Лінкі ўнівэрсальнага доступу

Як багатыя расейцы купляюць другі пашпарт


Сучасны пашпарт Расеі

Сучасны пашпарт Расеі

Матэрыял пад такім загалоўкам нядаўна зьмясьціла выданьне Moscow Times.

Аказваецца, набываньне замежных пашпартоў багатымі расейскімі бізнэсмэнамі — вельмі прыбытковы бізнэс, які абслугоўваюць адмысловыя кансультацыйныя фірмы на Захадзе.

Грамадзянства некаторых краінаў на Захадзе можна набыць у абмен за інвэстыцыі ў эканоміку і/або ў сфэру гандлю нерухомай маёмасьцю гэтых краінаў.

«Шмат людзей ня ведае, чаго яны насамрэч хочуць. Мае кліенты звычайна кажуць: я хачу туды паехаць. Ну, „туды“ значыць 150 розных краінаў» — Moscow Times цытуе Нуры Каца, агента адной кансультацыйнай фірмы, якая дапамагае багатым расейцам набыць замежнае грамадзянства. У Нуры Каца тры пашпарты — амэрыканскі, канадзкі і ізраільскі.

Кіпрыёцкае грамадзянства каштавала расейскага мільярдэра Аляксандра Абрамава больш за 7 мільёнаў даляраў, якія ён інвэставаў у эканоміку гэтага прыхільнага расейцам вострава. А вось грамадзянства астраўной дзяржавы Сэні-Кітс і Нэвіс у Карыбскім моры можна атрымаць усяго за набыцьцё нерухомасьці коштам 400 тысяч даляраў.

Паводле Нуры Каца, найцяжэйшым этапам у атрыманьні другога або трэцяга грамадзянства багатымі расейцамі зьяўляецца вытлумачэньне іміграцыйным службам, адкуль у расейцаў узяліся грошы дзеля інвэстыцый. Вось гэтым і займаюцца розныя кансультацыйныя фірмы ў бізнэсе «грамадзянства за інвэстыцыі».

Паводле Каца, страх перад палітычных перасьледам у Расеі не зьяўляецца істотнай прычынай набываньня расейцамі замежнага грамадзянства. Насуперак спадзяваньням, ні арышт Міхаіла Хадаркоўскага ў 2003 годзе, ні сьмерць Сяргея Магніцкага ў турме ў 2009 годзе прыкметна не паўплывалі на рост зацікаўленьня другім пашпартам сярод расейскай фінансавай і бізнэсовай эліты.

Паводле Аляксандра Неўзьліна, колішняга бізнэсовага партнэра Хадаркоўскага, які пасьля арышту таго апошняга атрымаў ізраільскі пашпарт усяго за месяц і тры дні у абмен за 1,5 мільёна даляраў датацыі для музэю габрэйскай дыяспары, расейцы набываюць замежныя пашпарты пераважна дзеля зручнасьці перамяшчэньня па сьвеце. Расейскім бізнэсмэнам трэба візы для паездкі ў большасьць краінаў на Захадзе, і яны або іх памочнікі вымушаныя запаўняць бясконцыя візавыя формы, якія ў дадатак патрабуюць складанай каардынацыі пры наведваньні не адной, а некалькіх заходніх краінаў.

Гонар багатага чалавека таксама адыгрывае ў гэтай справе сваю ролю. «Вам 46 гадоў, а нейкі 22-гадовы маладзён глядзіць на вас з другога боку шклянога экрану і пытаецца: Вы не зьбіраецеся застацца нелегальна ў маёй краіне?» — так Нуры Кац тлумачыць маскоўскаму выданьню матывы набываньня другога пашпарту багатымі расейцамі.

Акрамя згаданай астраўной дзяржавы Сэнт-Кітс і Нэвіс, расейцы ахвотна набываюць грамадзянства другога карыбскага вострава, Антыгуа. Шмат хто з расейцаў выбірае грамадзянства Вялікабрытаніі і Баўгарыі. Нягледзячы на наяўнасьць адмысловых праграмаў «грамадзянства за інвэстыцыі» ў ЗША і Канадзе, багатых расейцаў туды ўпускаюць неахвотна. У 2011 годзе станоўча вырашана толькі 30 расейскіх просьбаў аб грамадзянстве ў ЗША і ўсяго 6 просьбаў у Канадзе.
XS
SM
MD
LG