Лінкі ўнівэрсальнага доступу

Лукашанец заступіўся за трасянку


Фрагмэнт плякату Ўладзіміра Крукоўскага «Білінгвізм»
Фрагмэнт плякату Ўладзіміра Крукоўскага «Білінгвізм»
Да трасянкі трэба ставіцца як да натуральнай зьявы.

Такую думку сёньня выказаў старшыня Міжнароднага і Беларускага камітэтаў славістаў, член-карэспандэнт Нацыянальнай акадэміі навук Беларусі Аляксандар Лукашанец.

Яе паведамляе БЕЛТА, вядомы мовазнаўца, дырэктар Інстытуту мовы і літаратуры імя Якуба Коласа і Янкі Купалы Нацыянальнай акадэміі навук зьвярнуў увагу, што зьмешваньне дзьвюх моў — не спэцыфічна беларуская праблема:

«Гэта натуральная зьява для шматмоўных грамадзтваў, актуальная, напрыклад, і для Ўкраіны, мяжы Польшчы і Нямеччыны, — сказаў Аляксандар Лукашанец. — Да трасянкі трэба ставіцца як да натуральнай зьявы. Нават у аднамоўных краінах на літаратурнай мове размаўляе адносна невялікая, высокаадукаваная частка грамадзтва. Зьмешаная гаворка — рэалія любой сучаснай камунікатыўнай прасторы».

Апрача таго, Лукашанец падкрэсьліў, што ў школах дзеці атрымліваюць дастатковыя веды па беларускай мове:

«Сыстэма сярэдняй адукацыі сёньня дае дастатковыя веды па беларускай і расейскай мовах, каб выкарыстоўваць іх паралельна».

Веданьне беларусамі роднай мовы Аляксандар Лукашанец ацаніў як даволі высокае, таму адкрываць у краіне спэцыяльныя курсы па беларускай мове ён ня бачыць неабходнасьці. Лукашанец лічыць, што большасьць беларусаў зь лёгкасьцю загавораць па-беларуску без спэцыяльных курсаў, калі пачнуць часьцей карыстацца роднай мовай на практыцы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG