Лінкі ўнівэрсальнага доступу

«Гавары праўду» рыхтуецца да мясцовых выбараў


Агітацыйны пікет «Гавары праўду», архіўнае фота

Агітацыйны пікет «Гавары праўду», архіўнае фота

Грамадзянская кампанія «Гавары праўду» падвяла вынікі году пасьля парлямэнцкіх выбараў і абвясьціла пра пачатак падрыхтоўкі да мясцовых выбараў, якія адбудуцца ў сакавіку 2014-га.

Год назад актывісты кампаніі «Гавары праўду» далі абяцаньне, што не пакінуць сваіх выбаршчыкаў. За гэты год у офісы кампаніі зьвярнулася каля 2000 чалавек, прыйшло больш за 100 актывістаў, што дазваляе ўжо сёньня мець сьпіс патэнцыйных кандыдатаў у дэпутаты мясцовых Саветаў амаль у 400 чалавек, кажа адзін зь лідэраў кампаніі Андрэй Дзьмітрыеў:

«На сёньняшні дзень у нас калі 400 кандыдатаў. Да выбараў яшчэ ёсьць час, можа, іх будзе больш. Наша мэта сёньня — паклікаць на выбары простых людзей. Мы кажам: ідзіце на выбары і самі распавядайце пра свае праблемы. А мы будзем вам толькі дапамагаць.
Андрэй Дзьмітрыеў

Андрэй Дзьмітрыеў


У нас няма пагоні за колькасьцю. Мы гонімся за тым, каб у кандыдаты пайшлі звычайныя беларусы, а ідуць туды за тым, каб распавесьці гісторыю жыцьця, гісторыю праблемаў. Мы ставім перад сабой, безумоўна, пэўныя мэты, але калі ў нас будзе не 5 тысяч, а 400, гэта будзе добра. Тут галоўнае, мне падаецца, ня колькасьць. Тут галоўнае — як кожны будзе змагацца за галасы беларусаў».

Юры Салодкі

Юры Салодкі

Юрыст Юры Салодкі ў кампаніі «Гавары праўду» актыўна змагаецца супраць незаконных забудоваў, ушчыльненьняў, высечкі паркаў і сквэраў. Ён дамогся ад сталічных уладаў, каб тыя азнаёмілі народ з гарадзкім бюджэтам. Зьбіраецца стаць кандыдатам у дэпутаты Менгарсавету:

«У Менску ў нас на сёньняшні дзень больш за 30 патэнцыйных кандыдатаў. І зараз займаемся праблемамі мясцовага бюджэту. Вельмі цікавая тэма. Адразу глядзіш — усё выглядае больш-менш прыстойна: нармальныя грошы і на сацыяльныя мэты ідуць, і на іншыя сфэры нямала. Але потым, калі пачынаеш разьбірацца — вельмі шмат такіх артыкулаў у расходнай частцы, і не разумееш, куды ідуць гэтыя грошы. Напрыклад, у мясцовым бюджэце ёсьць асобны разьдзел на нацыянальную абарону. На што гэта ідзе ў Менску? Калі мы пачынаем удакладняць, куды яны канкрэтна пайшлі, на якія мерапрыемствы — адказаў дакладных няма, нейкія размытыя фармулёўкі, і ўсё. Мы разумеем, што за гэтым, напэўна, хаваецца карупцыя, дробная ці буйная, зараз будзем высьвятляць. І будзем далей працаваць зь людзьмі».

Лідзія Сагідуліна

Лідзія Сагідуліна

Каардынатар кампаніі на Віцебскай вобласьці Лідзія Сагідуліна кажа, што цяпер асноўная праца ў рэгіёнах — гэта пошук кандыдатаў ня зь ліку апазыцыі і ня зь ліку дэмакратычных актывістаў. І атрымліваецца гэта празь лякальныя акцыі ў гарадах, дзе кампанія мае офісы: у Глыбокім, Воршы, Полацку, Віцебску.

«Людзі спачатку зьвяртаюцца ў пошуку вырашэньня праблемы, мы падказваем, як дзейнічаць, і чалавек разумее, што можа гэта зрабіць сам, яшчэ сам камусьці дапамагчы. І калі мы кажам пра выбары, што ў нас ёсьць каманда, мы можам аказаць дапамогу, падтрымку, падказаць, як гэта рабіць, — чалавек кажа: «А чаму б мне не паспрабаваць? Чаму я буду галасаваць за таго, каго прызначаць?»

Лідзія Сагідуліна распавяла, што літаральна ўчора знайшлі патэнцыйнага кандыдата ў аграгарадку, а таксама ў райцэнтры.

Паказаць камэнтары

XS
SM
MD
LG