Лінкі ўнівэрсальнага доступу

«Вышаградзкая чацьвёрка » падтрымала падпісаньне пагадненьня Ўкраіны і ЭЗ


«Вышаградзкая чацьвёрка» таксама абавязалася дапамагчы Ўкраіне выкарыстоўваць увесь патэнцыял «Усходняга партнэрства» і стварыць неабходныя палітычныя ўмовы для падпісаньня пагадненьня аб асацыяцыі.

Краіны «Вышаградзкай групы» (V4) падтрымліваюць заключэньне пагадненьня аб асацыяцыі паміж Украінай і ЭЗ і лічаць , што дакумэнт не накіраваны супраць трэціх краін , гаворыцца ў супольнай заяве міністраў замежных справаў групы V4 , апублікаванай на сайце МЗС Вугоршчыны ў чацьвер.

«Краіны „Вышаградзкай групы“ (Польшча, Чэхія, Славаччына, Вугоршчына) безумоўна падтрымліваюць падпісаньне пагадненьня аб асацыяцыі ў Вільні і яго максымальна шырокае прымяненьне, што будзе ў роўнай ступені служыць інтарэсам Украіны і краін-удзельніц ЭЗ», — гаворыцца ў заяве. Міністры таксама падкрэсьлілі, што падпісаньне пагадненьня не супярэчыць і не накіравана супраць інтарэсаў трэціх краін.

Разам з тым міністры чакаюць, што на заключным этапе падрыхтоўкі саміту ў Вільні ўрад Украіны актывізуе намаганьні для прыняцьця неабходных законаў, накіраваных на рэфармаваньне пракуратуры, паляпшэньне выбарчага заканадаўства і вырашэньне праблемы выбіральнага прымяненьня правасудзьдзя.

«Вышаградзкая чацьвёрка» таксама абавязалася дапамагчы Ўкраіне выкарыстоўваць увесь патэнцыял «Усходняга партнэрства» і стварыць неабходныя палітычныя ўмовы для падпісаньня пагадненьня аб асацыяцыі.

Украіна зьбіраецца ў лістападзе падпісаць у Вільні на саміце «Ўсходняга партнэрства» пагадненьне аб асацыяцыі з ЭЗ, часткай якога зьяўляецца палажэньне аб зоне свабоднага гандлю. Адначасова Ўкраіну запрашаюць у Мытны саюз Расеі , Беларусі і Казахстану і ўжо далі ёй статус назіральніка, аднак Кіеў заяўляе, што не гатовы да паўнавартаснага ўступленьня ў МС.

Праграма «Ўсходняе партнэрства» скіравана на збліжэньне ЭЗ з Азербайджанам, Арменіяй, Грузіяй, Малдовай, Беларусьсю і Ўкраінай. «Усходняе партнэрства» не прадугледжвае магчымасьці сяброўства ў ЭЗ, але прадугледжвае палітычнае і эканамічнае збліжэньне з гэтай рэгіянальнай арганізацыяй, у тым ліку палягчэньне візавага рэжыму і супрацоўніцтва ў сфэры энэргетыкі. Устаноўчы саміт «Усходняга партнэрства» адбыўся 7 траўня 2009 года ў Празе.
XS
SM
MD
LG