Лінкі ўнівэрсальнага доступу

Нацболы пакараныя штрафамі


Сёньня праходзяць суды над затрыманымі 8 жніўня нацболамі — Яўгенам Контушам, і Дзьмітрыем Паліенкам.

Цэнтральны суд Менску прызнаў двух беларускіх нацыянал-бальшавікоў вінаватымі ў правядзеньні 6 жніўня акцыі каля Міністэрства абароны і пакараў іх штрафамі — кожнаму па 12 базавых велічынь. Актывісты казалі, што ня ўдзельнічалі ў акцыі, і прадставілі сьведак, да якіх суд не прыслухаўся.

22 жніўня ў суд былі выкліканыя нацыянал-бальшавікі Дзьмітрый Паліенка і Яўген Контуш. Абодвух 8 жніўня затрымалі на вуліцы і ў той жа дзень пачалі судзіць за акцыю 6 жніўня, калі побач зь Мінабароны была вывешана расьцяжка «Далоў войска нявольнікаў!» Тады суд палічыў, што міліцыя сабрала недастаткова матэрыялаў для адміністратыўных спраў, і адправіў дакумэнты на дапрацоўку. Працэсы адбыліся сёньня. Працаўніка МАЗу Дзьмітрыя Паліенку асудзілі за 10 хвілін. Ягоны сьведка Цімур Прыходчанка засьведчыў, што Дзьмітрый 6 жніўня ў час акцыі каля Мінабароны быў зусім у іншым месцы. Сьведкі-міліцыянты ў суд не зьявіліся. Як было сказана, яны знаходзяцца ў адпачынку. Судзьдзя Вікторыя Шабуня зачытала іхнія паказаньні і прызнала Дзьмітрыя Паліенку вінаватым. Штраф у 1 мільён 200 тысяч рублёў за акцыю, у якой ня браў удзелу, працаўнік МАЗу лічыць адчувальным і незаслужаным пакараньнем. Дзьмітрый адзначае, як судзьдзя Вікторыя Шабуня правяла судовы разбор:

Дзьмітрый Паліенка

Дзьмітрый Паліенка

«Мой адвакат патрабаваў, каб узялі запіс відэакамэры зь Мінабароны, па якім магчыма было высьветліць, ці быў я на акцыі, але судзьдзя гэтае хадайніцтва не задаволіла. Ды, калі шчыра, я і не чакаў, што мяне апраўдаюць. Прыйшоў у суд з торбай з рэчамі, не выключаў, што дадуць суткі. Аказалася — штраф. Такое ўжо ня раз бывала. Прыкладам, напярэдадні 3 ліпеня нас хапаюць і потым судзяць нібыта за тое, што лаяліся матам».

Працэс над Яўгенам Контушам цягнуўся больш за паўгадзіны. Сьведкам Яўгена выступіла ў судзе ягоная маці Марына Контуш, якая даводзіла, што 6 жніўня сын быў дома. На гэты працэс таксама не зьявіліся сьведкі-міліцыянты, і суд задаволіўся зачытваньнем іхніх паказаньняў, згодна зь якімі актывіст падчас акцыі знаходзіўся каля Міністэрства абароны. Яўген Контуш назваў гэтыя паказаньні хлусьнёй і вінаватым сябе не прызнаў. У камэнтары пасьля суду актывіст руху беларускіх нацыянал-бальшавікоў сказаў пра дзеяньні менскай міліцыі:

«Зьявілася зусім сумная тэндэнцыя: увогуле ня хочуць разьбірацца і шукаць вінаватых у „правапарушэньні“, а хапаюць усіх, хто значыцца ў іхных сьпісах ці базах дадзеных. Спрабуюць на іхнім прыкладзе запалохаць усіх астатніх, што без наступстваў нічога не застанецца. Таму ўсім актывістам трэба трываць і не баяцца».

26 жніўня ў Менскім раённым судзе адбудзецца працэс над яшчэ адным актывістам нацыянал-бальшавікоў — Дзянісам Сахарам, якога затрымалі 10 жніўня падчас летніка на вадасховішчы Пціч. Справу Дзяніса Сахара таксама адправілі на дапрацоўку. Актывіста абвінавачваюць у непадпарадкаваньні міліцыі, чаго ён за сабой не прызнае. Дзяніс мяркуе, што яму таксама помсьцяць за акцыю каля Міністэрства абароны, дзе быў вывешаны лёзунг «Далоў войска нявольнікаў!»

Паказаць камэнтары

XS
SM
MD
LG