Лінкі ўнівэрсальнага доступу

logo-print

Гарадзенскія таксісты распачалі збор подпісаў супраць праекту ўказу аб рэгуляваньні працы таксі, які рыхтуецца Міністэрствам транспарту.

Сяргей Верамеенка —таксіст. Сваім пасажырам ён прапаноўвае падпісацца супраць указу, які цяпер рыхтуецца. З праектам ён азнаёміўся ў інтэрнэце. Калі ўказ будзе падпісаны, то ўжо з траўня наступнага году забароняць эксплюатацыю ў якасьці таксі ня толькі машын, старэйшых за 8 гадоў, але і тых, якія не адпавядаюць габарытам: 4,4 мэтра ў даўжыню і 1,7 мэтра ў шырыню.

Верамеенка перакананы, што падобны ўказ можа моцна нашкодзіць як таксістам, так і пасажырам.

Сяргей Верамеенка

Сяргей Верамеенка

Верамеенка: «Галоўнае, што цяперашні ўзровень жыцьця ў Беларусі такі, што кіроўца таксі зараз ня можа сабе дазволіць набыць новае аўта за 15–20 тысяч даляраў. І пасажыры, карыстальнікі нашага таксі, таксама ня могуць плаціць 50 і 100 тысяч за адну паездку. А калі гэты ўказ уступіць у сілу, то кошты на праезд моцна ўзрастуць».

Яшчэ адзін кіроўца таксі, Валянцін, які паставіў подпіс пад зваротам, тлумачыць, што ва ўказе прадугледжваюцца вельмі жорсткія патрабаваньні да аўта.

Спадар: «На дадзены момант на рынку прысутнічае вельмі мала такіх машынаў. А па-другое, набыць больш новае аўта праблематычна, бо ў краіне вельмі высокае ўвазное мыта. І само паняцьце — да васьмі гадоў — занадта жорсткае. Хапіла б і 12 гадоў, бо прыдатнасьць транспартнага сродку для эксплюатацыі ў нас вызначаецца тэхаглядам, а гэта і ёсьць жорсткія патрабаваньні, і зь іх трэба зыходзіць».

Кіроўца таксі з дваццацігадовым досьведам спадар Мікалай з абурэньнем успрыняў праект новага ўказу:

Спадар: «А чорт іх ведае, жывём як на вулькане: сёньня так, а заўтра так. У мяне вось машына добрая, якраз для пасажыраў: шэсьць месцаў, шосты год — сама людзей вазіць. І таксомэтар працуе як мае быць, і кандыцыянэр... От, сядзяць у гэтых кабінэтах і выдумляюць, абы выдумаць...»

Пасажырка, спадарыня Кацярына, якая, зь яе слоў, часта карыстаецца паслугамі таксі, кажа, што чытала пра гэта ў інтэрнэце. Распавядае, што днямі прыехала зь Вільні і там езьдзіла на таксоўках, якім па 12–13 гадоў. Галоўнае, што аўта ў добрым стане.

Яна перакананая: навацыі для беларускіх таксістаў зьвязаныя з тым, што Лукашэнка распачаў выпуск сумесна з кітайцамі новых аўта, і паколькі, на яе думку, наўрад ці знойдуцца ахвотныя іх купляць, то трэба такім чынам некага абавязаць.

Спадарыня: «Па-першае, мне шкада тых таксістаў, якія гэтай працай зарабляюць грошы для сваіх сем’яў. Вось у чалавека — добрая машына, але пасьля гэтага ўказу ён павінен будзе адставіць яе ўбок і невядома чым заняцца. А па-другое, ведаючы нашу ўладу, якая нічога для людзей ня робіць, а толькі выцягвае зь іх апошняе, думаю, гэта будзе чарговая авантура з кітайскімі машынамі».

Яшчэ адзін пасажыр, Аляксей, кажа, што ўзровень таксі ў Беларусі варта падымаць, але, на яго думку, гэта павінны быць перш за ўсё разумныя, пралічаныя захады.

Спадар: «Так, сапраўды ёсьць машыны, якія насамрэч не адпавядаюць паслугам таксі. Але можна нават на ўзроўні мясцовых уладаў вырашыць гэтую праблему, зрабіць гарадзкія дазволы на адпаведнасьць зьнешняга выгляду і г.д. І пры гэтым не ламаць ніякіх дроў».

Кіраўнік гарадзенскай фірмы «Веста» Ўладзіслаў Пашкоўскі кажа, што прачытаў пра праект указу таксама ў інтэрнэце. Але ён ня верыць, што ў Беларусі нешта падобнае можа быць прынята.

Пашкоўскі: «Гэта нерэальна — у людзей няма грошай купляць новыя машыны да васьмі гадоў. Тым больш у Горадні толькі 20% машынаў, якія адпавядаюць гэтаму ўказу. А калі яшчэ ўзгадаць пра габарыты, то гэта наагул неверагодна».

Паводле Сяргея Верамеенкі, у Горадні зьбіраюць подпісы 15 чалавек, пад зваротам ужо падпісаліся каля 200 чалавек, да гарадзенскіх таксістаў далучаюцца іхнія калегі з Ваўкавыску і Менску. Зварот плянуюць накіраваць у Міністэрства транспарту Беларусі, а таксама ў адміністрацыю прэзыдэнта.

XS
SM
MD
LG