Лінкі ўнівэрсальнага доступу

Сьледчыя дапыталі падазраванага ў забойстве Сьвятланы Хіневіч


Афіцыйны прадстаўнік Сьледчага камітэту па Менску Аляксандар Герасімаў паведаміў, што сьледчыя ўпершыню з моманту забойства начальніка аддзела кадраў «Мінск-Крышталь», сябра ЦВК Сьвятланы Хіневіч дапыталі падазраванага ў злачынстве.

Падазраваным ва ўчыненьні асабліва цяжкага злачынства 8 жніўня быў прызнаны мянчук 1978 году нараджэньня, не судзімы, які жыў у адным пад’езьдзе зь Сьвятланай Хіневіч. Мужчына зьяўляецца нарказалежным.

Жанчыну знайшлі ва ўласнай кватэры з мноствам колата-рэзаных ран. Злачынства не зьвязана з прафэсійнай і грамадзкай дзейнасьцю загінулай, носіць побытавы характар, падкрэсьліў Герасімаў.

Падазраваны быў затрыманы ў сваёй кватэры па суседзтве — з шматлікімі рэзанымі ранамі, вялікай стратай крыві, у непрытомным стане. Яго шпіталізавалі. Характар раненьняў сьведчыць пра тое, што ён хацеў зьдзейсьніць суіцыд. 9 жніўня, пасля таго, як падазраваны прыйшоў у сябе, з удзелам адваката пачаліся сьледчыя дзеяньні.

Па крымінальнай справе прызначана каля 20 розных дасьледаванняў, якія правядзе Дзяржаўны камітэт судовых экспертыз. Праводзіцца шэраг іншых сьледчых і аператыўна-вышуковых мерапрыемстваў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG