаранна-забаўляльнага комплексу «Бульбаш-хол» паменшылі са 100 да 50 мэтраў. Але гэта было зроблена не дзеля рэстарацыі, а з-за таго, што па гэтай тэрыторыі ідзе вадавод, па якім ідзе пітная вада ў паўночныя раёны Менску, паведаміў Свабодзе старшыня Таварыства аховы помнікаў гісторыі і культуры Антон Астаповіч.

Інфармацыя пра тое, што «Бульбаш-хол» узаконіў свае пабудовы з дапамогай Навукова-мэтадычнай рады пры Міністэрстве культуры Рэспублікі Беларусь, хутка разьнеслася па СМІ. Грамадзкія актывісты прадстаўляюць рашэньне Рады як перамогу ўладальнікаў рэстарацыі.

«Каб зразумець, што гэта за рашэньне, трэба размаўляць са спэцыялістамі, а не кіравацца эмоцыямі», — заявіў Свабодзе начальнік упраўленьня па ахове гісторыка-культурнай спадчыны і рэстаўрацыі Міністэрства культуры Ігар Чарняўскі.

Ад далейшых камэнтароў Ігар Чарняўскі адмовіўся.

Больш сьвятла праліў на тое, што адбылося на Радзе, Антон Астаповіч:

Антон Астаповіч

Антон Астаповіч

«Тут ужо паніка! З боку «Бульбаш-хола» скарацілі ахоўныя межы на 50 мэтраў! Але па Курапатах было прынята нармальнае рашэньне з пункту гледжаньня ўсіх бакоў ахоўных зон.

Паміж «Бульбаш-холам» і Курапатамі праходзяць тры магістральныя вадаводы, якія забясьпечваюць з пункту водазабора ўсю паўночную частку Менску пітной вадой, як тлумачыць Астаповіч.

«Гэтыя вадаводы маюць больш „жалезныя“ ахоўныя межы, чым зона аховы гісторыка-культурнай каштоўнасьці. Навошта дубляваць зону аховы менавіта па мяжы зоны аховы вадаводаў, калі і так там любая гаспадарчая дзейнасьць забароненая, апрача прац па абслугоўваньні і рамонце гэтых камунікацый? Таму, канечне, зона аховы гісторыка-культурнай каштоўнасьці была скарэктаваная па ўсходняй мяжы зоны аховы вадаводаў. Ніхто на гэтыя тэрыторыі з боку „Бульбаш-хола“ больш не наступае і наступаць ня будзе», — кажа Антон Астаповіч.

Ігар Чарняўскі, які прызнаецца, што пасьля Рады «выціснуты як лімон», кажа:
Там сёньня транспартны каляпс — адну зь межаў проста падвесілі. Гэта рэаліі жыцьця, і гэта трэба вырашаць

«Вы зразумейце, што ёсьць пэўныя прававыя нормы. А як у рамках нарматываў не прынесьці шкоды гісторыка-культурнай каштоўнасьці — гэта пякельная праца. Там сёньня транспартны каляпс — адну зь межаў проста падвесілі. Гэта рэаліі жыцьця, і гэта трэба вырашаць.

Пытаньне было разгледжанае і далей будзе распрацоўвацца ва ўсталяваным законам парадку. Сёньняшняя рада дала штуршок, каб гэтая праца пачалася. Я асабіста на гэтую тэму гавару з 2003 году. І мы толькі зараз падышлі да таго, каб пачаць вырашаць гэтае пытаньне».

«Аб’ект так званага „Бульбаш-холу“ пабудаваны ў зоне рэгуляванай забудовы, — сьцьвярджае Антон Астаповіч.— Там два домікі ўклініліся ў ахоўную зону — і гэта парушэньне. Але яго можна зьняць. Прадпрыемства, якое выкупіла гэты комплекс і дабудоўвае яго, вельмі гнуткае. Зь імі можна дамаўляцца і зьняць гэтую канфліктную сытуацыю. Проста ніхто зь імі не дамаўляецца!»

Па словах Астаповіча, пытаньне маралі ў дачыненьні да «Бульбаш-холу» застаецца, калі ўладальнікі захочуць зрабіць там забаўляльны комплекс.

«Але калі там застанецца толькі пункт грамадзкага харчаваньня прыдарожнага сэрвісу, дык ў гэтым няма нічога страшнага», — сьцьвярджае Астаповіч.

Аднак, ён зьвяртае ўвагу на тое, што хвалявацца ў Курапатах усё ж ёсьць пра што:

«Да гэтага часу не была ўзгодненая ўсходняя мяжа. Яна будзе ўдакладняцца менавіта ў рамках распрацоўкі праекта дэталёвай пляніроўкі усёй тэрыторыі вакол Курапатаў і будучага выставачнага цэнтру, які плянуецца паміж Курапатамі і „Экспабелам“. Вось тут большая небясьпека, — папярэджвае гісторык. — У які бок будзе карэктавацца гэтая мяжа? А, на маю думку, яна будзе карэктавацца ў бок зьмяншэньня — і гэтай праблемы ніхто не агучыў».

Аніхто таксама не зьвярнуў увагі і на надзвычай пазытыўны факт, які меў месца на Радзе ў Мінкульце:

Астаповіч: «Адбылася вельмі вялікая перамога навукова абгрунтаванага падыходу да гістарычнага цэнтру Менску. Разглядаўся другім пытаньнем праект дэталёвай пляніроўкі гораду Менску. Ён яшчэ не зацьверджаны, яшчэ ў стадыі карэктыроўкі. На пачатку году было грамадзкае абмеркаваньне. На гэтай тэрыторыі Сяргеям Багласавым былі запраектаваныя быццам бы аднаўленьне і музэефікацыя менскага замчышча. І вось па выніках гэтага абмеркаваньня і пазыцыі Таварыства гэты праект выключаны. Зроблена гэта для таго, каб гэтую пляцоўку дэталёва дасьледаваць, скласьці гісторыка-архітэктурны апорны плян і на падставе гэтага ўжо прыняць рашэньне пра засваеньне гэтай тэрыторыі. І вось гэта — нашмат больш важна», — заключае старшыня Таварыства аховы помнікаў.

Навукова-мэтадычная рада пры Міністэрстве культуры Рэспублікі Беларусь зьменшыла ахоўную зону Курапатаў да 50 мэтраў. Такім чынам, цяпер чатыры пабудовы, якія належаць «Бульбаш-холу», фактычна знаходзяцца ў зоне рэгуляванай забудовы, і іх разьмяшчэньне каля Курапатаў не парушае заканадаўства.

На паседжаньні ў якасьці назіральнікаў прысутнічалі навуковы кіраўнік Курапатаў Мая Кляшторная, старшыня Таварыства аховы помнікаў гісторыі і культуры Антон Астаповіч, кіраўнік міжнароднага таварыства «Мэмарыял» Уладзімер Раманоўскі, журналіст «Новага часу» Марат Гаравы, каардынатарка грамадзкай ініцыятывы «За ўратаваньне Курапатаў» Ганна Шапуцька, старшыня «Хрысьціянскай злучнасьці „Курапаты“» Вацлаў Нямковіч.

Паказаць камэнтары

XS
SM
MD
LG