Лінкі ўнівэрсальнага доступу

Абласны суд ня стаў на бок сацдэмакратаў, якія даводзяць, што яны ня «банда»


16 верасьня Магілёўскі абласны суд пакінуў бязь зьменаў пастанову Ленінскага суду Магілёва. Актывісты Беларускай сацыял-дэмакратычнай партыі «Грамада» дамагаюцца выбачэньняў ад начальніка «Магілёўаблсельбуду» Паўла Шышова. Раней раённы суд прыняў бок чыноўніка.

Пакінутая без задавальненьня і касацыйная скарга сябра партыі Мікалая Залознага. Скаргі разглядала калегія па грамадзянскіх справах абласнога суду пад старшынствам судзьдзі Сьвятланы Стальмаховай.

У судах партыйцы дамагаюцца, каб начальнік жыльлёва-эксплюатацыйнага прадпрыемства «Магілёўаблсельбуд» Павал Шышоў публічна выбачыўся за зьняважлівае, як лічаць скаржнікі, выказваньне пра партыю.

Адказваючы на пытаньне, чаму высяляюць з інтэрнату Мікалая Залознага, Шышоў заявіў, што той «состоит в этой банде „Грамада“». Кіраўніцтва БСДП «Грамада» і Залозны палічылі, што гэтае выказваньне зроблена наўмысна, каб зьняважыць дзелавую рэпутацыю Беларускай сацыял-дэмакратычнай партыі «Грамада».

Павал Шышоў, палкоўнік міліцыі ў адстаўцы, абвінавачваньняў апазыцыйнай арганізацыі і ейнага сябра не прызнае. Заяўляе, што Сацыял-дэмакратычную партыю «Грамада» бандай не называў, а само выказваньне лічыць падробленым.

Сябру прэзыдыюму партыі Ігару Барысаву было даручана прадстаўляць яе інтарэсы пры разглядзе скаргаў у судах. Але да ўдзелу ў сёньняшнім пасяджэньні ў якасьці прадстаўніка яго не дапусьцілі. Судзьдзі ўгледзелі ў дакумэнтах, выпісаных на актывіста, недакладнасьці. За ходам разгляду ён мог толькі назіраць.
Адмовіліся праслухоўваць аўдыёзапіс сюжэту, у якім нас называюць бандай

«Суд доўжыўся ня больш за 15 хвілін. Пастанавіў, што раённы суд нічога не парушыў і ягонае рашэньне правамернае. Адмовіліся праслухоўваць аўдыёзапіс сюжэту, у якім нас называюць бандай, а таксама рабочы матэрыял Асіпцова. Патлумачылі, што іх слухалі. Нас пазбавілі, такім чынам, у судзе мэханізмаў абароны. Шышоў жа — палкоўнік міліцыі, а вэртыкаль улады бароніць сваіх людзей усімі магчымымі сродкамі. Дабіцца справядлівасьці ў нашых судах немагчыма, калі справа тычыцца апазыцыйнай арганізацыі», — лічыць Ігар Барысаў.

Сябры партыі заяўляюць, што яны зьвернуцца ў камітэт ААН па правах чалавека, каб дамагчыся справядлівасьці і абараніць імя партыі.

29 траўня Ленінскі суд Магілёва не задаволіў хадайніцтва сацыял-дэмакратаў аб правядзеньні экспэртызы выказваньня Паўла Шышова ў апублікаваным аўдыёматэрыяле і рабочай стужцы Асіпцова. Як даводзілі суду партыйцы, экспэртыза вызначыла б, ці журналіст падрабіў запісы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG