Лінкі ўнівэрсальнага доступу

Андросенка: Супраць «Эўрабачаньня» ідзе хваля гістэрычнай гамафобіі


Байкатаваць «Эўрабачаньне-2014» і забараніць трансьляцыю гэтага конкурсу ў Беларусі з-за ўдзелу ў ім Канчыты Вурст, якая прадстаўляе Аўстрыю, заклікаў у пэтыцыі на сайце сhange.org 26-гадовы Арцём Кірашоў з Барысава.

Арцём уваходзіць у шэраг пралукашэнкаўскіх суполак у сеціве, сярод якіх «Мы против оранжевой „революции“ в Беларуси», «За ЛУКАШЕНКО! Мы против прозападной оппозиции», «Мы против политики США, НАТО, ЕС и ООН! Анти-США», «Я люблю Лукашенко», «А.Г Лукашенко — наш Президент!». Ён адміністратар суполкі «Легіён Аляксандра Лукашэнкі».

Арцём Кірашоў жыве ў Барысаўскім раёне, працуе вэтэрынарам. Жанаты, мае 9-месячную дачку. Захапляецца музыкай. З часоў навучаньня ў школе ўваходзіць у БРСМ, аднак актыўным яго сябрам сябе ня лічыць.

У інтэрвію Радыё Свабода Арцём патлумачыў, чаму лічыць неабходным забараніць трансьляцыю «Эўрабачаньня»:

«У конкурсе „Эўрабачаньне“ ўжо расчаравалася вельмі шмат людзей. Гэта бачна ў онлайн-абмеркаваньнях, на форумах. Столькі было скандалаў наконт палітычнай ангажаванасьці гэтага конкурсу, наконт падліку галасоў. У нашым разуменьні конкурс ператварыўся ў памыйную яму. А тут яшчэ адкрытыя трансвэстыты. Некаторыя кажуць, што раней была Дана Інтэрнэшнл і Верка Сярдзючка, але гэта ня йдзе ні ў якае параўнаньне. На фатаздымках Канчыты мы бачым барадатага мужыка ў ультра-міні кароткай сукенцы. Я супраць „Эўрабачаньня“ ў прынцыпе, а таксама супраць прапаганды каштоўнасьцяў меншасьцяў, якія менавіта з Эўропы нам спрабуюць навязаць і даказаць, што гэта добра і нармальна. У беларусаў не такі мэнталітэт. Правільна сказаў прэзыдэнт, што мы яшчэ не дасьпелі да гэтага».

«Канкурсантам на „Эўрабачаньні-2014“ ад Аўстрыі стаў сьпявак-трансвэстыт Канчыта Вурст, які прапагандуе лад жыцьця, непрымальны для беларускага грамадзтва. Папулярны міжнародны конкурс, які будуць глядзець нашыя дзеці, з падачы эўрапейскіх лібэралаў стаў рассаднікам садаміі!», — гаворыцца ў пэтыцыі, адрасаванай Міністэрству інфармацыі Беларусі. У міністэрстве пацьвердзілі, што зварот атрыманы, і паведамілі, што цяпер ён у стане разгляду.

Пэтыцыю ўжо падпісалі 1992 чалавекі. «Гэта простыя беларусы, якім неабыякавы лёс краіны, якіх непакоіць маральны дабрабыт іх дзяцей», — паведаміў Арцём у інтэрвію парталу, прысьвечанаму «Эўрабачаньню», — www.ogae.by. Пасьля публікацыі матэрыялу пра пэтыцыю на расейскіх рэсурсах да ініцыятывы падключыліся і расейцы. Некаторыя нават прапануюць стварыць падобны зварот да расейскага кіраўніцтва.

