Лінкі ўнівэрсальнага доступу

logo-print

Парфяновіч: Усюды кіруюць людзі, адданыя прэзыдэнту


Уладзімер Парфяновіч

Уладзімер Парфяновіч

Славуты беларускі спартовец, трохразовы алімпійскі чэмпіён Уладзімер Парфяновіч прызначаны галоўным трэнэрам нацыянальных зборных Расейскай Фэдэрацыі па веславаньні на байдарках і каноэ. Ён будзе несьці адказнасьць ня толькі за падрыхтоўку мужчынскай, жаночай і юнацкай камандаў, але і за разьвіцьцё вясьлярных цэнтраў ды выкананьне праграмы веславаньня ў цэлым. У Беларусі досьвед Парфяновіча аказаўся не запатрабаваны.

На віншаваньні з высокім прызначэньнем у лягеры расейскай зборнай і шкадаваньні, што так і не давялося дачакацца прызнаньня на радзіме, спадар Уладзімер адказаў дасьціпным жартам — вось набяруся трэнэрскага досьведу, можа, нарэшце і дома запатрабуюся:

«Нічога-нічога, радзіма трошкі пачакае. Вось калі патурбуюць — тады і прыеду. Пакуль, бачыце, не завуць, не турбуюць. Значыць, не патрэбен, час не надышоў. (Сьмяецца.) З боку расейцаў давер аказаны, вядома, высокі. Але неабходна яшчэ, каб гэты давер пацьвердзіў міністар спорту Віталь Мутко. Ён, дарэчы, сёньня ў Менску, дзе адбываецца сумесная калегія спартовых ведамстваў Беларусі і Расеі».

Карэспандэнт: «Не баіцеся, што асобныя „добразычліўцы“ могуць паспрабаваць на яго паўзьдзейнічаць?»

(Сьмяецца.) «Ня выключана, але ўсё роўна ён гэтае пытаньне будзе сам вырашаць… Не, нашы ўсе добрыя людзі, і я так мяркую, што ніхто нічога падобнага ня скажа».

Апошнім часам Беларусь страчвае лідэрскія пазыцыі ў веславаньні. І гэта нягледзячы на тое, што збудаваныя ўзорна-паказальныя комплексы ў Берасьці, Жлобіне, Заслаўі. Чым растлумачыць такі адкат?
Павінны найперш будаваць маленькія, але добрыя базы, у невялікіх гарадках ці нават вёсках, каля рэчак, азёраў. А ў нас жа як? Патрэбен вялікі, але адзін-два

«У Беларусі вельмі добрыя спэцыялісты, але ідзе час, ідуць зьмены. Відаць, крыху ад часу адсталі, адарваліся ад рэаліяў. Як я разумею, на сёньняшні дзень тэхналягічна дзесьці не даганяюць. Калі я яшчэ працаваў у парлямэнце, казаў нашаму кіраўніку: мы павінны найперш будаваць маленькія, але добрыя базы, у невялікіх гарадках ці нават вёсках, каля рэчак, азёраў. А ў нас жа як? Патрэбен вялікі, але адзін-два. А я на гэты конт разумею, што трэба рабіць зусім ня так. Важна мець малыя і болей, а ня кідацца ў гігантаманію. Таму што людзі, якія прыяжджаюць у Берасьце, прабачце, з хлява, бачаць цудоўны пяцізоркавы гатэль і адчуваюць сябе, шчыра скажам, дыскамфортна. Трэба ісьці найперш да дзяцей, і тады будзе вынік».

Ці можа выказаць жаданьне трэніравацца ў тым жа Берасьці расейская зборная? Спадар Парфяновіч такой верагоднасьці не выключае. Праўда, кажа, што з такімі жа посьпехам можна выехаць на марское ўзьбярэжжа — беларускія кошты нічым не саступаюць:

«Такі варыянт цалкам магчымы — думаю, ніхто нам ня будзе ставіць палкі ў колы, калі мы зьвернемся да беларускага боку з прапановай прыехаць патрэніравацца ў Берасьці ці яшчэ дзе. Мяркую, ніякіх пярэчаньняў ня будзе. Адзінае, што ў Берасьці гэта занадта дорага, і ў гэтым прычына таго, што ніхто асабліва туды і ня едзе. Там вельмі дорага нават для багатых краінаў. Можна пра нешта меркаваць, калі, прыкладам, каманда Расеі звычайна выяжджае ў Партугалію».

