Лінкі ўнівэрсальнага доступу

Гары Паганяйла: Я ўзяўся б за абарону Аляксандра Лукашэнкі


Радыё Свабода будзе весьці жывую відэатрансьляцыю з прэзэнтацыі кнігі «Адвакацкія хронікі Гары Паганяйлы». Пачатак — а 18-й гадзіне.

13 кастрычніка адзначае 70-годзьдзе адвакат і праваабаронца Гары Паганяйла. На яго рахунку — дзясяткі гучных палітычных спраў, а сярод кліентаў — такія вядомыя асобы, як Славамір Адамовіч, Тамара Віньнікава, Павел Шарамет і Зьміцер Завадзкі, Міхаіл Чыгір, Васіль Старавойтаў, Андрэй Клімаў.

У інтэрвію Радыё Свабода Гары Паганяйла распавёў пра стаўленьне да жыцьця ў 70 гадоў, назваў самае складанае ў працы адваката, і запэўніў, што ўзяўся б бараніць у судзе Аляксандра Лукашэнку.

Што лічыце галоўнай памылкай у сваім жыцьці і галоўным сваім посьпехам?

Цяжка сказаць, таму што памылак было шмат на шляху. Але я свае памылкі не падзяляю на першасныя і другасныя, гэтаксама як не выдзяляю самую вялікую памылку. Напэўна, таму, што самай галоўнай памылкі не было ў маім жыцьці: я прыйшоў у гэты сьвет, жыву, працую, камунікую зь людзьмі, раблю патрэбную справу. Што да посьпеху, то самым галоўным посьпехам я лічу правільны выбар прафэсіі і служэньне той прафэсіі, якую я выбраў.

Калі б у вас была магчымасьць падчас суду абараняць Аляксандра Лукашэнку, ці ўзяліся б вы за такую справу?

Вядома, я б узяўся за абарону Аляксандра Рыгоравіча і стараўся б рабіць гэта прафэсійна. У першую чаргу, калі б гэта была крымінальная справа і яго вінавацілі паводле цяжкіх крымінальных артыкулаў, я б заявіў хадайніцтва аб прызначэньні судова-псыхіятрычнай экспэртызы, абгрунтаваўшы гэта тым, што «ня зналі, ня ведалі, што тварылі, у сувязі са сваім хваравітым станам». Што б там далей вызначыла экспэртыза — гэта невядома. Але ў любым разе такая справа была б для мяне надзвычай цікавай, і я б узяў абарону гэтага чалавека. Гэта мой рацыянальны доўг, мой абавязак. Але як бы я павёў гэтую абарону — гэта ўжо іншая справа.

Ці шчасьлівыя вы ў свае 70 гадоў? Калі так, то ў чым сакрэт шчасьця?

Я ніколі не задумваўся пра гэтае пачуцьцё. Лічу, што яно ўспрымаецца кожным па-рознаму. Гэтаксама як няма адзінага разуменьня, што такое шчасьце. Але я думаю, што калі цябе атачаюць сябры, ты заняты любімай справай, калі ў цябе ёсьць любімая жанчына і дзеці, якія прыносяць табе радасьць, ты можаш сказаць, што ведаеш сакрэт жыцьцёвага шчасьця. Таксама ёсьць творчае шчасьце, гэта калі ты нешта канкрэтнае зрабіў і яно прыносіць табе задавальненьне і прызнаньне. Такіх праменьчыкаў, зь якіх складаецца шчасьце, у мяне дастаткова, таму я шчасьлівы чалавек.

Які самы арыгінальны падарунак вы калі-небудзь атрымлівалі на дзень народзінаў?

У 1964 годзе мяне сябры віншавалі ў палонцы. Справа ў тым, што я тады займаўся маржаваньнем. Так атрымалася, што мы адзначалі маё 21-годзьдзе ў Горкаўскай вобласьці. Было ўжо халаднавата. Мы былі ў вадзе, і сябры ў гэты момант падарылі мне невялікі сувэнір у выглядзе маржа. Я лічу, што гэта было вельмі арыгінальна і памятна, таму што дарэчна, і ў той жа час у вельмі арыгінальных умовах — у ледзяной вадзе.

Даведка Радыё Свабода — Гары Паганяйла


Гары Паганяйла нарадзіўся 14 кастрычніка 1943 году ў Архангельскай вобласьці, у сталінскім лягеры, дзе адбывала пакараньне яго маці, асуджаная паводле артыкула 58 Крымінальнага кодэксу як вораг народу.

Школьныя гады будучы праваабаронца правёў у розных дзіцячых дамах. У 1965 годзе Гары Паганяйла паступіў на юрыдычны факультэт БДУ, пасьля заканчэньня разьмеркаваўся ў адвакатуру.

Неўзабаве стаў судзьдзём у Быхаўскім раёне Магілёўскай вобласьці. Пасьля перайшоў у апарат Міністэрства юстыцыі, дзе 10 гадоў узначальваў аддзел адвакатуры. У 1989 годзе Гары Паганяйла вярнуўся да адвакацкай дзейнасьці.

Быў першым прэзыдэнтам Саюзу адвакатаў Беларусі.

У 1998 годзе Гары Паганяйлу абралі намесьнікам старшыні праваабарончай арганізацыі «Беларускі Хэльсынскі камітэт». Апошнія 15 гадоў займаецца праваабарончай дзейнасьцю.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG