Лінкі ўнівэрсальнага доступу

logo-print

Lidové noviny: «Бяляцкі — найбліжэйшы да асобы Вацлава Гаўла»


Вацлаў Гавэл і Алесь Бяляцкі падчас уручэньня прэміі Homo Homini

Вацлаў Гавэл і Алесь Бяляцкі падчас уручэньня прэміі Homo Homini

Чэская прэса лічыць, што найбольшыя шанцы атрымаць прэмію Вацлава Гаўла — у Алеся Бяляцкага.

Што пераважыць пры прысуджэньні прэміі Вацлава Гаўла: арыгінальнасьць намінанта, яго сусьветная вядомасьць альбо эфэкт падтрымкі, разважае чэская газэта Lidové noviny.

Яшчэ калі засноўвалася праваабарончая прэмія імя Вацлава Гаўла, чэскія праваабаронцы і журналісты адзначалі, што яна сутыкнецца з канкурэнцыяй. Бо ўзнагарода мае амбіцыі стаць прэміяй эўрапейскага маштабу, супастаўнай з Сахараўскай прэміяй за свабоду думкі. Стаяла задача знайсьці намінантаў, якія мелі б «гаўлаўскае» рэнамэ. Было адабрана трое прэтэнтаў: Алесь Бяляцкі, грузінская Асацыяцыя маладых адвакатаў і кітайская Суполка ў абарону правоў чалавека.
Прэмія Гаўла — міжнародная, і вырашаць яе лёс будзе міжнароднае журы, але калі разважаць, хто сам бліжэйшы да асобы Вацлава Гаўла, то гэта менавіта Алесь Бяляцкі

«Выбар будзе нялёгкі, — пішуць Lidové noviny. — Калі весьці размову пра арыгінальнасьць, то варта было б аддаць узнагароду прэтэндэнту з Грузіі, бо яшчэ ніхто з Грузіі не атрымліваў прэстыжнай праваабарончай прэміі. Калі мець на ўвазе маштабнасьць — тут на першае месца выходзіць Кітай. Але што да эфэкту падтрымкі — узнагароды найбольш заслугоўвае Алесь Бяляцкі.»

Газэта адзначае, што ў гэтым выпадку, вядома, прападае арыгінальнасьць, бо беларускую апазыцыю ўжо ўзнагароджвалі прэміяй Сахарава ў 2004 і 2006 гадах, больш за тое — самому Алесю Бяляцкаму ў 2005 годзе арганізацыя «Чалавек у нядолі» прысуджала прэмію Homo Homini. «Але таму, хто пры Лукашэнкавым рэжыме асуджаны за ўхіленьне ад выплаты падаткаў — за тое, што на ягоны рахунак прыходзілі грошы з-за мяжы — гэтая прэмія была б да месца. Бо была б вельмі добра зразумелай у краіне Вацлава Гаўла, дзе дысыдэнты ў свой час самі сутыкаліся з «валютнымі парушэньнямі».

Прэмія Гаўла — міжнародная, і вырашаць яе лёс будзе міжнароднае журы, але калі разважаць, хто сам бліжэйшы да асобы Вацлава Гаўла, то гэта менавіта Алесь Бяляцкі, падсумоўваюць Lidové noviny.

Ляўрэат прэміі будзе абвешчаны 30 верасьня.
XS
SM
MD
LG