Канчыта Вурст — псэўданім 24-гадовага Тома Ньювэрза. На пачатку сваёй кар’еры сьпявак выступаў у звычайным вобразе і нават удзельнічаў у бойз-бэндзе «Jetzt Anders». Як Канчыта Вурст ён упершыню зьявіўся на шоў талентаў «Die grosse Chance», пасьля чаго стаў рэгулярна выступаць у вобразе барадатай дзяўчыны. Выбар прадстаўніка Аўстрыі на «Эўрабачаньні 2014» адбыўся без нацыянальнага галасаваньня — рашэньне прыняло Грамадзкае тэлебачаньне Аўстрыі ORF. Песьня, зь якой выступіць Канчыта Вурст, называецца «That’s what I am» — «Вось што я такое». Сьпявак выконвае яе ў доўгай бліскучай сукенцы з глыбокім дэкальтэ.





Юлія Міцкевіч

Юлія Міцкевіч

Грамадзкая актывістка Юлія Міцкевіч лічыць пэтыцыю піярам: «Гэта выглядае як спроба прарэклямаваць сябе і суполку з красамоўнай назвай. Відавочна, што такая тэма выклікала шмат камэнтароў. Гэта таксама можа быць крокам, каб адцягнуць увагу грамадзтва ад эканамічных і сацыяльных праблемаў. Магчыма, гэта зроблена, каб людзі сталі разважаць пра маральнасьць конкурсу „Эўрабачаньне“ і забыліся пра кошты ў крамах. Таксама незразумела, чаму нейкая асоба выказваецца ад імя грамадзтва і хто надаў ёй такое права. Калі казаць пра „Эўрабачаньне“, то я лічу, што людзі, якія глядзяць гэты конкурс, па-рознаму могуць ставіцца да таго, хто там выступае і ў якім выглядзе».

Адзін з заснавальнікаў Праваабарончага цэнтру «Лямбда» Сяргей Андросенка кажа, што напярэдадні Чэмпіянату сьвету па хакеі Беларусь ня пойдзе супраць Эўропы і не адмовіцца ні ад удзелу ў «Эўрабачаньні», ні ад яго трансьляцыі:

Сяргей Андросенка

Сяргей Андросенка

«Тут трэба глядзець пэрсаналіі. Зьбіраць подпісы пад пэтыцыяй супраць трансьляцыі „Эўрабачаньня“ пачаў правінцыйны хлопец, які падтрымлівае прарасейскія ідэі. А мы бачым, што цяпер з Усходу ідзе хваля гістэрычнай гамафобіі. Ёсьць прапановы забараніць усё, дзе ёсьць вясёлка. Напрыклад, была спроба забараніць малако „Вясёлы малочнік“ за нібыта прапаганду гомасэксуалізму, бо на пачку была намаляваная вясёлка. Я думаю, што некаторыя беларусы пераймаюць гістэрычную гамафобію, хочуць забараніць усё, што можа нагадаць пра ЛГБТ-супольнасьць. Я, калі шчыра, ня думаю, што трансьляцыю „Эўрабачаньня“ забароняць у Беларусі, бо зьяўленьне пэтыцыі ніякім чынам ня зьвязваю зь дзейнасьцю дзяржаўных структураў. Да таго ж у наступным годзе Беларусь прымае Чэмпіянат па хакеі, таму на гэтым фоне з-за аднаго артыста выступаць супраць эўрапейскай талерантнасьці ня будуць. Гэта проста ініцыятыва, якая сваім эпатажам прыцягнула ўвагу СМІ».

«Эўрабачаньне-2014» пройдзе з 6 па 10 траўня ў сталіцы Даніі Капэнгагене. У конкурсе ня раз бралі ўдзел выканаўцы нетрадыцыйнай арыентацыі або тыя, хто выступае ў сцэнічным вобразе іншага полу. Напрыклад, у 1998 годзе перамогу атрымала Дана Інтэрнэшнл з Ізраілю, у 2003 годзе Расею прадстаўляў гурт «t.A.T.u.», у 2007-м ад Украіны выступала Верка Сярдзючка.

Паводле правілаў «Эўрабачаньня» ўсе ўдзельнікі павінны забясьпечыць трансьляцыю ў жывым эфіры і без купюр. Калі Беларусь выдаліць некага з паказу, то ёй пагражае дыскваліфікацыя на некалькі гадоў.

Паказаць камэнтары

XS
SM
MD
LG