Лінкі ўнівэрсальнага доступу

Ужо сёньня, 20 лістапада: спроба самагубства Купалы, вечарына паэзіі Янішчыц, дзень нараджэньня Windows


Бліц-агляд падзеяў і тэмаў у Беларусі, сьвеце, гісторыі.

У БЕЛАРУСІ І СЬВЕЦЕ

У Маскве зьбіраюцца на сустрэчу кіраўнікі ўрадаў краін СНД.

На прапанову ААН у сьвеце адзначаецца Сусьветны дзень дзіцяці. У гэты дзень у 1959 годзе была прынятая Сусьветная дэклярацыя правоў дзіцяці, а ў 1989 Канвэнцыя правоў дзіцяці. У Менску сёньня адбудзецца міжнародная канфэрэнцыя, прысьвечаная вопыту прыёмных сем’яў дзяцей.

У сталічнай бібліятэцы імя Я. Коласа а 16-й гадзіне адбудзецца вечарына, прысьвечаная 65-годзьдзю паэтэсы Яўгеніі Янішчыц (памерла ў 1988 годзе).

У лідзкай бібліятэцы імя Янкі Купалы можна будзе пачуць песьні філяматаў і філярэтаў. Беларускія музыкі, сярод якіх Алесь Лось, Алеся Сівохіна, Алена Мялешка, агучаць песьні на вершы Яна Чачота, Тамаша Зана, Адама Міцкевіча з арыгінальнымі мэлёдыямі, ноты якіх захаваліся з пачатку ХІХ ст.

ТАКСАМА Ў ГЭТЫ ДЗЕНЬ:

1648 – вялікім князем ВКЛ і польскім каралём абралі Яна Казіміра (сына караля Жыгімонта III Вазы).

1930 – Янка Купала спрабаваў скончыць жыцьцё самагубствам.

1982 – у Менску адкрыўся першы музычны фэстываль «Беларуская музычная восень» (з той пары праводзіцца штогод).

1985 – кампанія «Майкрасофт» упершыню прадставіла апэрацыйнае асяродзьдзе пад назваю «Ўіндаўз» – Microsoft Windows 1.0.

У гэты дзень нарадзіліся:

1899 – беларускі пісьменьнік, перакладчык і крытык Міхась Клімковіч, першы старшыня Саюзу пісьменьнікаў БССР (1934-1939), аўтар тэксту Дзяржаўнага гімну БССР.

1901 – беларускі празаік, драматург, перакладчык і крытык Міхась Зарэцкі. Рэагаваў часопіс «Маладняк» (1926-1927), быў адным з ініцыятараў стварэньня літаратурнага аб’яднаньня «Полымя». У 1929-м быў выключаны з камуністычнай партыі за «праявы нацыянал-дэмакратызму». У 1936-м арыштаваны. 29 кастрычніка 1937 году расстраляны.

1902 – беларускі архітэктар Аляксандар Воінаў. Сярод яго менскіх працаў – Палац піянэраў і школьнікаў, гатэль «Сьвіслач», будынак былога ЦК КПБ (цяпер – адміністрацыя прэзыдэнта).

1948 – беларуская паэтка Яўгенія Янішчыц. Трагічна загінула ў 1988 годзе, выкінуўшыся з акна сваёй менскай кватэры.

1954 – беларуская гімнастка Антаніна Кошаль, чэмпіёнка Алімпійскіх гульняў 1972 году.

У гэты дзень памерлі:

1910 – расейскі пісьменьнік, публіцыст, мысьляр Леў Талстой.

1925 – польскі пісьменьнік і публіцыст Стэфан Жаромскі, часта званы «сумленьнем польскай літаратуры».

1950 – расейскі і беларускі публіцыст, крытык, журналіст і літаратар Леў Клейнбарт. Дасьледнік тэндэнцыяў і кірункаў беларускага літаратурнага руху. Першы біёграф Янкі Купалы.

1975 – гішпанскі дыктатар Франсыска Франка. Кіраваў краінаю з 1939 году да сьмерці ў 1975-м.

1998 – расейская палітычная дзяячка Галіна Старавойтава. Была застрэленая ў Санкт-Пецярбургу пры дасюль не да канца высьветленых абставінах.

ЦЫТАТА НА ПАМЯЦЬ

Дзіця мае права на спэцыяльную абарону законам і іншымі сродкамі. Дзіцяці павіны быць дадзеныя магчымасьці і спрыяльныя ўмовы, якія б дазвалялі яму разьвівацца фізычна, разумова, маральна, духоўна, сацыяльна здаровым і нармальным шляхам ва ўмовах свабоды і годнасьці.

Пункт 2 Дэклярацыі правоў дзіцяці
XS
SM
MD
LG