Кожная зьмена палітычнага рэжыму ў Эгіпце прыводзіць да гвалту і значных ахвяраў.
Вынікам чарговага супрацьстаяньня паміж прыхільнікамі зрынутага прэзыдэнта Мухамэда Мурсі і вайсковымі падразьдзяленьнямі сталі сотні забітых і тысячы параненых. Па ўсёй краіне на месяц абвясьцілі надзвычайнае становішча, а ў некаторых правінцыях увялі камэнданцкую гадзіну. Абмежаваньні закранулі і папулярныя курорты, дзе любяць адпачываць і беларускія турысты. Ці адбіліся крывавыя падзеі ў Эгіпце на колькасьці ахвотных правесьці там вакацыі?
Беспарадкі, якія разгарнуліся ў эгіпецкіх гарадах і каштавалі жыцьця больш як чатыром сотням чалавек, істотна адкарэктавалі магчымасьці турыстычнай галіны. На неакрэсьлены час спыніліся папулярныя экскурсіі да пірамідаў у Гізе ды іншых гістарычных аб’ектаў; камэнданцкая гадзіна ахапіла і такія прыцягальныя гарады Паўднёвага Сінаю, як Шарм-аль-Шэйх, Дахаб, Нувэйба, Таба, вакол якіх багата папулярных курортаў. Забурэньні адбыліся і ў Хургадзе — прыхільнікі Мухамэда Мурсі атакавалі паліцэйскі пастарунак, занялі вакзал і цэнтральную плошчу. У такой сытуацыі рэальным застаецца выключна адпачынак у «рэзэрвацыях», абмежаваных тэрыторыяй гатэля.
У Міністэрстве спорту і турызму Беларусі ня маюць дадзеных пра тое, колькі беларусаў цяпер адпачывае ў Эгіпце. Як удакладняе прадстаўнік ведамства Ўладзімер Несьцяровіч, шмат хто карыстаецца больш прывабнымі прапановамі замежных кампаніяў і ў турыстычную статыстыку не трапляе:
«Можна казаць толькі пра тых турыстаў, якія ляцяць праз Нацыянальны аэрапорт,
На жаль, беларусы, расейцы, украінцы ды іншыя славяне калі ўжо набылі пуцёўку, то, хутчэй за ўсё, паедуць — на ўласны страх і рызыку
яны зафіксаваныя. Але справа ў тым, што многія ляцяць зь Вільні, з Кіева, з Масквы, з розных іншых месцаў. І адсачыць, хто зь іх цяпер і ў якой колькасьці знаходзіцца ў Эгіпце, наўрад ці ўяўляецца магчымым. Можа, хіба праз запыт у афіцыйныя органы, адпаведныя міністэрствы і турыстычныя кампаніі Эгіпту. Але я думаю, што зараз гэта будзе надзвычай праблематычна — там занятыя яўна не адсочваньнем статыстыкі. На жаль, беларусы, расейцы, украінцы ды іншыя славяне часьцяком недаацэньваюць сур’ёзнасьць сытуацыі і калі ўжо набылі пуцёўку, то, хутчэй за ўсё, паедуць — на ўласны страх і рызыку. Думаюць, што да курортаў гэта не дакоціцца. Хоць цяпер якраз той выпадак, што хваляваньні дайшлі і да курортных зонаў».
У офісах беларускіх турыстычных фірмаў кажуць, што масавых адмоваў ад ужо набытых пуцёвак у Эгіпет няма — хіба што адзінкавыя выпадкі. На думку кіраўніка Рэспубліканскага саюзу турыстычных арганізацыяў Валянціна Цэхмэйстара, наўрад ці варта асьцерагацца тым, хто адпачывае ў гатэлях, але для ахвотных паезьдзіць з экскурсіямі магчымасьці згортваюцца:
Валянцін Цэхмэйстар
«На ўзроўні захадаў, прынятых урадам у частцы арганізацыі гатэльнага бізнэсу, усё застаецца бязь зьменаў. То бок, хто едзе атрымаць менавіта гатэльны адпачынак — суправаджэньне і бясьпека ў гатэлях застаюцца на ранейшым узроўні, ніхто туды не пранікае, і людзі адпачываюць. Іншая рэч наконт экскурсіяў, паездак у гэтым рэгіёне ў цэлым. Вось гэта сапраўды досыць рызыкоўна і небясьпечна. Таму і МЗС, і галіновае ведамства, і турфірмы пра ўсё гэта папярэджваюць. Але турысты ўсё роўна едуць, яны на гэта асабліва не зьвяртаюць увагі — пакуль ня здарыцца нешта надзвычайнае. Тады некаторыя на пэўны час задумаюцца, каб, зноў жа, потым пра гэта забыцца».
