Лінкі ўнівэрсальнага доступу

Стратэгія Захаду адносна Беларусі ўклалася ў адзін сказ


Анатоль Лябедзька

Анатоль Лябедзька

Яна сфармуляваная так: «Вызваленьне і рэабілітацыя палітвязьняў, сумленныя і свабодныя выбары».

«Такая падача ў адным сказе абсалютна ясная і зразумелая», — заявіў міністар па справах Эўропы ўраду Вялікай Брытаніі Дэвід Лідынгтан падчас сустрэчы зь лідэрам Аб’яднанай грамадзянскай партыі Анатолем Лябедзькам. А міністар замежных спраў Вялікай Брытаніі Ўільям Хэйг сказаў спадару Лябедзьку, што надзвычай важна ня толькі дамагчыся вызваленьня цяперашніх вязьняў, але і ні ў якім выпадку не дапусьціць зьяўленьня новых.

Анатоль Лябедзька сёньня вярнуўся зь Лёндану, дзе быў госьцем зьезду правячай кансэрватыўнай партыі Вялікай Брытаніі. Ён распавёў «Свабодзе»:

«Злучанае Каралеўства — гэта тая краіна, голас якой чутны ў любым пытаньні. Таму я выкарыстаў запрашэньне на форум сястрынскай партыі, каб размаўляць па розных беларускіх пытаньнях. Атрымалася нядрэнна. Штодня было каля дзясятка сустрэч з парлямэнтарамі, чальцамі ўраду, уплывовымі палітыкамі. Найважнейшыя — зь міністрамі Лідынгтанам і Хэйгам.

Лідынгтану я перадаў зварот, падпісаны мною, Андрэем Саньнікавым і Віталём Рымашэўскім. Гэта ў зьвязку з разьмяшчэньнем у нашай краіне расейскай авіябазы. На наш погляд, гэта парушае ня толькі дзейную Канстытуцыю Рэспублікі Беларусь, але і будапэшцкі Мэмарандум аб гарантыях для Беларусі, які падпісалі ў тым ліку і брытанцы. Мы лічым вельмі важным, каб з Вашынгтону і Лёндану прагучалі заявы, што гэтыя краіны — пасьлядоўнымі прыхільнікі тых гарантыяў».

Анатоль Лябедзька сказаў таксама, што ён перадаў брытанскім парлямэнтарам, якія прадстаўляюць сваю краіну ў Парлямэнцкай асамблеі АБСЭ, інфармацыю пра кулюарныя пляны беларускіх уладаў спыніць дзейнасьць спэцыяльнай рабочай групы па Беларусі ў гэтай міжнароднай структуры:

«Я думаю, што галасы брытанцаў у Парлямэнцкай асамблеі АБСЭ ня будуць пададзеныя за скасаваньне рабочай групы па Беларусі».

І яшчэ адна важная тэма размоваў у Лёндане — саміт краін «Усходняга партнэрства» ў Вільні. «Я выказаў агульную думку беларускай дэмакратычнай супольнасьці. Мы зацікаўленыя, каб былі адчыненыя дзьверы для Ўкраіны, Малдовы, Грузіі. Гэта дапаможа нам больш прадметна працаваць унутры сваёй краіны».

Паказаць камэнтары

XS
SM
MD
LG