Лінкі ўнівэрсальнага доступу

Літоўскія памежныя службы 23 ліпеня пачалі праводзіць дэзінфэкцыю абутку пасажыраў зь Беларусі, дзе лютуе афрыканская чума сьвіней.

Памежнікі прагназуюць, што гэтая працэдура ня створыць затораў на мяжы.

«Новая працэдура не павінна выклікаць чэргаў, бо і дагэтуль на праверку з аўтобуса павінны былі высаджвацца ўсе пасажыры з багажом. Цяпер ім яшчэ давядзецца праходзіць па дэзынфэкцыйных дыванках. Аднак як гэта паўплывае на патокі, будзе відаць пазьней, таму што мы пакуль толькі пачалі гэта рабіць», — сказаў BNS прадстаўнік Службы аховы дзяржаўнай мяжы Літвы Рокас Пукінскас.

«Кожная краіна мае права прымаць меры абароны, якія яна палічыць патрэбнымі», — сказаў карэспандэнту Свабоды першы намесьнік дырэктара дэпартамэнту вэтэрынарнага і харчовага нагляду Міністэрства сельскай гаспадаркі і харчаваньня, галоўны дзяржаўны вэтэрынарны інспэктар Беларусі Юры Піваварчык.

Пра тое, што Літва гатовая прыступіць да дэзынфэкцыі абутку пасажыраў на мяжы зь Беларусьсю, раней папярэдзіў кіраўнік Дзяржаўнай харчова-вэтэрынарнай службы Літвы Ёнас Мілюс. Ён заявіў, што пакуль не прадугледжваецца рабіць больш жорсткім парадак перасячэньня мяжы з-за афрыканскай чумы сьвіней у Беларусі. У прыватнасьці, пасажыраў ня будуць прасіць мыць рукі.

Польскі партал rmf24.pl паведаміў, што бліжэйшым часам Польшча таксама зробіць захады па дэзінфэкцыі на мяжы. Там, акрамя абутку, будуць дэзынфікаваць і рукі.
XS
SM
MD
LG