Лінкі ўнівэрсальнага доступу

Сьвецкія і касьцёльныя ўлады ў Менску не камэнтуюць інфармацыю аб магчымым затрыманьні каталіцкага сьвятара з Барысава.

У Менску не пацьвярджаюць і не абвяргаюць інфармацыю аб затрыманьні супрацоўнікамі Камітэта дзяржбясьпекі ксяндза Ўладзіслава Лазара, пробашча парафіі ў Барысаве.

«Мы не камэнтуем гэтую інфармацыю», — заявілі агенцтву «Інтэрфакс» у прэс-службе КДБ у панядзелак.

Афіцыйнай інфармацыі ад Рымска-каталіцкай царквы ў Беларусі таксама на гэты момант няма.

Як паведамілі некаторыя інтэрнэт-рэсурсы, каля месяца таму быў арыштаваны і зьмешчаны ў СІЗА КДБ ксёндз Уладзіслаў Лазар, пробашч парафіі Спасланьня Сьвятога Духа ў Барысаве.

У мінулую пятніцу Аляксандр Лукашэнка заявіў аб затрыманьні супрацоўніка беларускіх спэцслужбаў, які працаваў на замежныя дзяржавы празь прадстаўнікоў каталіцкай царквы:

«Мы нядаўна затрымалі аднаго са здраднікаў, які служыў у спэцслужбах і які праз прадстаўнікоў каталіцкай царквы быў зьвязаны з замежнымі дзяржавамі».

Лукашэнка адзначыў журналістам, што гэты чалавек «ня толькі здаваў інфармацыю, але з-за яго дзейнасьці пацярпелі людзі, якія працуюць за мяжой».

Паказаць камэнтары

XS
SM
MD
LG