Лінкі ўнівэрсальнага доступу

17 ліпеня завяршаецца трохдзённы афіцыйны візыт у Кітай кіраўніка Беларусі Аляксандра Лукашэнкі.

У Пэкіне Лукашэнка і старшыня КНР Сі Цзіньпін падпісалі дэклярацыю пра ўсталяваньне паміж краінамі адносін усебаковага стратэгічнага партнэрства. Камэнтары экспэртаў да вынікаў візыту.

Кірыл Коктыш

Кірыл Коктыш

«Падпісаньне дэклярацыі аб стратэгічным партнэрстве, безумоўна, ініцыяваў кіраўнік Беларусі, — заявіў Свабодзе дацэнт Маскоўскага дзяржаўнага інстытуту міжнародных дачыненьняў Кірыл Коктыш. — Праз гэта Лукашэнка хоча ўцягнуць Пэкін і Маскву ў гэткую самую гульню, што ўжо вядзецца вакол Беларусі паміж Брусэлем і Масквой. Таму гэтая дэклярацыя будзе вельмі скрупулёзна вывучаная расейскім кіраўніцтвам»:

«На 100% гэта будзе ўважліва адсочвацца. І выклікае нейкую перасьцярогу. Але ж менавіта гэта і ёсьць мэтай Лукашэнкі. Тады ўдасца зрабіць канкурэнцыю паміж Пэкінам і Масквой, як было дагэтуль паміж Брусэлем і Масквой. Галоўная мэта — уцягнуць расейцаў і кітайцаў у канкурэнцыю. Гэта ж звычайная беларуская тактыка.

А вось ці спрацуе яна з кітайцамі, гэта вялікае пытаньне. Бо ў іх усё ж трохтысячагадовы досьвед. І яны звычайна не сьпяшаюцца. А рэсурсаў часу ў Беларусі нашмат меней, чым у Кітаю».

У дэклярацыі запісана, што абедзьве краіны будуць заахвочваць стварэньне на сваіх тэрыторыях новых сумесных прадпрыемстваў і зборачных вытворчасьцяў, умацоўваць супрацоўніцтва ў галіне інфраструктурнага будаўніцтва, машынабудаваньня, тэлекамунікацыяў, будматэрыялаў ды ў іншых сфэрах. Некаторыя пагадненьні ўжо падпісаныя. Так, Міністэрства прамысловасьці Беларусі і карпарацыя Zhejiang Geely Holding Group дамовіліся наладзіць у Беларусі сэрыйную вытворчасьць легкавых аўто.

«Праз такія пагадненьні Беларусь уцягваюць у вельмі небясьпечную авантуру», — лічыць кіраўнік аналітычнага цэнтру «Стратэгія» Леанід Заіка:

Леанід Заіка

Леанід Заіка

«У кітайцаў 150 аўтазаводаў. І, вядома, яны ўжо зарыентаваныя на тое, каб ператварыць беларусаў у кітайцаў. Гэта азначае, што ў Беларусь перанясуць адкрутачна-зборачную вытворчасьць. Адпаведна з тэорыяй і практыкай жыцьця прадуктаў у 20 стагодзьдзі вытворчасьць кампутараў, бытавой тэхнікі, машын заканчвалася ў такіх краінах, якія на той час разьвіваліся, як Кітай альбо Інданэзія. Беларускія эліты, калі б яны адсочвалі сытуацыю, павінны былі б зараз арыентавацца не на апошнюю стадыю вытворчасьці, а на першыя дзьве, калі ствараюцца новыя тэхналёгіі. А дзеля гэтага трэба арыентавацца на Эўропу і ЗША.

Аднак беларускія эліты аказаліся вельмі адсталымі.І таму супрацоўніцтва з Кітаем і трансфэр кітайскай вытворчасьці ў Беларусь нясе за сабою цывілізацыйную дзірку. І калі паглядзець, як разьвіваецца сучасны сьвет, то, на жаль, горшы варыянт цяжка сабе ўявіць».

«Кітайскія тэхналёгіі ўсё ж саступаюць тым, паводле якіх працуюць самыя вядомыя ў сьвеце фірмы», — адзначае эканаміст Леў Марголін:

Леў Марголін

Леў Марголін

«Калі браць у працэнтных адносінах, то, я думаю, гэта працэнтаў 80, а то і болей. Гэта такая танная кітайская падробка пад тавары, якія ствараюцца ў Эўропе ці Злучаных Штатах. Яны зьнешне падобныя да іх. Але адразу бачна, што гэта зусім іншая ступень якасьці.

Іншая справа, ці цікава Кітаю ствараць у нас вытворчасьці, якія былі б разьлічаныя на збыт прадукцыі ня толькі ў Беларусі, але і на Адзінай мытнай прасторы? Я думаю, у розных галінах сытуацыя розная. Але ў Беларусі ёсьць некаторыя плюсы, якіх, можа, няма ў Казахстане і Расеі. І найперш, у нас больш дысцыплінаваны і адукаваны пэрсанал на прадпрыемствах».

Таваразварот паміж Беларусьсю і Кітаем наблізіўся да трох мільярдаў даляраў. Лукашэнка хваліцца, што калісьці мы марылі пра паўмільярда. І называе цяперашні ровень «агромністым прагрэсам».

«Але гэта выключна павярхоўная ацэнка», — адзначае Леанід Заіка:

«Нашых МАЗаў мы летась прадалі ў Кітай 17 штук. Усяго 17 — на ўвесь велізарны Кітай. А калі гавораць пра мільярдныя сумы таваразвароту, то ён уключае ў сябе пераважна нашы пакупкі ў Кітаі. Кітай для нас — вялікая крама. Мы купляем там, пачынаючы ад губачак посуд мыць і заканчваючы ноўтбукамі і пляншэтамі».

Свае высновы экспэрт падмацаваў наступнымі лічбамі. За тры апошнія гады (2010–2012) экспарт беларускай прадукцыі ў Паднябесную складаў 475, 636 і 433 мільёны даляраў з агульнай сумы амаль у тры мільярды. Дык каму насамрэч выгаднае такое супрацоўніцтва?

Паказаць камэнтары

XS
SM
MD
LG