Лінкі ўнівэрсальнага доступу

Ужо сёньня, 16 верасьня: Прэзэнтацыя кнігі «Дзевяноста першы» Сяргея Навумчыка; дзень памяці Віктара Ганчара і Анатоля Красоўскага


Бліц-агляд падзеяў і тэмаў у Беларусі, сьвеце, гісторыі.


ПАДЗЕІ ДНЯ

«Дзевяноста першы» — так называецца новая кніга «Бібліятэкі Свабоды». Яе аўтар — супрацоўнік нашага радыё, дэпутат Вярхоўнага Савету XII скліканьня Сяргей Навумчык — быў непасрэдным удзельнікам падзеяў 1991-га. На падставе захаваных дакумэнтаў ён распавядае, як, кім і пры якіх абставінах была здабытая незалежнасьць Беларусі. Прэзэнтацыя новай кнігі адбудзецца 16 верасьня на сядзібе БНФ у Менску (вуліца Чарнышэўскага, 3) а 18.00.

У офісе Таварыства беларускай мовы (Менск, вул. Румянцава, 13) у рамках кампаніі «Будзьма» будзе працаваць гістарычная школа «Гісторыя ў падзеях і малюнках» пад кіраўніцтвам кандыдата гістарычных навук Алега Трусава. Заняткі прысьвечаныя вывучэньню гісторыі Беларусі ў яе этнаграфічных межах. Пачатак а 18.00.

У Менскай філярмоніі – «Рух музычны», канцэрт старажытнай беларускай музыкі ў выкананьні ансамбля салістаў «Класік-авангард». Пачатак а 19:00.

У Празе праходзіць другі дзень міжнароднай канфэрэнцыі «Форум 2000», у якой больш за 100 вядомых палітыкаў, акадэмічных славутасьцяў, прадстаўнікоў грамадзянскай супольнасьці, СМІ, бізнэсу і рэлігіі абмяркоўваюць выклікі і пагрозы, зьвязаныя з працэсамі дэмакратызацыі.

ГЭТЫ ДЗЕНЬ У ГІСТОРЫІ

1810 — Мэксыка абвясьціла незалежнасьць ад Гішпаніі.

1908 — заснавана амэрыканская кампанія General Motors, якая была найбуйнейшым вытворцам аўтамабіляў на сьвеце да 2007 году, калі гэты тытул забрала ў яе японская Таёта.

1909 — нарадзіўся Лукаш Калюга, беларускі пісьменьнік. У 1931 скончыў Беларускі пэдагагічны тэхнікум, уваходзіў у літаратурнае аб’яднаньне «Узвышша». Пачаў публікаваць аповесьці і апавяданьні з 1927. У студзені 1933 арыштаваны і асуджаны на 5 гадоў пазбаўленьня волі, сасланы ў Ірбіт (цяпер Краснаярскі край). Паўторна арыштаваны 5 кастрычніка 1937 і ў той самы дзень расстраляны. У 1974 выйшаў яго зборнік апавяданьняў і аповесьцяў «Ні госьць ні гаспадар».

1938 — нарадзіўся Віктар Дашук, беларускі кінарэжысэр-дакумэнталіст.

1946 — нарадзіўся Сяргей Законьнікаў, беларускі паэт і публіцыст.

1963 — узьнікла фэдэратыўная дзяржава Малайзія.

1970 — у апытаньні музычнага часопісу «New Musical Express» тытул найлепшай групы году дастаўся «Led Zeppelin». Гэты рок-гурт перамог і ў апытаньні чытачоў газэты «Melody Maker». Да гэтага апытаньня сем гадоў запар найлепшай музычнай групай Вялікабрытаніі брытанцы нязьменна называлі «The Beatles», якая ў верасьні 1970 ужо не існавала.



1999 — зьніклі беларускі палітык Віктар Ганчар і прадпрымальнік Анатоль Красоўскі.

ЦЫТАТЫ НА ПАМЯЦЬ:

«Кожны музыка хоча зрабіць нешта, што застанецца ў памяці на працягу доўгага часу. Я думаю, мы дасягнулі гэтага зь «Лесьвіцай у неба».

Джымі Пэйдж, гітарыст «Led Zeppelin»

«Лепш памерці на ўзбочыне, але дасягнуць сваёй мэты, чым пражыць сто гадоў, усьведамляючы, што здрадзіў сабе».

Робэрт Плант, вакаліст «Led Zeppelin»

Паказаць камэнтары

XS
SM
MD
LG