Афіцыйныя ведамствы Беларусі рэкамэндуюць турыстам усё ж устрымацца ад паездак у Эгіпет, адклаўшы падарожжа да лепшых часоў ці знайшоўшы альтэрнатыву. Але калі рашучасьць мацнейшая за страх, то, як кажа прадстаўнік Міністэрства спорту і турызму Ўладзімер Несьцяровіч, варта трымацца хоць бы элемэнтарных правілаў:
«Што тычыцца рэкамэндацыяў, то і МЗС, і наша ведамства рабілі папярэджаньні, як там толькі пачыналася абвастрэньне сытуацыі. Гэта ўжо было некалькі разоў, і цяпер мы да гэтай тэмы зноў вяртаемся. Як толькі пачало ўскладняцца становішча, наш дэпартамэнт турызму падрыхтаваў своеасаблівую памятку для турыстаў. Найперш, калі грамадзяне ўжо знаходзяцца ў эпіцэнтры падзеяў, то ні ў якім выпадку не рэкамэндуецца пакідаць свае гатэлі і курортныя зоны. Па-другое, не выяжджаць у буйныя гарады, дзе цяпер адбываюцца хваляваньні. Нарэшце, ні ў якім разе ня ўдзельнічаць у вулічных пратэстных акцыях на тым ці іншым баку. Само сабой, мы зьвяртаем увагу, што сытуацыя там складаная, напружаная і невядома, калі яна стабілізуецца».
Экспэрт у галіне турызму Валянцін Цэхмэйстар кажа, што, па вялікім рахунку, цяпер у Эгіпет няма чаго і ехаць — практычна на ўсіх курортах тэмпэратура перавышае 40 градусаў. Але паколькі з гледзішча цэнавых прапаноў гэты кірунак даступны нават сярэдняй катэгорыі беларускага насельніцтва, ён будзе мець устойлівы попыт у любую пару году:
«Ну, зараз там увогуле рабіць няма чаго, на мой погляд. Нават з пункту гледжаньня гарачыні, ня кажучы пра ўсё іншае. А вось дзесьці зь верасьня па травень — справа іншая. Цэнавыя парамэтры, плюс аптымальнасьць, раскручанасьць гэтага рынку — у адпаведнасьці з прапановай і попыт вызначаецца гэтаксама. А попыт стабільны. Альтэрнатыва, якую намагаліся перахапіць грэкі, баўгары, пакуль не апраўдалася. Так, яна мае месца, асабліва ў летні пэрыяд. Але Эгіпет як быў, так і застаецца, нічога яму асабліва не пагражае. Павінны здарыцца нейкія надта экстраардынарныя падзеі ў краіне, каб яны літаральна захліснулі аэрапорт ці самі курорты — тады можа быць. А тыя прапановы, якія стабільна прысутнічаюць на рынку, запатрабаваныя — людзі ляцяць і адпачываюць. Гэта хто аддае перавагу гатэльнаму бізнэсу, без экскурсіёнкі, без падарожжаў па краіне».
Тым часам у трывожных вестках з Эгіпту пачалі фігураваць турысты. Так, два дзясяткі грамадзянаў Польшчы, якія адпачывалі ў Табе за 250 кілямэтраў ад Шарм-аль-Шэйху, не змаглі вылецець на радзіму. Прыхільнікі Мурсі заблякавалі асноўныя дарогі, у выніку чаго палякі так і не дабраліся да аэрапорту. Аналітыкі схіляюцца да думкі, што замежнікам наўрад ці ўдасца застацца назіральнікамі ва ўнутраным канфлікце жыхароў Эгіпту, таму рэальна ці ўскосна, але непазьбежна нехта пацерпіць.
