Лінкі ўнівэрсальнага доступу

logo-print

На рынках Гомелю цяпер прадаецца багата сьвініны. Эпідэмія сьвіной чумы падштурхнула многіх вяскоўцаў без пары пазбавіцца ад жывёлы. Пра тое, як трывожныя весткі пра эпідэмію адбіліся на гандлі — рэпартаж з Гомелю.

Мясныя рады на Цэнтральным рынку нават у сёньняшні будзённы дзень спрэс заваленыя сьвінінай (здымкі 1,2). І толькі асобныя гандляры прапануюць цяляціну — найлепшыя кавалкі па 130–140 тысяч за кіляграм. Сьвініна — у тры разы таньнейшая.

Гамяльчук Уладзімер толькі што купіў кавалак недарагой сьвежыны:

«Дзе па 45, а дзе па 48 тысяч беларускіх рублёў, гледзячы ў каго як. Ня страшна нічога ўжо. Чаго баяцца — што ў краме, што тут. У краме толькі даражэй — па 65 тысяч сьвініна. У магазыне, канечне, дорага. А тут я ўзяў за сорак».

Кабета сярэдняга веку, прыцэньваючыся да сьвініны, наагул кідае фатальную фразу:

«Чаму быць, таго не абмінуць — не адмаўляемся, ядзім. А што рабіць? Я колькі жыву, столькі й не люблю ялавічыну. Для мяне — сьвініна».



Пэнсіянэр Мікалай, які таксама прыйшоў на рынак па танную сьвежыну, абазнаны ў сытуацыі з афрыканскай чумой сьвіней:

«Ну, калі б была чума, то сьвініну забаранілі б прадаваць. Чума ня ў нас — у нейкіх іншых раёнах, я чытаў. Там усіх сьвіней перабілі. Б’юць і добрае пагалоўе — тое, якое яшчэ не заражанае. Прымушаюць усё зьнішчаць».

Двое даўніх прыяцеляў, Віктар і Сяргей, прыдзірліва аглядаюць мясныя рады, выбіраючы сьвініну, якая найбольш даспадобы. І дзеляцца інфармацыяй пра сьвіную чуму.

Віктар: «Кажуць, што для людзей чума гэтая не небясьпечная. Яна канкрэтна для жывёлін небясьпечная. А калі ты спажыў мяса ці сала — гэта ж не небясьпечна. Але ж гэта нам так падаюць, а як яно насамрэч, мы ж ня ведаем».

Прыяцель Сяргей, кажучы пра вялікі выбар сьвініны, пабойваецца крыху толькі за дзяцей:

«На нашым рынку дастаткова сьвініны. Калі дзеткам трапіцца, гэта шкада. А калі дарослы чалавек, то чаго ўжо баяцца? Калі мы перажылі Чарнобыль, то што ўжо нам тут небясьпечна?»

Цэнтральны рынак

Цэнтральны рынак



Спэцыялізаваныя фірмовыя крамы, у прыватнасьці, саўгасу-камбінату «Сож», дзе ёсьць сьвінагадоўчы комплекс на 100 тысяч галоў, сёньня прадавалі сьвініну ў разруб нават па 27 тысяч рублёў. У прыватнасьці, у краме на вуліцы Кірава. Была й даражэйшая — па 55–65 тысяч. Аднак гараджане ня надта кідаліся на такія прапановы. Чаму — апавядае спадарыня Ірына:

«Тут крама мне не падабаецца. Калі б вы зайшлі, то пабачылі б нясьвежае. Такая ж крама, „Сожаўская“, нашмат лепшая каля тралейбуснага дэпо. Чумы не баюся. Па-першае, чума дзе ў нас? У Горадні — дзесьці там, далей. А „Сож“ — пад Гомелем. Шчыра кажу, нават пра чуму й не задумвалася. Толькі даведалася на мытні — машыну апрацоўвалі. Мы езьдзілі ва Ўкраіну — і ўсе нашыя машыны пры ўезьдзе апрацоўваюць ад чумы».

Абвестка на фірмовай краме "Сож"

Абвестка на фірмовай краме "Сож"

XS
SM
MD
LG