Вось ужо шмат гадоў Беларусь ня мае патрэбы ў здольнасьцях Уладзімера Парфяновіча. Шматразоваму чэмпіёну сьвету і Эўропы, адзінаму ў сьвеце байдарачніку, які заваяваў тры золаты на адной Алімпіядзе, не знайшлося месца нават у дзіцячай спартовай школе. Сам Парфяновіч ацэньвае гэта адназначна — папярок горла стала ягоная грамадзянская пазыцыя:

«Цалкам зразумела, што пасьля вядомых падзеяў ніякіх прапаноў мне не магло быць. Ну проста не магло. Чатыры гады ў мяне не было аніякай працы. Зрэшты, мы ўсе апынуліся ў аднолькавым становішчы — я маю на ўвазе перадусім сваіх паплечнікаў па фракцыі «Рэспубліка».
Дэпутаты Палаты Прадстаўнікоў Сяргей Скрабец і Ўладзімер Парфяновіч трымаюць плякат «Свабоду Марынічу» ля будынка рэспубліканскага КДБ, Менск, красавік 2004

Дэпутаты Палаты Прадстаўнікоў Сяргей Скрабец і Ўладзімер Парфяновіч трымаюць плякат «Свабоду Марынічу» ля будынка рэспубліканскага КДБ, Менск, красавік 2004


У 2000 годзе Парфяновіча абралі на дэпутата Палаты прадстаўнікоў. Неўзабаве разам з калегамі Сяргеем Скрабцом і Валерыем Фраловым яны заснавалі парлямэнцкую фракцыю «Рэспубліка» — адзіную апазыцыйную за ўсю гісторыю «палаткі». Паралельна Парфяновіч узначальваў Беларускую фэдэрацыю веславаньня на байдарках і каноэ, быў сябрам Нацыянальнага алімпійскага камітэту. Крыж на кар’еры быў пастаўлены ў чэрвені 2004 году, калі «рэспубліканцы» распачалі галадоўку пратэсту, бо не маглі ўключыць у парадак дня сэсіі ўнясеньне зьменаў у Выбарчы кодэкс. Разам з завяршэньнем паўнамоцтваў Парфяновіч быў выведзены са складу НАК (з фармулёўкай «страта даверу») і перастаў быць старшынём фэдэрацыі.
Дэпутаты Ўладзімер Парфяновіч, Валеры Фралоў і Сяргей Скрабец, чэрвень 2004

Дэпутаты Ўладзімер Парфяновіч, Валеры Фралоў і Сяргей Скрабец, чэрвень 2004


Спартовую галіну пасьля гэтага рэфармавалі — байдарку і каноэ злучылі з акадэмічным веславаньнем, а на чале паставілі тагачаснага старшыню Нацыянальнага банку Пятра Пракаповіча. Ці апраўданае дэлегаваньне паўнамоцтваў людзям, далёкім ад спорту?

«Так, дагэтуль дысцыпліны былі паасобку, але Пракаповіч кіраваў ужо дзьвюма фэдэрацыямі. І такога, што зрабілі ў Беларусі, усё скінуўшы ў адну кучу, нідзе больш няма. Гэта азначае, што людзям па барабану — акадэмічнае веславаньне, байдарка. Так яны расьпісваюцца ва ўласным дылетантызьме. Я ўвогуле не разумею нашага прэзыдэнта, які ставіць кіраваць людзей, гледзячы толькі на іх адданасьць, а не на іх прафэсіяналізм. Вось у чым памылка. Вядома, як будуць грошы, то можна зрабіць цуд. Але найперш павінны быць людзі, якія ўмеюць працаваць не наверсе, а ўнізе. Вось тады добра будзе. Не адданыя, а кваліфікаваныя людзі».

Адчаяўшыся знайсьці працу ў Беларусі, Уладзімер Парфяновіч прыняў прапанову ад Расеі і быў прызначаны на пасаду памочніка прэзыдэнта Ўсерасейскай фэдэрацыі веславаньня на байдарках і каноэ. Неўзабаве стаў старшым трэнэрам зборнай Расеі па мужчынскай байдарцы. Пры канцы мінулага тыдня прэзыдыюм фэдэрацыі пастанавіў прызначыць Парфяновіча галоўным трэнэрам зборных камандаў. Пры гэтым ён застаецца грамадзянінам Беларусі.

Паказаць камэнтары

XS
SM
MD
LG