Лінкі ўнівэрсальнага доступу

Беларусь, Расея, Украіна аб’ядноўваюцца супраць чумы сьвіней.

Кіраўнік Рассельгаснагляду Сяргей Данкверт на сустрэчы з кіраўнікамі вэтэрынарных службаў Беларусі і Ўкраіны ў чацьвер абмяркуе выпрацоўку сумесных захадаў дзеля барацьбы зь вірусам афрыканскай чумы сьвіней (АЧС).

Пра гэта паведаміла РИА Новости са спасылкай на Рассельгаснагляд.

Сустрэча адбудзецца ў Менску. У ёй таксама возьмуць удзел кіраўнік прадстаўніцтва Міжнароднага эпізаатычнага бюро (МЭБ) па Ўсходняй Эўропе Казімірас Лукаўскас і віцэ-прэзыдэнт рэгіянальнай камісіі МЭБ па Эўропе Іван Бісюк.

АЧС не паддаецца лячэньню, не адчувальны да прафіляктыкі шляхам вакцынаваньня. Спыніць распаўсюджваньне віруса можна толькі жорсткімі карантыннымі захадамі.

У Расеі вірус распаўсюджваецца з 2007 году, за гэты час там зьнішчаныя сотні тысяч сьвіней. Сёлета ён дабраўся да Белгарадзкай вобласьці на мяжы з Украінай, дзе вырабляецца амаль чвэрць усёй сьвініны ў Расеі. Паводле зьвестак, пададзеных на сайце Рассельгаснагляду, на 19 ліпеня ў РФ зарэгістравана 85 актыўных асяродкаў АЧС.

У канцы чэрвеня — пачатку ліпеня ўспышкі АЧС былі зарэгістраваныя ў Гарадзенскай і Віцебскай абласьцях Беларусі, у сувязі з чым Рассельгаснагляд абмежаваў увоз у Расею сьвініны з гэтых рэгіёнаў. Пра ўвод абмежаваньняў на беларускую сьвініну абвясьцілі Літва і Ўкраіна, Польшча хоча адгарадзіцца ад Беларусі плотам.

Раней кіраўнік Мінсельгасхарчу Беларусі Леанід Заяц заяўляў, што вірус сьвіной чумы мог быць занесены ў краіну з кармамі для жывёл, якія паходзілі з Расеі.

Ва Ўкраіне, зь якой мяжуе Белгарадзкая вобласьць, АЧС сёлета зафіксаваная не была. Аднак Мінаграпрам Украіны робіць усе захады, каб не дапусьціць занясеньня ўзбуджальніка хваробы на сваю тэрыторыю.

Ваша меркаваньне

Паказаць камэнтары

XS
SM
MD
LG