Лінкі ўнівэрсальнага доступу

logo-print

Выступ Кена Хэнсьлі ў Менску адменены ўладамі без тлумачэньня прычын


Кен Хэнслі

Кен Хэнслі

Рок-музыкант зь Вялікабрытаніі Кен Хэнслі, былы ўдзельнік усясьветна вядомага гурту Uriah Heep, паведаміў у інтэрнэце, што беларускія ўлады забаранілі ягоны выступ у Менску, заплянаваны на 16 жніўня, і таму ён у Беларусь не прыедзе.

«Прывітаньне ўсім. На жаль, у мяне дрэнныя навіны. Канцэрт Ken Hensley & Live Fire Open Air Show у Менску адменены. Яго забаранілі беларускія ўлады. Прыношу выбачэньні ўсім, хто зьбіраўся ісьці ці набыў квіткі», — напісаў музыка ў Фэйсбуку.

15 жніўня прадпрыемства «Ціэнці», якое запрашала Кена Хэнсьлі ў Менск для ўдзелу ў цырымоніі ўручэньня музычнай прэміі рок-клюбу ТNТ, пацьвердзіла інфармацыю пра ягоны непрыезд, патлумачыла прычыны і абвясьціла пра магчымасьць атрымаць назад грошы за квіткі.

Паводле сайту tntrock.by, выступ Кена Хэнсьлі і групы Live Fire быў заплянаваны ў межах уручэньня «Прэміі ТNT» на пляцоўцы парку «Дрымлэнд». Мерапрыемства павінна было пачацца 16 жніўня а 18-й гадзіне, а выступ Кена Хэнсьлі плянаваўся на час пасьля 21.00 цягам дзьвюх гадзін. Аднак праводзіць мерапрыемства пасьля 21.00 забараніў Менгарвыканкам. Управа ідэалягічнай працы, культуры і спраў моладзі Менгарвыканкаму 12 жніўня даслала прадпрыемству «Ціэнці» ліст, у якім абмежавала час «...у сувязі са шматлікімі зваротамі грамадзян у пытаньні аб захоўваньні гукавога рэжыму падчас правядзеньня культурна-масавых мерапрыемстваў на тэрыторыі парку «Дрымлэнд».

У выніку прадпрыемства «Ціэнці» заявіла, што пераносіць уручэньне «Прэміі ТNT» у памяшканьне бару клюбу, і прапанавала тым, хто ўжо набыў квіткі, вярнуць за іх грошы.

Атрымаць камэнтар ва ўправе ідэалягічнай працы, культуры і спраў моладзі Менгарвыканкаму не ўдалося. Чыноўнікі ўправы, да якіх удалося дазваніцца, адправілі карэспандэнта Свабоды да намесьніцы начальніка ўправы Віталіны Рудзікавай, чый тэлефон не адказаў.

Ваша меркаваньне

Паказаць камэнтары

XS
SM
MD
LG